فوتو: egemen.kz/ مەرەي قاينار ۇلى
تىكۇشاق كوككە كوتەرىلگەندە-اق قىراعى كوزدى ينسپەكتورلار ورماندى القاپتى باقىلاپ وتىرعان. ايتا كەتەيىك, جوسپارلى رەيد تەك ريددەر ورمان شارۋاشىلىعى اۋماعىندا جۇرگىزىلەدى.
باتىس التايدىڭ بيىگىن تۇمان تۇمشالاپ, جۇدەڭكى كۇيگە ءتۇسىپتى. كەشەگى قۇلپىرىپ تۇرعان قىزىلدى-سارى جاپىراقتى قازاننىڭ قارا داۋىلى اياق استى ەتكەن. انە-مىنە قار باسادى.
شاتقالداردى ارالاي, وزەندەردى جاعالاي ۇشتىق. ادام اياعى باسپايدى-اۋ دەگەن جەرگە دەيىن بارلاۋ جاسادىق. بىراق ادام اياعى باسپايتىن جەر بار ما قازىر؟! يت تۇمسىعى وتپەس تايگانى دا, قۇزار بيىك شىڭدى دا, ءتىپتى سوناۋ تەڭىز ءتۇبىن دە زەرتتەپ تاستادى عوي. ونىڭ ۇستىنە, وزەندەر تارتىلىپ, مولدىرەپ اعىپ جاتقان ۋاقىتتا بالىقشىلار ۇيدە قايدان جاتسىن؟!
ايتقانداي-اق, باتىس التايدىڭ قويىن-قونىشىن ارالاي اعىپ جاتقان ءۇلبى وزەنىنىڭ باس جاعىندا قاز-قاتار ءتىزىلىپ تۇرعان بالىقشىلاردى بايقاپ قالىپ, قوندىق.
وكىنىشتىسى, بالىقشىلار تۇراقتايتىن تۇستار قوقىسقا تولى. ونى كورگەن ينسپەكتورلار بالىقشىلارعا ەسكەرتۋ جاسادى.
التايدىڭ كەيبىر بيىكتەرىن قار باسقان. كۇزگە سالىم اسىر سالعان ايۋ اتاۋلى ەندىگى ۇيقىعا كەتسە كەرەك-ءتى.
ءۇبى وزەنى باستاۋ الىپ جاتقان تۇستى توڭىرەكتەپ كەلە جاتقانىمىزدا تومەندەگى سوقپاقپەن زىتىپ بارا جاتقان جۇك كولىگى كوزگە تۇسپەسى بار ما؟! اككى ۇشقىشتار كولىكتىڭ الدىنا كەسە-كولدەنەڭ قونا كەتتى.
ءتۇۋ تۇكپىردە كوزگە تۇسە قويامىن دەپ ويلادى ما بۇل ازامات؟! بالىعىن اۋلاپ, الاڭسىز ۇيىنە قايتىپ بارا جاتقان جەرىندە ينسپەكتورلار كوكتەن ءتۇسىپ, توقتاتقان.
كولىكتى تىنتكەن قۇزىرلى ورگان ماماندارى رۇقسات ەتىلمەگەن قۇرالمەن بالىق اۋلاعانىن انىقتادى. قوس قاپتا مولشەرى 15-20 كەلى بالىق بار ەكەن.
سونداي-اق كولىك ورىندىعىنىڭ ارتىندا قارۋ بار ەكەنى بەلگىلى بولدى. ريددەر تۇرعىنى قارۋدىڭ قۇجاتى بارىن ايتىپ, راستايتىن قۇجاتتارىن قوسا ۇسىندى. ول جاعى زاڭدى بولعانىمەن, بالىق اۋلاۋ ءتاسىلى تارتىپكە ساي ەمەس.
ريددەر قالاسىنىڭ ا ەسىمدى تۇرعىنىنا تىيىم سالىنعان قۇرالدارمەن بالىق اۋلاعانى ءۇشىن اكىمشىلىك كودەكستىڭ 383 بابى, 3-بولىگى بويىنشا حاتتاما تولتىرىلىپ, سوتقا جولدانادى.
مامانداردىڭ ايتۋىنشا, رەيد جۇمىستارى ءالى دە جالعاسادى.
