«جولاۋشىلار تاسىمالىنىڭ ارتۋى مەن قالانىڭ كەڭەيۋىنە بايلانىستى كەلەسى جىلى 13 جاڭا باعىت ىسكە قوسىلادى. سونىمەن قاتار Bus Line جۇيەسىن كەزەڭ-كەزەڭىمەن ەنگىزىپ جاتىرمىز. اۆتوبۋستارعا ارنالعان ارنايى جولاقتار قوزعالىس ۋاقىتىن 25-30%-عا دەيىن قىسقارتادى. بۇگىندە وسىنداي جولاقتار جالپى ۇزىندىعى 134 شاقىرىم بولاتىن 30 ۋچاسكەدە جۇمىس ىستەيدى. بيىل تاعى ءۇش باعىتتا — تاۋەلسىزدىك داڭعىلىندا, اممان كوشەسىندە جانە قورعالجىن تاسجولىندا ەنگىزىلدى. ال وتكەن جىلى التى ۋچاسكەدە پايدالانۋعا بەرىلگەن بولاتىن», – دەدى اكىم.
جەڭىس قاسىمبەكتىڭ ايتۋىنشا, قوعامدىق كولىك جۇيەسىن دامىتۋ – اكىمدىك جۇمىسىنىڭ باستى باسىمدىقتارىنىڭ ءبىرى.
«جىل سايىن اۆتوبۋس سانىن ورتا ەسەپپەن 300–350 بىرلىككە ارتتىرىپ, جاڭا باعىتتار مەن ارنايى جولاقتار اشىپ كەلەمىز. مۇنىڭ ءبارى قالالىق كولىكتى تۇرعىندار ءۇشىن تارتىمدى ەتۋگە باعىتتالعان. مىسالى, 2024 جىلى تاۋلىكتىك جولاۋشىلار اعىنى 800 مىڭ ادام بولسا, 2025 جىلى بۇل كورسەتكىش 1,1 ميلليونعا جەتتى», – دەدى قالا باسشىسى.
قازىر استانادا توعىز اۆتوپارك بار, ونىڭ ءبىرى – كوممۋنالدىق. قالعان جەكە اۆتوپاركتەر دە ءوز قاراجاتى ەسەبىنەن كولىك پاركىن جاڭارتىپ وتىر. بيىل ولاردىڭ ەسەبىنەن 122 جاڭا اۆتوبۋس ساتىپ الىنعان, ءبىر بولىگى قالاعا جەتكىزىلدى.
«قالالىق اۆتوپاركتەرگە بيىل 300 گازبەن جۇرەتىن اۆتوبۋس جەتكىزۋ جوسپارلانعان. ونىڭ 134-ءى ەلورداعا كەلىپ ۇلگەردى. سونىمەن بىرگە يندۋستريالىق پارك اۋماعىندا اۆتوموبيلدىك گاز تولتىرۋ كومپرەسسورلىق ستانتسياسى ورناتىلىپ, ىسكە قوسىلدى. ال جەكە اۆتوپاركتەر – “ابي-استانا”, “Elorda Trans” جانە “جورعا مت” – جاڭا اۆتوبازا سالىپ جاتىر», – دەپ اتاپ ءوتتى اكىم.
