بۇگىن الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ مەگاپوليستەگى مەديتسينالىق ءتۋريزمنىڭ دامۋ كەلەشەگى مەن باسەكەلەستىككە بەيىمدەلۋ قادامدارى تۋرالى اقپارات بەردى.
قالانىڭ باس دارىگەرى الماتىدا مەديتسينالىق ءتۋريزمدى دامىتۋعا زور مۇمكىندىك بار ەكەندىگىن بايانداي وتىرىپ, كوپ دەڭگەيلى مەديتسينالىق ۇيىمداردا زاماناۋي تەحنولوگيالار قولدانىلاتىندىعىن, جوعارى ساپا ستاندارتتارى ساقتالاتىندىعىنا اتاپ ءوتتى. سونىمەن قاتار, قازاقستاندا ەمدەلۋ ارزان عانا ەمەس, تمد ەلدەرىنىڭ ازاماتتارى ءۇشىن تىلدىك كەدەرگى جوق.
«الماتى قازىردىڭ وزىندە كورشىلەس ەلدەردەن كەلەتىن ناۋقاستار ءۇشىن تارتىمدى باعىتقا اينالىپ وتىر. اسىرەسە رەسەي, وزبەكستان مەن قىرعىزستاننان كەلەتىن پاتسيەنتتەردىڭ سانى تۇراقتى ءوسىپ كەلەدى», دەدى مارات پاشيموۆ.
مەديتسينالىق ءتۋريزمدى دامىتۋ ماقساتىندا قالادا اقپاراتتىق-ءتۇسىندىرۋ جۇمىستارى جۇرگىزىلىپ جاتىر, ساقتاندىرۋ, اسسيستەنس سياقتى كومپانيالارىمەن ارىپتەستىك نىعايىپ كەلەدى, ونلاين-كونسۋلتاتسيالار ۇيىمداستىرىلىپ, شەتەلدىك ناۋقاستاردى قابىلداۋ جۇيەسى جولعا قويىلعان.
قازىرگى تاڭدا مەگاپوليستەگى 25 مەديتسينالىق ۇيىم ونكولوگيا, حيرۋرگيا, اكۋشەرلىك جانە پسيحونەۆرولوگيا سياقتى ءتۇرلى باعىتتار بويىنشا جوعارى تەحنولوگيالىق كومەك كورسەتەدى.
مىسالى, 2025 جىلدىڭ تەك العاشقى جارتىجىلدىعىندا الماتى ستاتسيونارلارىندا 178 شەتەلدىك پاتسيەنت ەمدەلدى. ولاردىڭ ىشىندە 81 ادام – رەسەيدەن, 25 ادام – وزبەكستاننان, 24 ادام – قىرعىزستاننان كەلگەن.
شەتەلدىك پاتسيەنتتەر كوبىنەسە اكۋشەرلىك پەن بوساندىرۋ ءىسى, ونكولوگيا, حيرۋرگيا, تەراپيا, ۋرولوگيا مەن پسيحياتريا سالالارىنىڭ ماماندارىنا جۇگىنەدى.
سونداي-اق, قازاقستان زاڭناماسىنا سايكەس, قانداستار, بوسقىندار, شەتەلدىكتەر مەن باسقا ەلدە تۇراقتى تۇرىپ جاتقان ازاماتتىعى جوق تۇلعالار دا وتانداستارىمىزبەن تەڭ دارەجەدە مەديتسينالىق كومەك الۋعا قۇقىلى. بۇل كومەك كەپىلدەندىرىلگەن تەگىن مەديتسينالىق كومەك كولەمى (كتمكك) جانە مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسى اياسىندا كورسەتىلەدى.
«مەديتسينالىق ءتۋريزمدى دامىتۋ – تەك قوسىمشا تابىس كوزى عانا ەمەس, سونىمەن بىرگە مەديتسينالىق كومەكتىڭ ساپاسىن ارتتىرىپ, الماتىنىڭ دەنساۋلىق پەن يننوۆاتسيالار سالاسىنداعى حالىقارالىق بەدەلىن نىعايتۋعا مۇمكىندىك بەرەدى», دەيدى الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ.
