جەتىسۋدىڭ باستى ارتىقشىلىعى – ينفراقۇرىلىمدىق الەۋەتى مەن ەكونوميكالىق تۇراقتىلىعى. وبلىستا ءوندىرىس, كولىك-لوگيستيكا, ەنەرگەتيكا, اۋىل شارۋاشىلىعى سالالارىندا اۋقىمدى جوبالار جۇزەگە اسىپ جاتىر. مەملەكەت تاراپىنان جاسالىپ وتىرعان قولداۋ مەن جەڭىلدىكتەردىڭ ناتيجەسىندە وڭىرگە شەتەلدىك, وتاندىق كومپانيالاردىڭ قىزىعۋشىلىعى جىلدان-جىلعا ارتىپ كەلەدى. قازاقستاننىڭ جاھاندىق ينۆەستيتسيالار جونىندەگى دوڭگەلەك ۇستەلى (KGIR-2025) اياسىندا جەتىسۋ وبلىسىنىڭ دەلەگاتسياسى ءوڭىردىڭ ەكونوميكالىق الەۋەتىن تانىستىرىپ, شەتەلدىك ينۆەستورلارمەن ماڭىزدى كەلىسىمدەرگە قول جەتكىزدى. وبلىس اكىمىنىڭ ورىنباسارى اسەت قاناعاتوۆ باستاعان توپتىڭ ناتيجەلى كەزدەسۋلەرى بارىسىندا جالپى قۇنى 34 ملرد تەڭگەدەن اساتىن ءتورت مەموراندۋمعا قول قويىلدى. بۇل كەلىسىمدەر الداعى ۋاقىتتا 800-گە جۋىق جاڭا جۇمىس ورنىن اشۋعا مۇمكىندىك بەرەدى.
اتاپ ايتقاندا, ولار – بەلگيا, قحر, پاكىستان ينۆەستورلارىمەن بىرلەسكەن «Envision KKS» جشس-ءنىڭ «قورعاس – شىعىس قاقپاسى» اەا اۋماعىندا جەل گەنەراتورلارىن (WTG), ەنەرگيا ساقتاۋ جۇيەلەرىن (BESS) وندىرەتىن زاۋىتىنىڭ قۇرىلىسى, «كاۋسار-كارگو» جشس-ءنىڭ پانفيلوۆ اۋدانىندا حالىقارالىق اۆتوۆوكزال سالۋ جوباسى, «STS Jetisu» جشس-ءنىڭ «تالدىقورعان» يندۋستريالىق ايماعىندا SPC ۇلگىسىندەگى ەدەن جابىنىن شىعاراتىن زاۋىتتىڭ قۇرىلىسى, «Saron Kazakhstan» جشس-ءنىڭ «نۇر جولى – قورعاس» وتكىزۋ پۋنكتىندە اينالما جول مەن كولىك-لوگيستيكالىق ورتالىقتىڭ قۇرىلىسى جونىندەگى جوبالار.
– كومپانيانىڭ جوباسى قازاقستان مەن قىتاي شەكاراسىندا ورنالاسقان قورعاس اۋماعىندا ىسكە اسىرىلادى. ءبىز قىتايدان قازاقستانعا, ازەربايجان مەن وزبەكستانعا جەل گەنەراتورلارىن تاسىمالداۋمەن اينالىسامىز. كولىك وتكىزۋ بەكەتىندەگى كەپتەلىستەردى ازايتۋ, جالپى اۆتوموبيل وتكىزۋ پۋنكتىنىڭ جۇمىسىن جەڭىلدەتۋ ماقساتىندا جەرگىلىكتى اتقارۋشى ورگاندارعا اينالما جول مەن «نۇر جولى – قورعاس» وتكىزۋ پۋنكتىندە كولىك-لوگيستيكالىق ورتالىق سالۋ جونىندە ۇسىنىس جاسادىق. بۇل اينالما جول ۋچاسكەنىڭ وتكىزۋ قابىلەتىن 2-3 ەسەگە ارتتىرىپ, قولدانىستاعى ينفراقۇرىلىمعا تۇسەتىن جۇكتەمەنى ازايتۋعا مۇمكىندىك بەرەدى, – دەدى بەلگيالىق «Saron Kazakhstan» جشس كومپانياسىنىڭ پرەزيدەنتى ليۋدو سارەنس.
جوبالارى تۋرالى پاكىستاندىق «STS Jetisu» جشس كومپانياسىنىڭ ديرەكتورى افتاب تانۆير دە قىسقاشا ايتىپ بەردى.
– تمد اۋماعىندا جۇمىس ىستەپ كەلە جاتقانىمىزعا 20 جىلداي ۋاقىت بولدى. سونىڭ ىشىندە قازاقستانداعى العاشقى جوبامىزدى جەتىسۋ وبلىسىنىڭ اۋماعىندا باستاعالى وتىرمىز. ياعني قابىرعا مەن ەدەنگە ارنالعان SPC پانەلدەرىن شىعارۋ جوباسىن قولعا الدىق. بىزگە كورسەتىلگەن قولداۋلارعا ريزاشىلىعىمىزدى بىلدىرەمىز, – دەدى ول.
