الماتى قالالىق قوعامدىق كەڭىستىكتەردى دامىتۋ باسقارماسى حابارلاپ وتىرعانداي, ساياباقتار, سكۆەرلەر, جاسىل ايماقتار قۇرۋ جۇمىستارى جۇيەلى تۇردە جۇرگىزىلىپ, بارلىق اۋداندا ءبىر اۋىق دامىلداپ, سەرۋەندەيتىن ورىندار اشىلىپ جاتىر.
الايدا سوڭعى كۇندەرى سالتاناتتى اشىلۋىنا قالا اكىمى دارحان ساتىبالدى ورتاقتاسقان جاڭا سكۆەردىڭ ورنى بولەك. پرەزيدەنتتىڭ بۇرىنعى رەزيدەنتسياسىنىڭ ورنىندا پايدا بولعان دەمالىس ورنىنىڭ وزىندىك تاريحى بار. مەگاپوليستەگى نازارباەۆ داڭعىلىنىڭ باتىسىنا قاراي, گاندي كوشەسىنىڭ سولتۇستىگىن الىپ جاتقان ساياباقتى سالۋ ءۇشىن مەملەكەت قارجىسىنان بولەك, نۇرلان سماعۇلوۆ قورى 1 ملرد تەڭگە ءبولىپ وتىر.
«بۇل – الماتىنىڭ تورىندە ورنالاسقان تاريحي ورىن. وكىنىشكە قاراي, 2022 جىلى قاڭتار وقيعاسى كەزىندە بۇل عيمارات قاتتى ب ۇلىنگەن بولاتىن. بۇدان كەيىن پرەزيدەنتىمىز قاسىم-جومارت توقاەۆ وسى جەردە قالا تۇرعىندارى ءۇشىن ساياباق سالىنسىن دەگەن شەشىم قابىلداپ, ءبىز دە وسى باستاماعا ءوز ۇلەسىمىزدى قوسىپ, نۇرلان سماعۇلوۆ قورى 1 ملرد تەڭگە ءبولدى. بۇل ءىستىڭ كوممەرتسيالىق جوبا ەمەس ەكەنىن ايتا كەتكەن ءجون. وزدەرىڭىز كورىپ وتىرعانداي, ەل ريزاشىلىعىن ءبىلدىرىپ جاتىر, بالا-شاعا, جاستارعا قوسا, ۇلكەن كىسىلەر دە كەلىپ, كوڭىلدەرى كوتەرىلىپ, سەيىل قۇرا باستادى», دەدى نۇرلان سماعۇلوۆ قورىنىڭ ديرەكتورى ايدىن سۇلتانوۆ.
بۇل ساياباق تا قوعامدىق كەڭىستىكتەردى دامىتۋ باعدارلاماسىنىڭ ءبىر بولشەگى رەتىندە جايلى قالا تۇجىرىمداماسىن جۇزەگە اسىرۋدى كوزدەيدى. نىساننىڭ جالپى اۋدانى 4,16 گەكتار بولسا, ونىڭ 3 گەكتارعا جۋىعى جاسىل جەلەككە بولەنگەن.
قۇرىلىس جۇمىستارى بارىسىندا ينجەنەرلىك, اباتتاندىرۋ جۇمىستارى تولىق ورىندالدى. اۋماقتا زاماناۋي جارىقتاندىرۋ مەن اۆتوماتتى سۋارۋ جۇيەلەرى ورناتىلىپ, 10 مىڭ شارشى مەتردەن استام جاياۋ جۇرگىنشىلەر جولى توسەلىپ, 77 ورىندىق پەن 52 قوقىس جاشىگى قويىلدى. اۋقىمدى تۇردە جۇرگىزىلگەن كوگالداندىرۋ جۇمىستارى كەزىندە 425 اعاش وتىرعىزىلسا, ونىڭ 166-سى قىلقان جاپىراقتى, سونداي-اق 590 ساندىك بۇتالاردىڭ كوشەتتەرى بوي كوتەردى.
جاڭا ساياباقتىڭ تاعى ءبىر ەرەكشەلىگى – قىستا مۇز ايدىنى رەتىندە پايدالانىلاتىن جاساندى توعان. بۇل توعان ساياباقتى جىلدىڭ ءتورت مەزگىلىندە جەتىمسىرەتپەي, قىستا دا جۇرتتى وزىنە تارتاتىن بولادى. مامانداردىڭ ايتۋىنشا, اباتتاندىرۋ كەزىندە كليماتتىق جاعدايلارعا ءتوزىمدى ماتەريالدار مەن ەكولوگيالىق تەحنولوگيالار قولدانىلعان.
قالاي دەسەك تە, قالانىڭ قاق ورتاسىندا پايدا بولعان اسەم ساياباق بۇكىل الماتىلىقتاردىڭ ورتاق يگىلىگىنە اينالىپ, قىزىعىن جۇرت جابىلىپ كورەتىن قوعامدىق دەمالىس ورنىنىڭ بىرىنە اينالاتىنى داۋسىز.
ءوز كەزەگىندە قوعامدىق كەڭىستىكتەردى دامىتۋ باسقارماسى دا الماتىدا ساياباقتار مەن جاسىل ايماقتاردى قۇرۋ جونىندەگى جوبالار جۇيەلى تۇردە ىسكە اسىپ, شاھاردىڭ باسقا اۋداندارىندا دا حالىق الاڭسىز سەرۋەن قۇراتىن جاڭا الاڭدار پايدا بولىپ جاتقانىن ايتادى.
نۇرلان سماعۇلوۆ قورى – جەكە قايىرىمدىلىق ۇيىم. مۇنداي قور قۇرۋداعى نەگىزگى ماقسات – مادەنيەت, ونەر, سپورت پەن الەۋمەتتىك ماڭىزى بار جوبالاردى قولداپ, دامىتۋ, سونىمەن بىرگە ەلىمىزدىڭ دارىندى ادامدارى ءۇشىن جاڭا مۇمكىندىكتەر تۋدىرۋ.
اقيقاتىندا, قور قۇرىلعالى بەرى بىرقاتار ساۋاپتى باستاماعا دەمەۋشى بولىپ, سۋ تاسقىنى كەزىندە زارداپ شەككەن ورال قالاسىنىڭ تۇرعىندارىنا 264 پاتەر ساتىپ اپەرىپ, مۇگەدەكتەرگە كومەك بەرىپ, ءبىلىم بەرۋ مەكەمەلەرى مەن مادەنيەت جانە ونەر سالاسىنداعى ناقتى جوبالارعا قارجىلاي قولداۋ تانىتتى.
