ماجىلىستەگى بريفينگتە جۋرناليستەر بۇل فۋنكتسيا قازىر تەك ءبىر عانا بانكتىڭ قوسىمشاسىندا بار ەكەنىن اتاپ ءوتتى. وندا پايدالانۋشى اقشانى كىم جىبەرگەنىن بىلمەگەن جاعدايدا نەمەسە بەلگىلى ادامنان قاراجات العىسى كەلمەسە, ءبىر باتىرمانى باسۋ ارقىلى اۋدارىمدى قايتارا الادى.
«بۇل – وتە جاقسى باستاما. ءبىز مۇنداي مۇمكىندىك بارلىق بانكتەردە ىسكە اسىرىلىپ, ونى بانكتىك ەرەجەلەردە مىندەتتى تالاپ رەتىندە بەكىتۋدى ۇسىنامىز», دەدى ءمادينا ابىلقاسىموۆا.
اگەنتتىك باسشىسىنىڭ ايتۋىنشا, مۇنداي شارا «دروپپەرلەر» دەپ اتالاتىن ءوز شوتتارىن زاڭسىز وپەراتسيالار ءۇشىن پايدالانۋعا بەرەتىن تۇلعالارمەن كۇرەستىڭ ءبىر بولىگى سانالادى. سونىمەن قاتار, بۇل ءتاسىل ەسىرتكى ساۋداسى مەن اقشا جىلىستاتۋ ارنالارىن جابۋعا باعىتتالعان.
ابىلقاسىموۆانىڭ سوزىنشە, مەحانيزمدى تولىق ەنگىزۋ بىرنەشە ايعا سوزىلۋى مۇمكىن.
«اگەنتتىك قارجى مونيتورينگى اگەنتتىگىمەن بىرلەسىپ, قارجى سەكتورىنىڭ اشىقتىعىن ارتتىرۋعا باعىتتالعان جاڭا تالاپتاردى تۇراقتى تۇردە ەنگىزىپ كەلەدى», دەدى ول.
سوڭعى جاڭاشىلدىقتاردىڭ قاتارىندا بانكتىك كارتالاردىڭ سانىن شەكتەۋ, تەكسەرۋ راسىمدەرىن قاتاڭداتۋ جانە ەسەپشوتتاردى زاڭسىز ماقساتتا پايدالانۋ ءۇشىن قىلمىستىق ءارى اكىمشىلىك جاۋاپكەرشىلىك ەنگىزۋ بار.
