ەۋروپالىق وداق – ەلىمىزدىڭ ءىرى ساۋدا ءارى ينۆەستيتسيالىق سەرىكتەسى. بيىل 9 ايدا قازاقستان مەن ەو اراسىنداعى تاۋار اينالىمى 33,1 ملرد دوللاردى قۇرادى. وسى جىلدىڭ ءبىرىنشى جارتىجىلدىعىندا ەو ەلدەرىنەن ەل ەكونوميكاسىنا تىكەلەي شەتەلدىك ينۆەستيتسيانىڭ جالپى اعىنى 4,2 ملرد دوللارعا جەتتى. ەلىمىزدە ماشينا جاساۋ, ەنەرگەتيكا, اگروحيميا, فارماتسەۆتيكا, ازىق-ت ۇلىك ونەركاسىبى سياقتى باسقا دا سالالاردا ەۋروپالىق كاپيتالدىڭ قاتىسۋىمەن 4 مىڭنان استام كاسىپورىن جۇمىس ىستەيدى. ولاردىڭ اراسىندا «Alstom», «Claas», «Carlsberg», «Polpharma» مەن باسقا دا بىرقاتار كومپانيا بار.
ولجاس بەكتەنوۆ ەۋروپالىق ارىپتەستەرمەن ءوزارا ءىس-قيمىلدى تەرەڭدەتۋگە مۇددەلى ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ ءوزىنىڭ حالىققا جولداۋىندا ينۆەستيتسيالىق ساياساتتى جەتىلدىرۋگە ەرەكشە كوڭىل ءبولدى. ءبىز ەكونوميكاعا ۇزاقمەرزىمدى ينۆەستيتسيا تارتۋعا قولايلى جاعداي جاساۋ ءۇشىن جۇمىس ىستەپ جاتىرمىز. ەۋروپالىق بيزنەستىڭ قازاقستانداعى قاتىسۋىن كەڭەيتۋ ءۇشىن ءارى ءوندىرىستى لوكاليزاتسيالاۋ ماقساتىندا جاڭا بىرلەسكەن جوبالاردى جۇزەگە اسىرۋعا شاقىرامىن», دەدى و.بەكتەنوۆ.
بيىلعى 10 ايدا ەلىمىزدىڭ نەگىزگى كاپيتالىنا سالىنعان ينۆەستيتسيا 13,1%-عا ءوسىپ, 16 ترلن تەڭگەگە جەتتى.
ەل ۇكىمەتى ينۆەستورلاردىڭ مۇددەلەرىن قورعاۋعا, بيزنەسكە قولداۋ كورسەتۋگە كەپىلدىك بەرەتىن قۇقىقتىق, ينستيتۋتسيونالدىق نەگىزدەردى جوسپارلى تۇردە نىعايتىپ كەلەدى. بيزنەسكە ارنالعان اكىمشىلىك تالاپتاردى جەڭىلدەتۋ شارالارى اياسىندا ەسەپ بەرۋ تۇرلەرىنىڭ جارتىسىنا جۋىعى جويىلدى. EgovBusiness ۆەب-پورتالى مەن ءموبيلدى قوسىمشا ارقىلى ينۆەستورلارعا بارلىق مەملەكەتتىك قىزمەتتەر مەن قولداۋ شارالارى ء«بىر تەرەزە» قاعيداتى بويىنشا ۇسىنىلىپ وتىر. جالپى, مەملەكەتتىك قىزمەتتەردىڭ 90%-دان استامى ونلاين-فورماتقا اۋىستىرىلعان.
جاڭا سالىق كودەكسىندە ينۆەستورلار ءۇشىن سالىقتىق جەڭىلدىكتەر, كەدەندىك باج سالىقتارىنان بوساتۋ, زاتتاي گرانتتار بەرۋ مەن باسقا دا جەڭىلدىكتەر تۇرىندەگى يكەمدى پرەفەرەنتسيالار ساقتالعان. بيزنەسكە ينفراقۇرىلىم بويىنشا قولداۋ ارنايى ەكونوميكالىق, يندۋستريالىق, شاعىن ونەركاسىپتىك ايماقتاردا دايىن ءوندىرىس الاڭدارىن ۇسىنۋ تۇرىندە كورسەتىلەدى.
