فوتو Depositphotos.com
دەپۋتاتتىڭ پىكىرىنشە, قولدانىستاعى زاڭدا حالىقارالىق ستاندارتتارعا سايكەس كەلمەيتىن ءارى ادىلەت ۇستانىمدارىنا قايشى كەلەتىن نورمالار بار. ە.سايروۆ 2020-2024 جىلدار ارالىعىندا ەكىنشى دەڭگەيلى بانكتەردىڭ تابىسى 8,2 تريلليون تەڭگەگە, ال بيىلعى جىلدىڭ 9 ايىندا عانا 2 تريلليون تەڭگەگە جەتكەنىن ايتتى.
ەرلان سايروۆتىڭ سوزىنشە, بانكتەردىڭ شامادان تىس پايدا تابۋى 2019 جىلى ۇلتتىق بانك ەنگىزگەن نورمالارمەن بايلانىستى. قازىر بانكتەر ازاماتتاردىڭ تولەم كارتالارىنداعى جانە كۆازيمەملەكەتتىك سەكتور شوتتارىنداعى قالدىقتارعا وتە تومەن پايىز تولەيدى. باسقاشا ايتقاندا, بانكتەر بۇل قاراجات ءۇشىن حالىققا سىياقى تولەمەيدى, بىراق ولاردى پايدالانۋدى جالعاستىرا بەرەدى, ال ۇلتتىق بانك ءوز پايىزىن الادى.
«مۇنداي تاجىريبە الەمنىڭ ەشبىر ەلىندە جوق, تەك قازاقستاندا عانا بار. سوندىقتان دەپۋتاتتار وسى ادىلەتسىز نورمانى جويۋ ءۇشىن تۇزەتۋلەر ەنگىزۋدى ۇسىندى», دەدى ءماجىلىس دەپۋتاتى.
جاۋاپ رەتىندە ءمادينا ابىلقاسىموۆا اگەنتتىكتىڭ جالپى العاندا بۇل ۇسىنىستى قولدايتىنىن ايتتى. ونىڭ تۇسىندىرۋىنشە, اعىمداعى شوتتارعا سىياقى ەسەپتەۋگە تىيىم 2018 جىلى كۆازيمەملەكەتتىك كومپانيالاردىڭ ءتيىمسىز تاجىريبەسىنە جانە بانكتەردە تۇراقتى قارجىلاندىرۋ بازاسىن قالىپتاستىرۋ قاجەتتىلىگىنە بايلانىستى ەنگىزىلگەن.
«بۇل وتە ماڭىزدى, سەبەبى ەكونوميكا ۇزاقمەرزىمدى نەسيەلەر الۋى ءۇشىن سەنىمدى جانە بەرىك قورلاندىرۋ بازاسى قاجەت. ال اعىمداعى شوتتارداعى قاراجاتتى كليەنت كەز كەلگەن ۋاقىتتا شەشىپ الا الادى, سوندىقتان ولارعا پايىز تولەۋگە تىيىم سالىنعان», دەدى م.ابىلقاسىموۆا.
ءمادينا ابىلقاسىموۆانىڭ ايتۋىنشا, ەگەر تىيىم الىنىپ تاستالسا دا, اعىمداعى شوتتار بويىنشا مولشەرلەمەلەر تومەن كۇيىندە قالادى. حالىقارالىق تاجىريبەگە سايكەس, مۇنداي شوتتارداعى پايىزدار دەپوزيتتەرگە قاراعاندا ەداۋىر از بولادى, ويتكەنى قاراجاتتى كەز كەلگەن ساتتە شەشىپ الۋعا بولادى.
قنردا ءتورايىمى دەپۋتاتتاردىڭ ۇسىنىسىن قولدايتىنىن راستادى, بىراق اعىمداعى شوتتار بويىنشا سىياقى از مولشەردە عانا تولەنەتىنىن اتاپ ءوتتى.
