ءىس-شاراعا تۋريزم جانە سپورت ءمينيسترى ەربول مىرزابوسىنوۆ, ۇلتتىق سۋردليمپيادا كوميتەتىنىڭ پرەزيدەنتى سەرىك ساپيەۆ قاتىستى.
ءراسىم بارىسىندا مينيستر قازاقستاننىڭ مەملەكەتتىك تۋىن ۇلتتىق قۇراما كومانداسىنا سالتاناتتى تۇردە تابىس ەتىپ, سپورتشىلارعا ساتتىلىك پەن جارقىن جەڭىستەر تىلەدى.
«جازعى سۋردليمپيادا ويىندارى — ەلدىڭ سپورتتىق الەۋەتىن كورسەتەتىن ماڭىزدى الاڭ. سىزدەردىڭ ەرىك-جىگەرلەرىڭىز بەن قايسار مىنەزدەرىڭىز ادام مۇمكىندىگىنىڭ شەكسىز ەكەنىن دالەلدەيدى. ميلليونداعان ادامدار سىزدەردىڭ تاباندىلىقتارىڭىزدان شابىت الىپ, ءومىر سىناقتارىن ەڭسەرۋدى ۇيرەنەدى. بۇگىن تابىستالاتىن تۋ — ەل بىرلىگى مەن جەڭىستىڭ سيمۆولى. سىزدەردىڭ حالىقارالىق ارەنادا ەلىمىزدىڭ ابىرويىن اسقاقتاتىپ, كوك بايراعىمىزدى بيىكتە جەلبىرەتەتىنىڭىزگە سەنىمدىمىن», – دەدى ەربول مىرزابوسىنوۆ.
مينيستر ءوز سوزىندە ەلىمىزدە سپورتشىلاردىڭ ساپالى دايىندالۋى ءۇشىن بارلىق جاعداي جاسالىپ جاتقانىن دا اتاپ ءوتتى.
«بۇگىندە ەلىمىزدە سپورتشىلاردىڭ ساپالى دايىندالۋى ءۇشىن بارلىق مۇمكىندىك جاسالعان. 2029 جىلعا دەيىن 113 جاڭا سپورت نىسانىن سالۋ جانە 26 نىساندى جاڭعىرتۋ جوسپارلانىپ وتىر. الماتى وبلىسىنداعى وليمپيادالىق دايىندىقتىڭ زاماناۋي بازاسىندا 2 300 سپورتشى ءبىر مەزەتتە جاتتىعا الادى. سونىمەن قاتار, وڭىرلەردە «100 جىلدام سالىناتىن سپورت نىسانى» جوباسى تابىستى ىسكە اسۋدا – سوڭعى ءبىر جىلدا 25 جاڭا كەشەن پايدالانۋعا بەرىلدى. ەلوردادا سالىنىپ جاتقان ۇلتتىق سپورت ۋنيۆەرسيتەتى بولاشاقتا سپورت سالاسىنداعى كادرلاردى ۇزدىكسىز دايارلاۋ جۇيەسىن قالىپتاستىرۋعا مۇمكىندىك بەرەدى», – دەدى مينيستر.
تۋدى تابىس ەتۋ قۇرمەتى سۋردو دزيۋدودان قازاقستان رەسپۋبليكاسىنىڭ سپورت شەبەرلەرى, XXIV جازعى سۋردليمپيادا ويىندارىنىڭ جۇلدەگەرلەرى ايدوس تۇگەلباەۆ پەن اننا كراموروۆاعا بۇيىردى.
«بۇگىن – مەن ءۇشىن ەرەكشە كۇن. سۋردليمپيادادا قازاقستاننىڭ كوك تۋىن الىپ شىعۋ – ۇلكەن جاۋاپكەرشىلىك ءارى زور مارتەبە. بۇل – ءار سپورتشىنىڭ ارمانى. ءبىز ەل نامىسىن قورعاپ, جەڭىس ءۇشىن بار كۇشىمىزدى سالامىز», – دەدى ايدوس تۇگەلباەۆ.
ايتا كەتسەك, XXV جازعى سۋردليمپيادا ويىندارى 15–26 قاراشا ارالىعىندا جاپونيانىڭ استاناسى توكيو قالاسىندا وتەدى. بايراقتى دودادا 80 ەلدەن شامامەن 3 000 سپورتشى 21 سپورت تۇرىنەن باق سىناپ, 223 مەدال جيىنتىعى ساراپقا سالىنادى. قازاقستاننان 78 سپورتشى 8 سپورت تۇرىنەن قاتىسادى: جەڭىل اتلەتيكا, ەركىن جانە گرەك-ريم كۇرەسى, بادمينتون, ۇستەل تەننيسى, ءجۇزۋ, دزيۋدو جانە تاەكۆوندو.
