شارا شەكارا باسقارماسىنىڭ باستىعى پولكوۆنيك نۇرتاي ساحيەۆتىڭ دەپارتامەنت باسشىسى پولكوۆنيك الىبەك قايۋپوۆقا «كۇز-2025» شاقىرىلىمى ساربازدارىنىڭ انت قابىلداۋ ءۇشىن ساپقا تۇرعىزىلعانىن بايانداۋىنان باستالدى. اتى-ءجونى اتالىسىمەن ورتاعا شىققان ءار ساربازدىڭ قيمىل-قوزعالىسىن ولاردىڭ اتا-انالارى, تۋىستارى, دوستارى قالت جىبەرمەي باقىلادى. ال ءبىز سارباز انالارىنىڭ ءبىرىن سوزگە تارتقان ەدىك. اقەركە ارالباەۆا بۇگىنگى راسىمگە قاتىسۋ ءۇشىن الماتى وبلىسى, قاراساي اۋدانىنىڭ قىرعاۋىلدى اۋىلىنان كەلىپتى.
« ۇلىم جاڭا عانا كوز الدىمدا انت قابىلدادى. ق ۇلىنىمدى اسكەري ورتا وزگەرتىپتى, ەسەيگەن. انامىن عوي, ءوزىن اسكەرگە شىعارىپ سالعالى ۋايىمداپ ەدىم. جاقسى جەرگە تۇسكەنىن كورىپ, قاتتى قۋانىپ تۇرمىن», دەدى.
سونداي-اق ول ءوزى ۇستازدىق ەتەتىن مەكتەپتە «جاس شەكاراشى» اسكەري-پاتريوتتىق كلۋبى اشىلىپ جۇمىس ىستەي باستاعانىنا ءبىراز ۋاقىت بولعانىن, ەندى راسىمنەن كەيىن جاس پاتريوتتارمەن اڭگىمە ساعاتىن وتكىزىپ, بۇگىنگى شارا تۋرالى ايتىپ بەرەتىنىن تولعانا جەتكىزدى.
ۇقك شەكارا قىزمەتى الماتى وبلىسى بويىنشا دەپارتامەنت باستىعى پولكوۆنيك الىبەك قايۋپوۆ, ۇيعىر اۋدانى اكىمىنىڭ ورىنباسارى ەراسىل تولىمبەك ۇلى, شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق بىرلەستىگى الماتى وبلىستىق فيليالىنىڭ توراعاسى, زاپاستاعى پولكوۆنيك سەرىك قامىشەۆ, اتا-انالار اتىنان بۇلبۇلحان بايماديەۆا اسكەري ءومىردىڭ العاشقى الىپپەسىمەن تانىسىپ, ساپپەن ءجۇرۋدىڭ ءادىس-ءتاسىلىن تەرەڭ مەڭگەرگەن جاۋىنگەرلەردى قۇتتىقتاپ, وتان شەبىندەگى قىزمەتتەرىنە ساتتىلىك تىلەدى.
وتان الدىنداعى ازاماتتىق بورىشىن ەل شەبىندە وتەۋ كەزىندە قىزمەتتىك-جاۋىنگەرلىك ءىس-ارەكەتتىڭ ۇزدىگى اتانعان «كۇز-2024» شاقىرىلىمىنىڭ 20 ساربازىنا دەپارتامەنت باسشىسى وزدەرى قالاعان جوعارى وقۋ ورىندارىنىڭ سەرتيفيكاتىن سالتاناتتى جاعدايدا تابىس ەتىپ, شەكارا قورعاۋداعى ادال قىزمەتتەرىنە العىس ايتتى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
