جۇمىسقا ورنالاستىرىلعانداردىڭ ەڭ كوبى – تۇركىستان وبلىسىندا. وندا – 6 مىڭ جاس, قىزىلوردادا – 2 300, جامبىل وبلىسىندا – 1 700, اقتوبەدە – 1 500, شىمكەنتتە 1 300 ازامات «ەكى قولعا – ءبىر كۇرەك» تاپتى. ايتا كەتەرلىگى, ەڭبەككە ارالاسقانداردىڭ شامامەن 60%-ى – اۋىل تۇرعىندارى.
جاستار پراكتيكاسىندا ەڭ كوپ سۇرانىسقا يە ماماندىقتار – جالپى ءبىلىم بەرەتىن مەكتەپ مۇعالىمدەرى مەن مەكتەپكە دەيىنگى تاربيەشىلەر, مەديتسينا قىزمەتكەرلەرى, باعدارلاماشى جانە زاڭگەر.
– بيىل مەن باتىس قازاقستان جوعارى مەديتسينالىق كوللەدجىن «ەمدەۋ ءىسى» ماماندىعى بويىنشا ءتامامدادىم. وقۋدى اياقتاعان سوڭ بىردەن مانساپ ورتالىعىنا بارىپ, جۇمىسسىز رەتىندە تىركەلدىم. سول جەردە ماعان جاستار پراكتيكاسى باعدارلاماسى تۋرالى اقپارات بەرىلدى. شامامەن ون كۇننەن كەيىن مەنى قاراتوبە اۋداندىق اۋرۋحاناسىنا تاجىريبەدەن وتۋگە جىبەردى. ال 3 قىركۇيەكتەن باستاپ سول مەكەمەگە تۇراقتى جۇمىسقا قابىلداندىم, – دەيدى ورال قالاسىنىڭ تۇرعىنى ەلمار تەمىر.
باستامانىڭ يگىلىگىن كورگەن تاعى ءبىر جاس – ماليكا مۇساجودجاەۆا. ول شىمكەنت پوليتەحنيكالىق كوللەدجىندە «توقۋشى-وپەراتور» ماماندىعىن وقىعان. وسى جىلى ديپلومىن الىپ, جاستار پراكتيكاسىنىڭ كومەگىمەن كىلەم فابريكاسىنا جۇمىسقا ورنالاسقان.
– فابريكادا تاڭبالاۋ وپەراتورى بولىپ ەڭبەك ەتەمىن. ارينە, كەز كەلگەن جاستى وقۋىن اياقتاعان سوڭ, «تاجىريبەسىز قايدا جۇمىسقا ورنالاسامىن؟» دەگەن سۇراق مازالايتىنى انىق. سالدارىنان كوپشىلىگى مۇلدەم باسقا سالاعا كەتەدى. مەنىڭ جولىم بولىپ, باعدارلاما ارقىلى تاجىريبە جيناقتاپ, ەڭبەككە ارالاسىپ جاتىرمىن. باعدارلاما مەرزىمى اياقتالعان سوڭ, وسىندا تۇراقتى جۇمىسقا قالىپ, كاسىبي تۇرعىدان وسكىم كەلەدى. ونىڭ ۇستىنە ۇجىمدا ءوزىم سەكىلدى جاستار كوپ, – دەيدى م.مۇساجودجاەۆا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلى انار بيجانوۆانىڭ ايتۋىنشا, جۇمىسقا قابىلدانعان جاستارعا تاجىريبە جيناۋعا كومەكتەسەتىن ارنايى تالىمگەرلەر بەكىتىلەدى.
– جاستار پراكتيكاسى ماماندىعى بويىنشا باستاپقى جۇمىس تاجىريبەسىن الۋ ماقساتىندا ءبىلىم بەرۋ ۇيىمدارىنىڭ تۇلەكتەرىنە ارنالعان. وعان وقۋىن اياقتاعاننان كەيىن 5 جىل ىشىندە 35 جاستان اسپاعان جۇمىسسىز رەتىندە تىركەلگەندەر جىبەرىلەدى. ۇزاقتىعى 12 ايدان اسپايدى. قازىر اي سايىنعى ەڭبەكاقى – ورتا ەسەپپەن 118 مىڭ تەڭگە. قارجىلاندىرۋدى ەڭبەك موبيلدىلىگى ورتالىعى «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى جۇزەگە اسىرادى. تولەم ەكىنشى دەڭگەيدەگى بانكتەردە اشىلعان قاتىسۋشىلاردىڭ شوتتارىنا قاراجاتتى اۋدارۋ جولىمەن جۇمىس بەرۋشى ۇسىنعان مالىمەتتەر نەگىزىندە جۇرگىزىلەدى. جولداما الۋ ءۇشىن تۇرعىلىقتى جەرى بويىنشا مانساپ ورتالىعىنا جۇگىنۋ قاجەت, – دەيدى مينيسترلىك وكىلى.
جاستار پراكتيكاسىنىڭ ەندىگى جوسپارى – 12 مىڭداي جاستىڭ جۇمىسقا ورنالاسۋىنا جاردەمدەسۋ.
