وڭىرلىك كوممۋنيكاتسيالار قىزمەتى الاڭىندا جۋرناليستەرمەن جۇزدەسكەن الماتى قالاسى ەكولوگيا دەپارتامەنتىنىڭ باسشىسى دىنمۇحامەد لەسبەكوۆ اۋا ساپاسىن جاقتارتۋعا باعىتتالعان باستامالار جايلى مالىمدەدى.
ونىڭ ايتۋىنشا, قازىرگى ۋاقىتتا قالادا ءتورت نەگىزگى باعىت بويىنشا جۇمىس ءجۇرىپ جاتىر: جىلۋ ەلەكتر ورتالىقتارىن جاڭارتۋ, جەكە تۇرعىن ۇيلەردى گازبەن قامتۋ, كولىك شىعارىندىلارىن ازايتۋ جانە اۋانىڭ ساپاسىن اۆتوماتتى باقىلاۋ جۇيەسىن ەنگىزۋ.
«ەكولوگيالىق جاعدايدى جاقسارتۋ – ءبىزدىڭ باستى ماقساتىمىز. بۇل باعىتتاعى شارالار قالا تۇرعىندارىنىڭ ءومىر ساپاسىنا تىكەلەي اسەر ەتەدى», – دەيدى مامان.
قالانىڭ ەنەرگەتيكالىق ينفراقۇرىلىمىن جاڭارتۋ ەكولوگيالىق جاعدايعا تىكەلەي ىقپال ەتەتىنى بەلگىلى. 2017 جىلى جەو-1 تولىق گازعا اۋىستىرىلعان بولاتىن, بۇگىندە جەو-2-دە كەڭ كولەمدى جاڭعىرتۋ جۇمىستارى ءجۇرىپ جاتىر. 2022–2026 جىلدارعا ارنالعان جوبا اياقتالعان سوڭ, جىل سايىنعى زياندى شىعارىندىلار كولەمى 37,1 مىڭ توننادان 2,7 مىڭ تونناعا دەيىن قىسقارماق.
جاۋاپتىلاردىڭ سوزىنە سەنسەك, گازداندىرۋ دەڭگەيى – 99,4 پايىزعا ورىندالعان. قالالىق گاز جەلىلەرىنىڭ ۇزىندىعى 6 مىڭ شاقىرىمنان اسادى, سوڭعى جىلدارى تاعى 24 شاقىرىم جاڭا جەلى تارتىلعان.
الماتىدا 706 مىڭنان استام كولىك تىركەلگەن. بۇدان بولەك, كۇن سايىن قالاعا شامامەن 400 مىڭعا جۋىق سىرتتان كەلگەن كولىكتەر قاتىنايدى. بۇل اۋا ساپاسىنا ەلەۋلى اسەر ەتەدى.
قالاداعى 19 ەكولوگيالىق بەكەتتە پوليتسيا جانە ەكولوگيا قىزمەتكەرلەرى بىرلەسىپ تەكسەرىس جۇرگىزەدى. بيىلعى 9 ايدا 18 مىڭنان استام قۇقىق بۇزۋشىلىق انىقتالىپ, جالپى سوماسى 355 ميلليون تەڭگەدەن استام ايىپپۇل سالىنعان.
- كەي كولىكتەر ءالى دە اۋانى لاستاپ جاتىر. مۇنداي جاعدايدى بولدىرماۋ ءۇشىن كولىك يەلەرى تەحنيكالىق قىزمەتكە دەر كەزىندە جۇگىنگەنى ءجون. تازا اۋا – ءبارىمىزدىڭ ورتاق جاۋاپكەرشىلىگىمىز.
اۋانى قورعاۋدىڭ جاڭا ەرەجەلەرى ازىرلەنىپ جاتىر. قۇجاتتا شىعارىندىلاردى باقىلاۋ, زياندى زاتتاردىڭ مولشەرىن ازايتۋ, تومەن لاستانۋ ايماقتارىن قۇرۋ جانە اۋا ساپاسىن ۇزدىكسىز قاداعالاۋ قاراستىرىلعان,- دەيدى د. لەسبەكوۆ.
