كەزدەسۋ بارىسىندا ەستونيانىڭ ءداستۇرلى حالىق ونەرىنە ارنالعان ەستونيالىق قولعاپتار كورمەسىن ۇيىمداستىرۋ ماسەلەسى دە قوزعالدى. بۇل كورمە ەلىمىزدىڭ ۇلتتىق مۋزەيىندە وتەدى. سونداي-اق ۇلتتىق اكادەميالىق كىتاپحانادا ارنايى ەستونيا كىتاپتارى بۇرىشىنىڭ اشىلۋى دا ءسوز ەتىلدى. بۇل باستاما مادەني بايلانىستاردى دامىتۋعا جانە شەتەل ادەبيەتىن ناسيحاتتاۋعا باعىتتالعان.
«مادەنيەت پەن ونەر – حالىقتىڭ رۋحى مەن بولمىسىن تانىتاتىن ماڭىزدى سالا. مادەنيەتتە شەكارا جوق, ول ەلدەر مەن حالىقتاردى جاقىنداستىرىپ, ءوزارا تۇسىنىستىكتى ارتتىرادى. ءبىز ەستونيامەن ىنتىماقتاستىقتى دامىتۋ مەن نىعايتۋعا مۇددەلىمىز. ءوز تاراپىمنان تاجىريبە الماسۋ, كورمەلەر, گاسترولدەر, شىعارماشىلىق جوبالار نەمەسە اكادەميالىق باعدارلامالار – كەز كەلگەن ورتاق باستامانى جان-جاقتى قولداۋعا دايىنمىن», دەدى
ا.بالاەۆا.
وتىرىستا تاراپتار تەاترلار, باسپالار, گالەرەيالار مەن كينوورتالىقتار اراسىنداعى ىنتىماقتاستىق ماسەلەلەرىن دە تالقىلادى. ورتاق كورمەلەر مەن قويىلىمدار ۇيىمداستىرۋ, ادەبي شىعارمالاردى اۋدارۋ, سونداي-اق سۋرەتشىلەر, جازۋشىلار مەن رەجيسسەرلەر اراسىندا تاجىريبە الماسۋ مۇمكىندىگى دە قاراستىرىلدى.
جيىن بارىسىندا ەستوندىق تاراپ مينيسترلىكتىڭ قۇزىرەتىنە كىرەتىن بىرقاتار سۇراققا جاۋاپ الدى. كەزدەسۋ سوڭىندا تاراپتار ىنتىماقتاستىقتى كەڭەيتۋگە نيەت ءبىلدىردى.
