فوتو: stat.gov.kz
فورۋمدا قىتاي, سينگاپۋر, گرۋزيا, ۆەنگريا, يندونەزيا, سەربيا جانە تمد ەلدەرىنىڭ ستاتيستيكا قىزمەتتەرىنىڭ باسشىلارى مەن وكىلدەرىنەن قۇرالعان 150-دەن استام قاتىسۋشى باس قوستى. سونداي-اق ءىس-شاراعا حالىقارالىق ۇيىمدار بۇۇ, بۇۇ ەەك, ەىدۇ, دۇنيەجۇزىلىك بانك, ازيا دامۋ بانكى, يۋنيدو, يۋنفپا وكىلدەرىمەن قاتار مەملەكەتتىك ورگانداردىڭ, عىلىمي جانە ساراپتامالىق قاۋىمداستىقتىڭ وكىلدەرى دە قاتىسىپ جاتىر.
فورۋمدا ستاتيستيكانى تسيفرلاندىرۋدىڭ زاماناۋي ۇردىستەرى, دەرەكتەردىڭ ساپاسى مەن قۇندىلىعىنا قاتىستى تاقىرىپتار تالقىلانىپ, مەملەكەتتىك باسقارۋ جۇيەسىنە «ۇلكەن دەرەكتەر» مەن جاساندى ينتەللەكت تەحنولوگيالارىن ەنگىزۋ ماسەلەلەرى ءسوز بولدى.
فورۋمنىڭ پلەنارلىق وتىرىسىن اشقان ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ ەلىمىزدىڭ تاۋەلسىزدىك جىلدارىندا ستاتيستيكا سالاسى جوسپارلى ەكونوميكانىڭ ەسەپ جۇيەسىنەن بۇۇ, ەىدۇ, حۆق جانە باسقا دا ۇيىمداردىڭ حالىقارالىق ستاندارتتارىنا تولىق سايكەس كەلەتىن زاماناۋي جۇيەگە دەيىنگى اۋقىمدى دامۋ جولىنان وتكەنىن اتاپ ءوتتى.
«ستاتيستيكا – اشىقتىق پەن سەنىمنىڭ كەپىلى. مەرەيتوي – بۇل تەك قورىتىندى شىعارۋ عانا ەمەس, جاڭا بەلەستەردى ايقىنداۋ مۇمكىندىگى. حالىقارالىق ىنتىماقتاستىقتىڭ ارقاسىندا قازاقستاندىق ستاتيستيكا بۇۇ-نىڭ تۇراقتى دامۋ ماقساتتارىنا قول جەتكىزۋ ىسىنە ايتارلىقتاي ۇلەس قوسا بەرەدى», دەدى اسەت ەرعاليەۆ.
تمد مەملەكەتارالىق ستاتيستيكا كوميتەتىنىڭ توراعاسى كونستانتين لايكام الەمدىك ستاتيستيكا قاۋىمداستىعى اقپاراتتىق ورتانىڭ دامۋى مەن قوعامدىق ومىردەگى وزگەرىستەرگە بايلانىستى كۇردەلى سىن-قاتەرلەرمەن بەتپە-بەت كەلىپ وتىرعانىن جەتكىزدى.
«تمد ستاتيستيكا كوميتەتىنىڭ اتىنان قازاقستاندىق ارىپتەستەرىمىزدى مەرەيتويمەن شىن جۇرەكتەن قۇتتىقتايمىن جانە فورۋمدى جوعارى دەڭگەيدە ۇيىمداستىرعاندارى مەن جىلى قابىلداۋلارى ءۇشىن ريزاشىلىعىمدى بىلدىرەمىن. قازاقستاندىق ستاتيستيكتەر مول تاجىريبە جيناقتادى, جانە ونىڭ تمد ەلدەرى ءۇشىن پايدالى بولارىنا سەنىمدىمىن. تەك بىرلەسكەن كۇش-جىگەر ارقىلى ءبىز جاھاندىق سىن-قاتەرلەرگە ءتيىمدى جاۋاپ بەرىپ, ستاتيستيكانى حالقىمىزدىڭ يگىلىگى ءۇشىن پايدالانا الامىز», دەدى ول.
فورۋم باعدارلاماسىنا ۇلتتىق ستاتيستيكا جۇيەلەرىنىڭ تسيفرلىق ترانسفورماتسياسى, دەرەكتەر ساپاسىن ارتتىرۋ, ۇلكەن دەرەكتەر مەن جاساندى ينتەللەكتىنى پايدالانۋ, سونداي-اق ستاتيستيكا پايدالانۋشىلارىمەن ءتيىمدى كوممۋنيكاتسيا ماسەلەلەرىنە ارنالعان سەسسيالار دا ەنگىزىلگەن.
فورۋم بارىسىندا ازيا دامۋ بانكى, يۋنفپا, Halyk Bank, KazAID جانە يندونەزيانىڭ ستاتيستيكا اگەنتتىگىمەن ءوزارا ىنتىماقتاستىق تۋرالى مەموراندۋمدارعا قول قويۋ جوسپارلانعان.
