مەملەكەت باسشىسى قاسىم-جومارت توقاەۆ ءوز سوزىندە «ادىلەتتى قوعامدى قۇرۋ ءۇشىن, ەڭ الدىمەن, وسكەلەڭ ۇرپاقتىڭ جان-جاقتى, تولىققاندى دامۋىن قامتاماسىز ەتۋ ماڭىزدى. سوندىقتان مەكتەپتەردەگى ءبىلىم بەرۋ ءىسى بالالاردىڭ الەۋمەتتىك جاعدايىنا قاراماستان, ينكليۋزيۆتى ءارى بارلىق بالا ءۇشىن قولجەتىمدى بولۋعا ءتيىس», دەگەن ەدى. بۇل رەتتە «Amanat» پارتياسى ايەلدەر قاناتىنىڭ باستاماسىمەن «كەدەرگىسىز كەلەشەك» جوباسى اياسىندا وقۋ-اعارتۋ مينيسترلىگى, قازاقستاننىڭ بوچچا فەدەراتسياسى, ۇلتتىق عىلىمي-پراكتيكالىق دەنە تاربيەسى ورتالىعى, سپورتتى دامىتۋ ديرەكتسياسى جانە استانا قالاسى اكىمدىگىمەن بىرلەسىپ, «تەڭ مۇمكىندىكتەر» فەستيۆالى ۇيىمداستىرىلدى.
ماقسات – ەرەكشە بالالاردى قوعام ومىرىنە بەيىمدەۋ, ولاردىڭ سپورت ارقىلى الەۋەتىن اشۋ جانە ينكليۋزيۆتى ورتا قۇرۋعا ىقپال ەتۋ. جيىندى اشقان «Amanat» پارتياسىنىڭ اتقارۋشى حاتشىسى داۋلەت كارىبەك بۇل فەستيۆال قايىرىمدىلىق پەن باۋىرمالدىق توعىسقان بىرەگەي الاڭعا اينالىپ وتىرعانىن اتاپ ءوتتى.
– پرەزيدەنت قاسىم-جومارت توقاەۆ ينكليۋزيۆتى سپورتقا ەرەكشە ءمان بەرىپ كەلەدى. مەملەكەت باسشىسىنىڭ تىكەلەي تاپسىرماسىمەن وسى باعىتتا جۇيەلى جۇمىس جۇرگىزىلىپ جاتىر. بيىل ەكىنشى مارتە ءوتىپ جاتقان «تەڭ مۇمكىندىكتەر» فەستيۆالى – سونىڭ ايقىن دالەلى. ىرىكتەۋ كەزەڭىنە 2 مىڭنان اسا ۇمىتكەر قاتىسىپ, ۇزدىكتەر انىقتالدى. قاتىسۋشىلاردىڭ بارلىعى بولاشاقتا ۇلكەن جەتىستىككە جەتىپ, حالىقارالىق ارەنادا بەدەلدى سپورتتىق ماراپاتتارعا يە بولادى دەپ سەنەمىن, – دەدى د.كارىبەك.
فەستيۆالعا پارتيانىڭ ايەلدەر قاناتىنىڭ توراعاسى شولپان كارينوۆا, ءماجىلىس دەپۋتاتتارى, «Amanat» پارتياسى فراكتسياسىنىڭ مۇشەلەرى ەرلان ابديەۆ پەن ناتاليا دەمەنتەۆا, وقۋ-اعارتۋ مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ ديرەكتورى ارمان تاشمەتوۆ, وليمپيادا چەمپيونى دميتري بالاندين, سونداي-اق قوعامدىق ۇيىم وكىلدەرى, سپورت قايراتكەرلەرى, ۇستازدار مەن اتا-انالار قاتىستى.
