بۇل باستاما اياسىندا بۇكىل ەلدىڭ پەداگوگتەرى ءوز پاندەرى بويىنشا قىسقا, تانىمدىق بەينەفورماتتا بىلىمدەرىمەن بولىسە الادى.
باستامانىڭ ءداستۇرلى سەرىكتەستەرى – قر وقۋ-اعارتۋ مينيسترلىگى مەن قر عىلىم جانە جوعارى ءبىلىم مينيسترلىگى. مينيسترلىكتەردىڭ قولداۋى پلاتفورمانىڭ كەڭ اۋديتوريا اراسىندا ءبىلىمدى ناسيحاتتاۋداعى ماڭىزىن اتاپ كورسەتىپ, TikTok-تاعى ۇستازدار قاۋىمداستىعىنىڭ دامۋىنا ۇلەس قوسىپ كەلەدى.
ءتورت جىل ىشىندە بايقاۋ ارقاسىندا قازاقستاندا مەكتەپ مۇعالىمدەرىن, كوللەدج وقىتۋشىلارىن جانە جوعارى وقۋ ورىندارىنىڭ پروفەسسورلىق-وقىتۋشىلىق قۇرامىن بىرىكتىرگەن ءبىلىم بەرۋ كونتەنتىن جاسايتىن مىقتى قاۋىمداستىق قالىپتاستى. جالپى بەينەروليكتەر سانى 90 مىڭنان استى.
بۇرىنعى جەڭىمپازدار – بوتاگوز وماروۆا, حايدار مىرزاحمەتوۆ, بايبولات سەيداحان, ەۆگەني سولونيتسىن – ءوز مىسالىندا قىسقا تانىمدىق ۆيدەولاردىڭ قىزىقتى ءارى ميلليونداعان قارالىم جيناي الاتىنىن دالەلدەدى.
- بۇل بايقاۋ مۇعالىمنىڭ ىقپالى سىنىپ شەڭبەرىنەن الدەقايدا كەڭ ەكەنىن كورسەتتى. TikTok-تا جاس تا, قاشىقتىق تا ماڭىزدى ەمەس – ءوزىن كورسەتە الاتىن كەز كەلگەن ادامعا مۇمكىندىك بار. مەن اۋىلدا تۇرسام دا, بۇل پلاتفورما مەنى ءوڭىر توڭىرەگىنەن شىعاردى. ءوز تاجىريبەڭ مەن بىلىمىڭمەن ونلاين بولىسكەندە, سەن تەك ۇيرەتىپ قانا قويمايسىڭ – اتا-انالارعا, وقۋشىلارعا جانە ارىپتەستەرگە ءوز ءپانى مەن ماماندىعىنا جاڭا كوزقاراسپەن قاراۋعا كومەكتەسەسىڭ. ءار مۇعالىمنىڭ TikTok-تا باسقالاردى شابىتتاندىرا الاتىن ءوز تاريحى بار دەپ سەنەمىن, - دەيدى الاكول وبلىسى دوستىق اۋىلىنداعى ورىس ءتىلى مەن ادەبيەتى ءپانىنىڭ مۇعالىمى بوتاگوز وماروۆا.
بوتاگوز وماروۆا 2023 جىلى «قازاقستان مۇعالىمدەرى» بايقاۋىنىڭ جەڭىمپازى اتانعان, ال بيىل ول Discover List TikTok – كونتەنت اۆتورلارىنىڭ جاھاندىق تىزىمىنە ەنگەن العاشقى قازاقستاندىق ۇستاز بولدى.
بايقاۋعا قاتىسۋ ءۇشىن پەداگوگتەر مەن جوعارى وقۋ ورىندارىنىڭ وقىتۋشىلارى 19 قاراشاعا دەيىن كەم دەگەندە ءبىر بەينەروليك جاريالاپ, جوبا پاراقشاسىندا ءوتىنىم قالدىرۋى جانە #قازاقستانمۇعالىمدەرى حەشتەگىن قوسۋى قاجەت. بەينەروليكتەر تانىمدىق سيپاتتا بولىپ, اۆتوردىڭ ءپان سالاسىنا سايكەس كەلۋى ءتيىس.
اۆتوردىڭ ۆيدەوسى 1 000 قارالىمنان اسقان جاعدايدا, ونىڭ پروفيلىنە ەكسكليۋزيۆتى رامكا بەرىلەدى. ال 5 000 قارالىمنان جوعارى جيناعان قاتىسۋشىلار ءۇش iPhone 17 ۇتىسىنا قاتىسا الادى.
جەڭىمپازدار اۋديتوريانىڭ بەلسەندىلىگى مەن قىزىعۋشىلىعى نەگىزىندە انىقتالادى. تولىق ەرەجەلەر TikTok قوسىمشاسىنداعى بايقاۋ پاراقشاسىندا قولجەتىمدى.
- ءبىزدىڭ جوبامىز كوپتەگەن مىندەتتى شەشەدى: مۇعالىم ماماندىعىن ناسيحاتتايدى, پەداگوگتەردى تسيفرلىق كونتەنت جاساۋ داعدىلارىن مەڭگەرۋگە ىنتالاندىرادى, وزدەرىن ەركىن كورسەتۋگە جانە اۋديتورياسىن سىنىپتان تىس كەڭەيتۋگە مۇمكىندىك بەرەدى. سونىمەن قاتار ميلليونداعان پايدالانۋشىعا ءبىلىم بەرۋ كونتەنتىن سەنىمدى ۇستازداردان تىكەلەي الۋعا جول اشادى. بيىل دا جوبا قازاقستاندىق ءبىلىم بەرۋ سالاسىندا جاڭا ەسىمدەردى اشىپ, ولاردىڭ شىعارماشىلىق الەۋەتىن كورسەتۋگە كومەكتەسەدى دەپ سەنەمىز, - دەيدى TikTok كومپانياسىنىڭ تۇركيا, شىعىس ەۋروپا جانە ورتالىق ازياداعى وپەراتسيالىق ءبولىمىنىڭ باسشىسى مەليس چاعلار.
