كاسىپورىن وڭىردەگى قۇرىلىس كومپانيالارى مەن جەرگىلىكتى تۇرعىنداردى ساپالى, ەكولوگيالىق تازا جانە باسەكەگە قابىلەتتى وتاندىق قۇرىلىس ماتەريالدارىمەن قامتاماسىز ەتۋگە باعىتتالعان. جوبانىڭ جالپى قۇنى – 2 ملرد تەڭگە. زاۋىتتىڭ جىلدىق قۋاتتىلىعى – 6 ميلليون دانا كەراميكالىق كىرپىش.
بورودۋليحا اۋدانىنىڭ نوۆوپوكروۆكا اۋىلىندا ورنالاسقان جاڭا ءوندىرىس ورنىنىڭ اشىلۋ راسىمىنە قاتىسقان وبلىس اكىمى بەرىك ءۋالي جاڭا زاۋىت ايماق ەكونوميكاسىنا تىڭ سەرپىن بەرەتىنىن ايتتى.
«بۇگىن ءبىز ءوڭىرىمىزدىڭ وندىرىستىك كەلبەتىنىڭ جاڭا تاراۋىن اشقالى وتىرمىز. مەملەكەت باسشىسى قاسىم-جومارت توقاەۆ بيىلعى قازاقستان حالقىنا جولداۋىندا «قازىر ەل ەكونوميكاسىندا رەفورمالار جۇرگىزىلىپ جاتىر. ينفراقۇرىلىمعا جانە جاڭا ءوندىرىس ورىندارىن اشۋعا قوماقتى ينۆەستيتسيا سالىنىپ جاتىر. مۇنىڭ ءبارى حالىقتىڭ ءال-اۋقاتىن جانە ەلىمىزدىڭ الەۋەتىن ارتتىرۋ ءۇشىن جاسالىپ جاتقانى ايدان انىق» دەپ ءوندىرىستى دامىتۋدىڭ ماقساتىن, ينۆەستيتسيا تارتۋدىڭ ماڭىزىن ايقىنداپ بەرگەن بولاتىن. بۇگىن ءوندىرىسى ىسكە قوسىلىپ, ءوڭىر تۇرعىندارىنىڭ قاجەتتىلىگىنە قىزمەت ەتكەلى وتىرعان بۇل كاسىپورىن جىلىنا شامامەن 6 ملن. دانا كىرپىش وندىرمەكشى. بۇل وبلىس جانە اۋدان تۇرعىندارىنىڭ قۇرىلىس ماتەريالدارىنا تاپشىلىعىن ازايتىپ, ءوڭىر ەكونوميكاسىنا سەپتىگىن تيگىزەدى دەپ ويلايمىن. اۋدان ەكونوميكاسىنا ۇلكەن قولداۋىن كورسەتىپ, وسىنداي اۋقىمدى جوبانى جۇزەگە اسىرىپ جاتقان جەكە ينۆەستور قايىرلى حاسەنوۆكە العىس ايتامىن. قازىردىڭ وزىندە 65 ادام جۇمىس ىستەپ جاتىر ەكەن. ەلۋ ادام تۇراقتى جۇمىسپەن قامتىلادى. بۇل – اۋدان حالقى ءۇشىن ۇلكەن كومەك. بيىلعى مامىر ايىندا وبلىستىڭ دامۋ جوسپارىن جاريالاعان بولاتىنبىز. وسى جوسپارعا سايكەس سەمەي قالاسىندا جاڭا ىقشام اۋدان قۇرۋدى قولعا الدىق. مۇندا كوپتەگەن جاڭا قۇرىلىس نىساندارى سالىناتىن بولادى. كىرپىش زاۋىتى قۇرىلىس ماتەريالدارىن دايىنداۋعا ۇلكەن سەپتىگىن تيگىزەدى. سوندىقتان بۇگىن جۇمىسىن باستاعالى وتىرعان وندىرىسكە ساتتىلىك تىلەيمىن», – دەدى ايماق باسشىسى.
اتالعان «شىڭعىس تاس» جشس-نىڭ باسشىسى قايىرلى حاسەنوۆتىڭ ايتۋىنشا, زاۋىتتىڭ تەحنولوگيالىق پروتسەسى تولىق اۆتوماتتاندىرىلعان جانە ەنەرگيا تيىمدىلىگى مەن تابيعي رەسۋرستاردى ۇتىمدى پايدالانۋ قاعيداتتارىنا نەگىزدەلگەن. ءوندىرىس تسيكلى ساز بالشىقتى وندىرۋدەن باستاپ, ونى كەپتىرۋ مەن كۇيدىرۋگە دەيىنگى بارلىق كەزەڭدەردى قامتيدى. ءونىم ساپاسى ۇلتتىق ستاندارتتارعا ساي جوعارى بەرىكتىك پەن ايازعا توزىمدىلىككە يە.
«جۇمىسىمىزدى قارقىندى تۇردە باستاپ كەتتىك. ءبىر ميلليون دانادان استام كىرپىشتى شىعارىپ قويدىق. قازىر بىرقاتار كومپانيالارمەن كوپ قاباتتى تۇرعىن ۇيلەر مەن مادەنيەت ۇيلەرىن سالۋ جونىندە كەلىسسوز جۇرگىزىلىپ جاتىر. شىعىس قازاقستان وبلىسىنان دا ءبىزدىڭ ونىمدەرىمىزگە سۇرانىس بار», دەيدى كاسىپكەر.
جوبا 2024 جىلعى ءساۋىر ايىندا باستالىپ, 2025 جىلعى قازان ايىندا تولىق اياقتالعان. نىساندا بارلىق قۇرىلىس-مونتاجداۋ جانە ىسكە قوسۋ جۇمىستارى جۇرگىزىلىپ, جابدىقتار سىناقتان وتكەن.
بيىل وبلىسىمىزدا جالپى قۇنى 7,3 ميلليارد تەڭگە بولاتىن التى ينۆەستيتسيالىق جوبا جۇزەگە اسىرىلىپ, ناتيجەسىندە 100-دەن استام جاڭا جۇمىس ورنى قۇرىلدى. جىل سوڭىنا دەيىن قۇنى 18,6 ميلليارد تەڭگە بولاتىن سەگىز جوبانى ىسكە اسىرۋ جوسپارلانىپ وتىر. بۇل جوبالار اياسىندا قوسىمشا 271 جاڭا جۇمىس ورنى اشىلاتىن بولادى.
اباي وبلىسى,
بورودۋليحا اۋدانى