قىتايلىق ينۆەستورلار وبلىس اۋماعىندا ەكى جوبانى ىسكە اسىرماقشى. «كاۋسار-كارگو» جشس-ءنىڭ وكىلى لۋن ءشۋنتسيننىڭ ايتۋىنشا, كومپانيا پانفيلوۆ اۋدانىندا كولىك-لوگيستيكالىق حاب جوباسىن جۇزەگە اسىرا باستايدى. ياعني حالىقارالىق اۆتوۆوكزال, ۋاقىتشا ساقتاۋ قويماسى, گاز-تۋربينالىق ستانسا, ساۋدا-ويىن-ساۋىق ورتالىعى سياقتى بىرقاتار نىساندارىن سالادى. سول سياقتى «Envision KKS» جشس «قورعاس – شىعىس قاقپاسى» اەا اۋماعىندا جەل گەنەراتورلارىن وندىرەتىن زاۋىت جوباسىن قولعا الىپ جاتىر. جاڭا زاۋىت ىشكى نارىقتىڭ قاجەتتىلىكتەرىن قامتاماسىز ەتۋگە, جاڭارتىلاتىن ەنەرگيا كوزدەرىنە ارنالعان جابدىقتاردى يمپورتتاۋ تاۋەلدىلىگىن ازايتۋعا مۇمكىندىك بەرەدى. سونىمەن قاتار جوبالاۋ مەن وندىرۋدەن باستاپ, جاڭارتىلاتىن ەلەكتر ستانسالارى مەن ەنەرگيا ساقتاۋ جۇيەلەرىن پايدالانۋعا دەيىنگى كەشەندى تەحنيكالىق قولداۋدى قامتاماسىز ەتەدى.
– جەتىسۋ وبلىسى حالىقارالىق ارىپتەستىكتىڭ اياسىن بەلسەندى تۇردە كەڭەيتىپ كەلەدى. وبلىس قۇرىلعاننان بەرى ءوڭىر ەكونوميكاسىنا 1,2 ترلن تەڭگە ينۆەستيتسيا تارتىلىپ, بۇل 135 جوبانى ىسكە اسىرۋعا, 3,8 مىڭ جاڭا جۇمىس ورنىن قۇرۋعا مۇمكىندىك بەردى. ماسەلەن, قازىردە گەرمانيا كومپانياسىمەن بىرلەسىپ حالىقارالىق جۇك-جولاۋشى اۋەجايىنىڭ قۇرىلىسى باستالسا, چيلي كومپانياسىمەن بىرگە تاۋ-كەن ونەركاسىبىنە ارنالعان ديىرمەندىك شار وندىرەتىن زاۋىتتىڭ قۇرىلىسى قولعا الىنعان. سونداي-اق بەلگيا, قحر, پاكىستان ينۆەستورلارىمەن جاڭا كەلىسىمدەر جاسالدى. اتالعان باستامالار ءوڭىردىڭ ونەركاسىپتىك, ەكسپورتتىق الەۋەتىن ارتتىرۋعا, وندىرىسكە حالىقارالىق دەڭگەيدەگى وزىق تەحنولوگيالاردى ەنگىزۋگە, جالپى العاندا, الەۋمەتتىك-ەكونوميكالىق تۇراقتى دامۋدىڭ جاڭا مۇمكىندىكتەرىنە جول اشادى, – دەدى وبلىس اكىمىنىڭ ورىنباسارى اسەت قاناعاتوۆ.
بۇل كەلىسىمدەر جەتىسۋ ءوڭىرىنىڭ شەتەلدىك ينۆەستورلارعا قولايلى, تۇراقتى, سەنىمدى سەرىكتەس ەكەنىن دالەلدەيدى. ءوڭىر باسشىلىعىنىڭ باستى ماقساتى – ينۆەستيتسيالىق كليماتتى جاقسارتىپ, ءوندىرىس پەن ينفراقۇرىلىمدى دامىتۋ ارقىلى حالىقتىڭ تۇرمىس ساپاسىن ارتتىرۋ. جەتىسۋ بۇگىندە تەك تابيعي رەسۋرستارىمەن ەمەس, ەكونوميكالىق الەۋەتىمەن دە ەلىمىزدىڭ ينۆەستيتسيالىق كارتاسىندا ەرەكشە ورىنعا يە.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, وتكەن توعىز ايدا وبلىسقا تارتىلعان ينۆەستيتسيا كولەمى 330,3 ملرد تەڭگەگە جەتىپ, وتكەن جىلدىڭ سايكەس كەزەڭىمەن سالىستىرعاندا 12,7%-عا ارتتى.
