جالپى, 10 ايدا تاۋارلار ءوندىرىسى 8,2%-عا, قىزمەت كورسەتۋ 5,3%-عا ارتقان. وڭدەۋ ونەركاسىبىندە ءوسىم 5,8% بولدى. بۇل مەجە جەكەلەگەن باعىتتار بويىنشا ءونىم شىعارۋدىڭ ۇلعايۋى ەسەبىنەن قالىپتاسىپ وتىر. ولاردىڭ ىشىندە ماشينا جاساۋ – 11,5%-عا, اۆتوموبيل قۇراستىرۋ –13,3%-عا, حيميا ونەركاسىبى – 10,9%-عا, ازىق-ت ۇلىك – 9,1%-عا, مۇناي ونىمدەرى – 6,3%-عا, مەتالل بۇيىمدارى – 14,1%-عا,قۇرىلىس ماتەريالدارى – 5,3%-عا وسكەن. مۇندا قۇرىلىس سالاسىنداعى ءوسىم ءىرى ينفراقۇرىلىمدىق جوبالاردى ىسكە اسىرۋمەن بايلانىستى بولىپ وتىر. قۇرىلىس جۇمىستارىنىڭ كولەمى بيىلعى قاڭتار-قىركۇيەكتەگى 14,9%-بەن سالىستىرعاندا 15,1%-دى قۇرادى. بۇدان بولەك, اۋىل شارۋاشىلىعى سالاسى ماۋسىمدىق ءوسۋ فازاسىنا ەندى. جالپى ءونىم كولەمى قاڭتار-قىركۇيەك ايلارىمەن سالىستىرعاندا 5,4%-عا ارتىپتى. وسىمدىك شارۋاشىلىعىندا ءوسىم 6,7%-عا, مال شارۋاشىلىعىندا 3,4%-عا جەتكەن. بۇل باعىتتا جالپى ءونىمنىڭ ءوسۋى مەملەكەتتىك قولداۋ شارالارىمەن, اگروتەحنولوگيالاردى ساقتاۋمەن جانە ەگىن جيناۋ كەزىندەگى قولايلى اۋا-رايىمەن بايلانىستى بولىپ وتىر. بىرقاتار وڭىردە ءداندى داقىلداردىڭ ونىمدىلىگى ارتقان. ولاردىڭ ىشىندە اقمولا (+13,6%), قوستاناي (+14,9%) جانە پاۆلودار (+7,4%) وبلىستارى كوش باسىندا. سول سەكىلدى ءسۇت ءوندىرىسى 5,2%-عا, ەت ءوندىرىسى 2,8%-عا, جۇمىرتقا ءوندىرىسى 1,4%-عا وسكەن.
ناق قازىر قالىپتاسىپ وتىرعان احۋال تۋرالى ەكونوميكالىق زەرتتەۋلەر ينستيتۋتى ساۋدا جانە ينۆەستيتسيالىق ساياساتتى دامىتۋ ورتالىعىنىڭ ديرەكتورى باۋىرجان تۇرلىبەكوۆتان سۇرادىق.
– جىل باسىنان بەرى 10 ايدا ءجىو-ءنىڭ 6,4 پايىزعا وسكەنىن بايقاپ وتىرمىز. دەمەك, وسى رەسمي اقپاراتقا سۇيەنىپ, بىلتىرمەن سالىستىرعاندا ەكونوميكا قارقىندى دامىپ كەلەدى دەپ ايتا الامىز. تارقاتىپ ايتار بولساق, مىسالى, قۇرىلىس سالاسىندا 15 پايىزدان استام ءوسىمدى بايقادىق. مۇندا ۇلگى رەتىندە تۇركىستان وبلىسىندا ينفراقۇرىلىم, قۇرىلىس, جول سالۋ باعىتىنداعى ىسكە اسقان جۇمىستاردىڭ اۋقىمدى ەكەنىن ايتساق بولادى. سونىمەن قاتار, اۋىل شارۋاشىلىعى 5,4 پايىزعا وسكەن. قازىر ەگىن جيناۋ ناۋقانى اياقتالدى. بۇل رەتتە اقمولا, قوستاناي, پاۆلودار وبلىستارىندا اۋىل شارۋاشىلىعىنىڭ وسىمىنە ەڭ كوپ ۇلەس قوسقان وڭىرلەردىڭ ساناتىندا قالىپ وتىر,– دەيدى ساراپشى.
ساراپشى مىسال ەتكەن سالالاردان بولەك, ترانسپورت, تاسىمال جانە قويمامەن بايلانىستى قىزمەتتەر قارقىندى دامىپ جاتىر ەكەن. مۇنداعى ءوسىم 20,7 پايىزدى قۇراپتى. بۇل شىن مانىندە قۋانتارلىق جاعداي, سەبەبى بۇل ەكونوميكانىڭ ىشىندە ۇلەسى بيىك سالا. راسىمەن, قازىر ەل اۋماعى ارقىلى كوپتەگەن دالىزدەر وتەدى. ونىڭ ىشىندە ترانسپورتتىق دالىزدەرمەن قاتار, قۇبىر جەلىلەرى بار.
– ءيا, قازىر دالىزدەر ارقىلى تەك ەنەرگيا كوزدەرى عانا ەمەس, كونتەينەرلەر تاسىمالدانىپ جاتىر. بىلتىر 200 مىڭ كونتەينەر تاسىمالدانسا, بيىل دا مەجە سوعان جەتەعابىل بولادى ويلايمىز. 10 ايدا ترانسكاسپي ءدالىزى ارقىلى 4 ملن توننا تاۋار وتكەن. سونداي-اق تەمىرجول, اۆتوكولىك جولدارى جانە اقتاۋداعى تەڭىز كولىگى ارقىلى تاسىمال كولەمى 20 پايىزعا وسكەنىن بايقايمىز. بۇدان بولەك, كەن جانە مۇناي-گاز سالالارىدا ءوسىم 9,6 پايىزدى قۇراعانىن بايقادىق. وسى ستاتيستيكالاردىڭ بارلىعىن ەسكەرسەك, بيىل جىل سوڭىنا دەيىن وتە جاقسى ناتيجەگە جەتەمىز دەپ بولجاساق بولادى,– دەپ ءوزىنىڭ پايىمىن ايتتى ب. تۇرلىبەكوۆ.
ساۋدادا ءوسىم دەڭگەيى 9%-دى قۇراعان. ءوسۋ قارقىنى سالاداعى ۇلەسى 66,5% بولاتىن كوتەرمە ساۋدا كاسىپورىندارىندا بايقالىپ وتىر. اينالىم قاراجاتىنىڭ ۇلعايۋى پاۆلودار, اتىراۋ وبلىستارى مەن استانا قالاسىندا تىركەلگەن. قورىتساق, كەيىنگى جىلدارى ۇكىمەت باسىم سالالاردى قولداۋعا, ەكونوميكانى ارتاراپتاندىرۋعا جانە ينۆەستيتسيا تارتۋعا باسا نازار اۋدارىپ وتىر. وسىنىڭ ەسەسىنە, ەلىمىزدىڭ الەۋمەتتىك-ەكونوميكالىق جاعدايى بۇرىنعىدان دا جاقسارا ءتۇسۋى ءتيىس.
