ءماجىلىس دەپۋتاتى نيكيتا شاتالوۆ 12 قاراشا كۇنى وتكەن ءماجىلىستىڭ جالپى وتىرىستا لگبت ناسيحاتىنا تىيىم سالۋدى كوزدەيتىن زاڭ جوباسىنا قاتىستى ءوز پىكىرىن ءبىلدىردى. ونىڭ ايتۋىنشا, كەيبىر حالىقارالىق قۇقىق قورعاۋ ۇيىمدارى بۇل باستاماعا قارسى مالىمدەمەلەر تاراتىپ جاتىر.
«بۇگىن اقپارات كەڭىستىگىندە بىرقاتار حالىقارالىق قۇقىق قورعاۋ ۇيىمدارىنان «لگبت ناسيحاتىنا تىيىم سالۋ» جونىندەگى تۇزەتۋلەردى قابىلداماۋعا شاقىراتىن مالىمدەمەلەر تاراي باستادى. بىراق ەشكىم ۇلتتىق پارلامەنتكە قانداي نورمالاردى قابىلداۋ كەرەگىن نۇسقاي المايدى. اقپاراتتىق قىسىم ارقىلى ادامنىڭ كوزقاراسىن تاڭۋعا تىرىسۋ - حالىقارالىق تاجىريبەگە قايشى», دەدى دەپۋتات.
شاتالوۆتىڭ ايتۋىنشا, بۇل زاڭ جەكە ادامداردىڭ ومىرىنە ارالاسۋ ەمەس, قوعامداعى اشىق اقپارات كەڭىستىگىندەگى تاربيە مەن مورال ماسەلەسىنە قاتىستى شارا.
«قازاقستاندا ەشكىم قانداي دا ءبىر بەلگىسى ءۇشىن قۋدالانبايدى جانە قۋدالانۋى مۇمكىن ەمەس. بۇل – ءبىزدىڭ كونستيتۋتسيا مەن مەملەكەتتىڭ نەگىزگى قاعيداتتارىنا قايشى. تالقىلانىپ جاتقان ماسەلە ازاماتتاردىڭ جەكە ومىرىنە قاتىستى ەمەس, ول قوعامدىق كەڭىستىك پەن كامەلەتكە تولماعاندارعا تاربيەلىك ىقپال ەتەتىن اقپاراتقا بايلانىستى», دەدى ول.
دەپۋتاتتىڭ سوزىنشە, تۇزەتۋلەردىڭ باستى ماقساتى – بالالار مەن جاسوسپىرىمدەردى وتباسى مەن نەكە تۋرالى تۇسىنىكتەرىن بۇرمالايتىن, قۇندىلىق جۇيەسىنە كەرى اسەر ەتەتىن كونتەنتتەن قورعاۋ.
«بۇل وزگە كوزقاراستاعى ادامداردىڭ ءومىر سۇرۋىنە تىيىم سالۋ ەمەس, قوعامىمىزعا جات ءومىر سالتىن ناسيحاتتاۋدى شەكتەۋ ارەكەتى», دەدى شاتالوۆ.
سونىمەن قاتار ول قازاقستان حالىقارالىق مىندەتتەمەلەرىن تولىق ورىنداپ وتىرعانىن اتاپ ءوتتى.
«بىردە-ءبىر حالىقارالىق قۇجات مەملەكەتتەرگە ۇلتتىق تاربيە مەن قوعامدىق مورال شەڭبەرىنەن شىعاتىن يدەولوگيالىق تاجىريبەلەردى ناسيحاتتاۋعا مىندەتتەمە جۇكتەمەيدى. كەرىسىنشە, بالا قۇقىقتارى تۋرالى بۇۇ كونۆەنتسياسىنىڭ 17-بابىندا مەملەكەتتەر بالالاردى ولاردىڭ ءال-اۋقاتىنا زيان كەلتىرەتىن اقپاراتتان قورعاۋ شارالارىن قابىلداۋى ءتيىس دەپ ناقتى كورسەتىلگەن. وسى زاڭدى قابىلداۋ ارقىلى پارلامەنت حالىقارالىق مىندەتتەمەلەرگە ساي ارەكەت ەتىپ وتىر», دەدى دەپۋتات.
شاتالوۆ سونىمەن بىرگە قوعامدا ءداستۇرلى جانە مورالدىق قۇندىلىقتار ارقاشان جوعارى بولعانىن ايتىپ, لگبت تاقىرىبىنا قاتىستى قوعامدىق نارازىلىقتىڭ رەسمي پەتيتسيا تۇرىندە دە كورىنىس تاپقانىن ەسكە سالدى.
«ونداعان مىڭ ازامات ءوز ۇستانىمدارىن ءبىلدىرىپ, بيلىك ورگاندارىنا جۇگىندى. بۇل قوعامنىڭ ناقتى سۇرانىسى. ونى ەلەمەۋ – ءوزىمىز وكىلدىك ەتەتىن قوعامدى ەلەمەۋ دەگەن ءسوز», دەدى ول.
ءسوزىنىڭ سوڭىندا دەپۋتات ارىپتەستەرىن زاڭ جوباسىن قولداۋعا شاقىردى.
