سۋرەتتى تۇسىرگەن – جەڭىس ىسقاباي
وبلىس اۋماعىندا 35 سپورت مەكەمەسى جۇمىس ىستەيدى. سونىڭ ىشىندە بالالار مەن جاسوسپىرىمدەرگە ارنالعان 23 سپورت مەكتەبىندە 57 سپورت تۇرىمەن 21 مىڭنان استام سپورتشى جاتتىعادى. وڭىردە 59 اككرەديتتەلگەن سپورت فەدەراتسياسى قىزمەت اتقارادى. بيىل جان باسىنا شاققان سپورتتىق تاپسىرىس ارقىلى 160 سەكتسيا اشىلىپ, وندا 6 183 بالا تۇراقتى تۇردە سپورتپەن اينالىسىپ ءجۇر. دەنەشىنىقتىرۋ مەن سپورتتى جۇيەلى تۇردە سەرىك ەتكەن تۇرعىنداردىڭ سانى بۇگىندە 292 مىڭنان استى, بۇل وبلىس حالقىنىڭ 42 پايىزىن قۇرايدى.
وڭىردە سپورتتىق ينفراقۇرىلىمدى ودان ءارى دامىتۋ جوسپارى ايقىن. اتاپ ايتقاندا, 8 جاڭا سپورت نىسانىنىڭ قۇرىلىسىنا قارجى ءبولىنىپ, ونىڭ بىرەۋى قازىردىڭ وزىندە پايدالانۋعا بەرىلدى, قالعان 7 نىسان جىل سوڭىنا دەيىن تولىق اياقتالادى. 5 فۋتبول الاڭىنىڭ قۇرىلىسى قولعا الىنىپ, كەربۇلاق, پانفيلوۆ, سارقان اۋداندارىنداعى 3 نىسان سپورتسۇيەر قاۋىمنىڭ يگىلىگىنە بەرىلدى. قاراتال اۋدانىنىڭ كالپە اۋىلىندا كاسىپكەردىڭ قولداۋىمەن زاماناۋي ۇستەل تەننيسى كەشەنى اشىلدى.
– سپورتتى جاپپاي ناسيحاتتاۋ مەن سالاماتتى ءومىر سالتىن قالىپتاستىرۋ باعىتىندا وڭىردە اۋقىمدى ءىس-شارالار وتكىزىلىپ كەلەدى. جىل باسىنان بەرى 4 600-دەن استام بۇقارالىق سپورتتىق شارا ۇيىمداستىرىلىپ, وعان 108 مىڭنان استام ادام قاتىستى. جەتىسۋ سپورتشىلارىنىڭ جەتىستىكتەرى دە قۋانتادى. وسى جىلى وبلىس سپورتشىلارى ءتۇرلى دەڭگەيدەگى جارىستاردا 1 046 مەدال جەڭىپ الدى. ونىڭ ىشىندە 387-ءسى – التىن, 319-ى – كۇمىس, 340-ى – قولا. سونداي-اق 9 سپورتشى حالىقارالىق دارەجەدەگى سپورت شەبەرى اتانىپ, 57 سپورتشى سپورت شەبەرى ءنورماتيۆىن ورىندادى, – دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇلوۆ.
جاڭا نىسانداردىڭ سالىنۋى, سپورتتىق سەكتسيالاردىڭ كوبەيۋى, بۇقارالىق سپورتتىڭ كەڭ قانات جايۋى – ءوڭىردىڭ سالاماتتى قوعام قۇرۋ جولىنداعى تاباندى ەڭبەگىنىڭ ايعاعى. تالدىقورعان قالاسىندا 1,8 ملن دوللارعا سپورت كەشەنى سالىنىپ جاتىر. نىساندا كوركەم گيمناستيكا, ۆولەيبول, باسكەتبول سپورتىمەن اينالىساتىن جاتتىعۋ زالدارى بار. قۇرىلىس-مونتاج جۇمىستارىنا 977,3 ملن تەڭگە, تەحنيكالىق قاداعالاۋعا 23,3 ملن تەڭگە, اۆتورلىق قاداعالاۋعا 4,5 ملن تەڭگە قاراجات جۇمسالادى. بۇعان قوسا, وڭىردە 8 سپورت نىسانىندا قۇرىلىس جۇمىسى ءجۇرىپ جاتىر.
