فوتو: ۇكىمەتتىڭ ءباسپاسوز قىزمەتى
ءمينيستردىڭ دەرەگىنشە, بيىلعى ۆەگەتاتسيالىق كەزەڭنىڭ قورىتىندىسى بويىنشا 1,8 ملن توننا مينەرالدىق تىڭايتقىش ەنگىزىلدى, بۇل عىلىمي نەگىزدەلگەن قاجەتتىلىكتىڭ 56 پايىزىن قۇرايدى. سونداي-اق ەليتالىق تۇقىمداردىڭ ۇلەسى 9,5 پايىزدان 11,5 پايىزعا دەيىن وسكەن.
«ەرتە قارجىلاندىرۋ باعدارلاماسى كەلەسى جىلى دا جالعاسادى. 1 قازاننان باستاپ 2026 جىلعى كوكتەمگى دالا جۇمىستارىنا ءوتىنىم قابىلداۋ باستالدى. قاراشانىڭ ەكىنشى ونكۇندىگىنەن باستاپ شارۋالارعا رەۆولۆەرلىك كرەديت بەرۋ اشىلادى, بۇل ءبىر كەپىلدىكپەن جىل سايىن نەسيە الۋعا مۇمكىندىك بەرەدى», دەدى ايداربەك ساپاروۆ.
ونىڭ ايتۋىنشا, اتالعان كرەديتتىك تەتىك اۋىل كاسىپكەرلەرىنىڭ قارجى اينالىمىن جەڭىلدەتىپ, ماۋسىمدىق تاۋەكەلدەردى ازايتادى. سونىمەن قاتار اۋىل شارۋاشىلىعى تەحنيكاسىن جاڭارتۋ دا جۇيەلى تۇردە جالعاسىپ كەلەدى.
بۇگىندە كولەمى 250 ملرد تەڭگەگە جەتكەن جەڭىلدەتىلگەن ليزينگ باعدارلاماسى ارقىلى تەحنيكانى جاڭارتۋ قارقىنى 6,5 پايىزعا دەيىن ءوستى. سونىڭ ناتيجەسىندە سوڭعى ەكى جىلدا اۋىل شارۋاشىلىعى تەحنيكاسىنىڭ توزۋ دەڭگەيى 80 پايىزدان 70 پايىزعا دەيىن تومەندەدى.