شولپان كارينوۆا ەرەكشە قاجەتتىلىگى بار بالالاردىڭ جىگەرىن جانيتىن, رۋحىن كوتەرەتىن وسىنداي يگى ءىس-شارالاردى ۇيىمداستىرۋ اسا ماڭىزدى ەكەنىن ايتتى.
– ەلىمىزدىڭ ءار ازاماتى ءۇشىن كەدەرگىسىز ورتا قۇرۋ – پارتيانىڭ سايلاۋالدى باعدارلاماسىنداعى باسىم باعىتتاردىڭ ءبىرى. تەڭ مۇمكىندىك – بارشامىزعا ورتاق قۇندىلىق. پارتيامىزدىڭ باستاماسىمەن ءوتىپ جاتقان بۇل فەستيۆال ەرەكشە قاجەتتىلىگى بار بالالاردىڭ ءوز كۇشىنە سەنۋىنە, جاڭا ورتا قالىپتاستىرۋىنا جانە قوعامعا بەيىمدەلۋىنە جول اشادى, – دەدى ش.كارينوۆا.
ينكليۋزيا ماسەلەسىن ءجيى كوتەرىپ جۇرگەن ەرلان ابديەۆ ەرەكشە بالالاردىڭ ەرىك-جىگەرى, تاباندىلىعى مەن ومىرگە دەگەن قۇشتارلىعى بارىمىزگە ۇلگى بولۋعا ءتيىس دەيدى.
– ينكليۋزيا – تەك مەملەكەتتىك باعدارلاما نەمەسە الەۋمەتتىك ساياسات ەمەس, بۇل – كۇندەلىكتى قارىم-قاتىناستىڭ مادەنيەتى, قوعامنىڭ رۋحاني دەڭگەيى مەن ازاماتتىق جاۋاپكەرشىلىگىنىڭ ايناسى. ءبىز ماجىلىستە ەرەكشە قاجەتتىلىگى بار ازاماتتاردىڭ قۇقىعىن قورعاۋ, الەۋمەتتىك جانە ينفراقۇرىلىمدىق قولداۋدى كۇشەيتۋ باعىتىندا ۇنەمى باستاما كوتەرىپ ءجۇرمىز. بىراق ەڭ ماڭىزدىسى – قوعامنىڭ سانا-سەزىمى مەن كوزقاراسىنىڭ وزگەرۋى. مىنە, ءدال وسىنداي يگى ءىس-شارالار سول وزگەرىستىڭ باستاۋى, – دەدى ماجىلىسمەن.
فەستيۆال قورىتىندىسىندا جەڭىمپازدار مەن جۇلدەگەرلەرگە كۋبوكتەر مەن ارنايى سىيلىقتار تابىستالدى.پارتيانىڭ «حالىقپەن بىرگە!» سايلاۋالدى باعدارلاماسىن جۇزەگە اسىرۋ اياسىندا ەلىمىزدە ەرەكشە ءبىلىم بەرۋدى قاجەت ەتەتىن 16,9 مىڭ بالانى قامتيتىن 1,8 مىڭ ينكليۋزيا كابينەتى جانە 5,5 مىڭ بالانى قامتيتىن 688 بەيىمدەلگەن سپورت سەكتسياسى جۇمىس ىستەيدى.
سونىمەن قاتار ماجىلىستەگى پارتيا فراكتسياسىنىڭ دەپۋتاتتارى باستاماسىمەن تۇرعىن ءۇي زاڭناماسىنا I جانە II توپتاعى مۇگەدەكتىگى بار ازاماتتارعا, مۇگەدەك بالالارى بار وتباسىلارعا باسپانانى ءبىرىنشى كەزەكتە الۋ قۇقىعىن بەكىتەتىن نورمالار ەنگىزىلدى. سونداي-اق جوعارى وقۋ ورىندارىنا مۇمكىندىگى شەكتەۋلى ازاماتتاردى قابىلداۋ كۆوتاسى 1 پايىزدان 2 پايىزعا دەيىن ۇلعايتىلدى.
