فوتو: ۇكىمەتتىڭ ءباسپاسوز قىزمەتى
تالقىلانعان نەگىزگى جوبا – قوستاناي وبلىسى, رۋدنىي قالاسىندا SAF (Sustainable Aviation Fuel) اۆياوتىنىن وندىرەتىن زاۋىت سالۋ. LanzaJet كومپانياسى ءارتۇرلى شيكىزاتتان, سونىڭ ىشىندە ءدان, جۇگەرى جانە كارتوپ سياقتى ورگانيكالىق زاتتاردان الىنعان ەتانولدان ەكولوگيالىق تازا اۆياوتىن ءوندىرۋ تەحنولوگياسىن جاساپ شىعارعان. بولاشاق زاۋىتتىڭ جوبالىق قۋاتى جىلىنا 54 مىڭ توننا اۆياوتىن جانە 100 مىڭ توننا قايتا وڭدەلگەن بيوەتانول شىعارۋ كولەمىن قامتاماسىز ەتەدى. قازىرگى ۋاقىتتا زاۋىتتىڭ تەحنيكالىق-ەكونوميكالىق نەگىزدەمەسى دايىن.
جوبانىڭ جاسىل اۆياتسيانى دامىتۋ جانە اگروونەركاسىپتىك كەشەندە وڭدەۋدى تەرەڭدەتۋدى ماقسات ەتەدى. بيووتىن ءوندىرىسى پارنيكتىك گاز شىعارىندىلارىن ازايتۋعا ىقپال ەتىپ, قازاقستاننىڭ كليماتتىق جانە ەنەرگەتيكالىق ستراتەگياسىنا سايكەس جۇزەگە اسىرىلادى.
«مەملەكەت باسشىسى قاسىم-جومارت توقاەۆ قازاقستاندا حالىقارالىق اۋە حابىن قۇرۋ مىندەتىن قويدى. اۋەجايلاردىڭ الەۋەتىن كەڭەيتۋ جانە ينفراقۇرىلىم قۇرۋمەن قاتار, سالانى ساپالى ءارى ەكولوگيالىق تازا اۆياوتىنمەن قامتاماسىز ەتۋ ماسەلەسى ماڭىزدى. ءبىز ىنتىماقتاستىقتى نىعايتۋعا دايىنبىز. ۇكىمەت بۇل جوباعا جان-جاقتى قولداۋ كورسەتەدى», دەدى ولجاس بەكتەنوۆ.
كەزدەسۋگە قاتىسۋشىلار ەلىمىزدەگى تۇراقتى اۆياتسيالىق وتىن ءوندىرىسىنىڭ نەگىزگى باعىتتارىن تالقىلاپ, جوبانى بىرلەسىپ ىسكە اسىرۋ ءۇشىن ينتەگراتسيالانعان باسقارۋ قۇرىلىمىن قۇرۋ مۇمكىندىگىن قاراستىردى.