جاڭا نىسانداردىڭ ىشىندە ەرەكشە كوزگە تۇسەتىنى – تالدىقورعان قالاسىنداعى ەلىمىزدە تەڭدەسى جوق زاماناۋي ۆولەيبول ورتالىعى. مۇندا «جەتىسۋ» كاسىبي ۆولەيبول كلۋبىنىڭ ەرلەر, ايەلدەر, جاستار كوماندالارى جاتتىعادى.
ينۆەستورلار قارجىسىنا سالىنعان ۇستەل تەننيسى ورتالىعى دا حالىقارالىق ستاندارتتارعا ساي جابدىقتالعان, ەرەكشە قاجەتتىلىگى بار سپورتشىلارعا بارلىق جاعداي جاسالعان. تەكەلى قالاسىندا اشىلعان دەنەشىنىقتىرۋ-ساۋىقتىرۋ كەشەنى بۇگىندە قالا تۇرعىندارىنىڭ ماقتانىشىنا اينالىپ وتىر. مۇندا اۋىر اتلەتيكا, بوكس, باسكەتبول, دزيۋدو, ساداق اتۋ, كاراتە سياقتى سپورت تۇرلەرىنەن 500-دەن استام جاس سپورتشى دايىندالادى.
بيىل دا وبلىستا سپورت نىساندارىن سالۋعا ايرىقشا نازار اۋدارىلدى. الاكول اۋدانىنداعى لەپسى اۋىلىندا 160 ورىندىق سپورتتىق كەشەن مەن جاتاقحانانىڭ, قابانباي اۋىلىندا 80 ورىندىق سپورت كەشەنىنىڭ قۇرىلىسى ءجۇرىپ جاتىر. الداعى ۋاقىتتا كەربۇلاق, كوكسۋ, قاراتال اۋداندارىنىڭ بىرنەشە اۋىلىندا دا وسىنداي سپورت كەشەندەرىن سالۋ جوسپارلانعان.
بالالار مەن جاسوسپىرىمدەر سپورتى – ءوڭىر ساياساتىنىڭ باستى باعىتى. كەيىنگى ءۇش جىلدا وبلىستا بوكس پەن دزيۋدودان وليمپيادالىق رەزەرۆ مەكتەپتەرى, جوعارى سپورت شەبەرلىگى مەكتەپتەرى, «جەتىسۋ» ۆولەيبول, حوككەي, ۇلتتىق سپورت تۇرلەرى كلۋبتارى اشىلدى. قىسقى سپورت تۇرلەرىن دامىتۋ ماقساتىندا تالدىقورعاندا كەرلينگ, شورت-ترەك, شايبالى حوككەي سەكتسيالارى جۇمىسىن باستادى. سونىمەن قاتار وبلىس اكىمىنىڭ باستاماسىمەن العاش رەت اۋلا, مەكتەپ كوماندالارى اراسىندا فۋتبول, ۆولەيبول, باسكەتبولدان وبلىستىق بالالار ءتۋرنيرى وتكىزىلدى. وعان 560-تان استام كوماندا قاتىستى. بۇل شارا داستۇرگە اينالادى. جەتىسۋداعى جۇيەلى جۇمىس ءوڭىر حالقىنىڭ سپورتقا دەگەن قىزىعۋشىلىعىن ارتتىرىپ, سالاماتتى ءومىر سالتىن قالىپتاستىرۋعا تىڭ سەرپىن بەرىپ وتىر.
جەتىسۋ وبلىسى
