فوتو:nationalbank.kz
جاڭا ۇلگىدەگى اقشا بەلگىسى زاماناۋي باسپا تەحنولوگيالارىمەن قورعالعان جانە جالعان اقشا جاساۋدان سەنىمدى قورعانىسقا يە.
بانكنوتتىڭ بەت جاعىندا التىن ينتاگليو تاسىلىمەن باسىلعان جوعارى بەدەرلى بەينەلەر بار. قازاقستان رەسپۋبليكاسىنىڭ ەلتاڭباسى التىن مەتالل بوياۋمەن ەرەكشەلەنىپ, قولمەن ۇستاعاندا جاقسى سەزىلەدى.
بەت جاق شەتتەرىندەگى شىعىڭقى رەلەفتى ەلەمەنتتەر كورۋ قابىلەتى ناشار ازاماتتارعا ارنالعان.
سونىمەن قاتار, بانكنوتتىڭ بەتىندە ۇزىك-ۇزىك تۇرىندە كورىنەتىن ەكى ءتۇستى قورعانىش ءجىپ ورنالاسقان. ونى جارىققا توسقاندا ءجىپ ءبىرتۇتاس بولىپ كورىنەدى. كولبەۋ بۇرىش وزگەرگەن كەزدە كوك جانە قىزعىلت-سارى تۇستەردىڭ ءوزارا اۋىسۋىنان ديناميكالىق ەففەكت بايقالادى.
بانكنوتانىڭ الدىڭعى جاعىندا ارتەفاكت بەينەسىندەگى التىن تۇستەس گولوگرافيالىق پاتچ بار. بانكنوتانى بۇرىپ قاراعاندا, نومينالدىڭ ساندىق بەينەسى ۇلتتىق ويۋ-ورنەككە اينالادى.
كەرى بەتىندە كولەمدى بەينەنى كورسەتەتىن سپارك ەلەمەنتى ورنالاسقان: ونى ەڭكەيتكەندە ءتۇسى التىننان نەفريت رەڭىنە وزگەرەدى. ال كەيبىر كوركەم ەلەمەنتتەر ارنايى يريديستسەنتتى بوياۋمەن باسىلىپ, التىن تۇستەس جىلتىراعىن بەرەدى.
سونداي-اق, بانكنوتتىڭ ىشىندە جارىق تۇسكەندە انىق كورىنەتىن سۋ بەلگىسى – ەلەكتروتيپ بار. ول نومينالدىڭ بەينەسى تۇرىندە كورىنەدى جانە بانكنوتتىڭ تۇپنۇسقالىعىن تەكسەرۋدىڭ ەڭ سەنىمدى تاسىلدەرىنىڭ ءبىرى سانالادى.
ۇلتتىق بانك ماماندارى اتاپ وتكەندەي, ءار ازامات بانكنوتتى قولمەن ۇستاپ, جارىققا توسىپ, ەڭكەيتىپ قاراۋ ارقىلى شىنايى اقشانى جالعانىنان وڭاي اجىراتا الادى.
