ەلىمىزدىڭ نامىسىن قورعاعان 16 تاەكۆوندوشىنىڭ اراسىنان ەكەۋىنىڭ عانا باعى جاندى. 46 كگ سالماقتا سىنعا تۇسكەن ايدانا قۇمارتاەۆا مەن 49 كگ سالماقتا ونەر كورسەتكەن نوديرا احمەدوۆا قولا مەدالدى مويىندارىندا جارقىراتتى. وسى ناتيجەنىڭ ارقاسىندا جەرلەستەرىمىز ۇلىبريتانيا, يوردانيا, اقش قۇرامالارىمەن بىرگە 16–19 ورىنداردى ءوزارا ءبولىستى. جالپى كوماندالىق ەسەپتە 3 التىن, 2 كۇمىس, 1 قولا مەدالمەن تۇركيا توپ جاردى. ەكىنشى, ءۇشىنشى ورىنداردا – وڭتۇستىك كورەيا (2+2+2) مەن برازيليا (2+2+0).
ەلىمىزدىڭ تاەكۆوندوشىلارى الەم چەمپيوناتىنا تاۋەلسىزدىك العان كەزدەن بەرى ۇزدىكسىز قاتىسىپ كەلە جاتىر. 1999 جىلى كانادانىڭ ەدمونتون قالاسىندا ۇيىمداستىرىلعان جارىستا ءادىلحان ساعىندىقوۆ (84 كگ) قولا مەدال يەلەندى. 2003 جىلى گەرمانيانىڭ گارميش-پارتەنكيرحەن قالاسىندا ليا نۇركينا (67 كگ) ورەلى ونەرىمەن ءوز جانكۇيەرلەرىن قۋانتىپ, قولا جۇلدە ەنشىلەدى. 2007 جىلى بەيجىڭدە جەرلەستەرىمىز ەلەۋلى تابىسقا قول جەتكىزدى. قىتاي استاناسىنا اتتانعان سپورتشىلارىمىزدىڭ ۇشەۋى ەلگە قولا مەدالمەن ورالدى. ولار – اسلان باتىقۇلوۆ (54 كگ), ارمان شىلمانوۆ (84 كگ), نازگۇل تاجىقۇلوۆا (51 كگ).
2009 جىلى كوپەنگاگەندە 84 كگ-دان +87 كگ سالماققا اۋىسقان وليمپيا ويىندارىنىڭ جۇلدەگەرى ارمان شىلمانوۆ قاتارىنان ەكىنشى رەت قولا مەدال ەنشىلەدى. ودان كەيىن ءبىراز ۋاقىت بويى وتاندىق تاەكۆوندومىز توقىراۋ كەزەڭىن باسىنان وتكەردى. تەك 2017 جىلى مۋدجۋ (وڭتۇستىك كورەيا) مەن 2019 جىلى مانچەستەردە ( ۇلىبريتانيا) قايرات سارىمساقوۆ (74 كگ) قولا مەدالدى قانجىعاسىنا بايلادى. ودان كەيىن 2022 جىلى گۆادالاحارا (مەكسيكا) مەن 2023 جىلى باكۋدە (ازەربايجان) ۇيىمداستىرىلعان بايراقتى باسەكەلەردە باعىمىز جانبادى.