جيىندا ەو ەلشىسى الەشكا سيمكيچ, گەرمانيا ەلشىسى مونيكا يۆەرسەن, نيدەرلاند ەلشىسى نيكو سحەرمەرس, فرانتسيا ەلشىسى سيلۆان گيوگە, شۆەتسيا ەلشىسى ستەفان ەريكسسون, قازاقستاننىڭ ەۋروپالىق بيزنەس قاۋىمداستىعىنىڭ توراعاسى ەرلان دوسىمبەكوۆ, Glovo قازاقستان (يسپانيا) باس مەنەدجەرى لاۋرا مارتين الكاراس ۇسىنىستارى مەن ۇسىنىمدارىن ايتتى. بيزنەس جۇرگىزۋ مەن دامىتۋ شارتتارى, بولجامدى سالىق ساياساتى مەن زاڭ ۇستەمدىگىنە قاتىستى جانە تاعى دا باسقا ماسەلەلەر كوتەرىلدى.
ەۋروپالىق وداق ەلشىسى الەشكا سيمكيچ ەلىمىز ەۋروپالىق ينۆەستورلارعا ورتالىق ازياداعى نەگىزگى باعىت ەكەنىن اتاپ ءوتتى. ىنتىماقتاستىقتىڭ كەلەشەگى زور باعىتتارى رەتىندە ەنەرگەتيكا, تسيفرلىق كوممۋنيكاتسيالار مەن جي, كولىك, دەنساۋلىق ساقتاۋ, اۋىل شارۋاشىلىعى, سۋ رەسۋرستارىن باسقارۋ سياقتى باسقا دا سالالار اتالدى.
«قازاقستان WEF جاھاندىق باسەكەگە قابىلەتتىلىك يندەكسى سياقتى رەيتينگتەردەگى ءوز ۇستانىمىن جاقسارتا تۇسكەن. ينۆەستيتسياعا قاتىستى بىرقاتار نەگىزگى كورسەتكىش بويىنشا قازاقستان وڭىردە كوش باستاپ تۇر. ينۆەستورلار جاعدايىن ودان ءارى جاقسارتۋ بولاشاقتا ۇلكەن پايدا اكەلۋى مۇمكىن», دەدى نيدەرلاند ەلشىسى نيكو سحەرمەرس.
فرانتسيا ەلشىسى سيلۆان گيوگە ينۆەستورلارعا سەنىمدى قۇقىقتىق بازا قالىپتاستىرىپ وتىرعان مەملەكەتتىك دەڭگەيدەگى رەفورمالارعا بايلانىستى فرانتسۋز كومپانيالارى ەل نارىعىنا ۇلكەن قىزىعۋشىلىق تانىتىپ وتىرعانىن ايتتى. شۆەتسيا ەلشىسى ستەفان ەريكسسون ەلىمىزدەگى تسيفرلىق ترانسفورماتسيانىڭ ماڭىزدىلىعىن اتاپ ءوتىپ, شۆەد كومپانيالارىنىڭ جاساندى ينتەللەكت تەحنولوگيالارىن ەنگىزۋ سالاسىندا تاجىريبە الماسۋعا مۇددەلى ەكەنىن جەتكىزدى.
وتىرىس قورىتىندىسى بويىنشا قاتىسۋشىلار قازاقستان مەن ەو اراسىنداعى ساۋدا-ەكونوميكالىق قاتىناستاردى دامىتۋعا ءارى ينۆەستيتسيالىق بايلانىستاردى جانداندىرۋعا جان-جاقتى ىقپال ەتۋگە دايىن ەكەندەرىن جەتكىزدى. پرەمەر-مينيستر مەملەكەتتىك ورگاندار مەن ۇيىمدارعا جيىندا ايتىلعان ماسەلەلەر مەن ۇسىنىمداردىڭ بارلىعىن پىسىقتاۋدى تاپسىردى.
