سۋرەتتى تۇسىرگەن – ۆالەري بۋگاەۆ
جالپى قۇنى 30,4 ملرد تەڭگەنى قۇرايتىن بۇل جوبا – پاۆلودار وبلىسى اۋماعىندا جۇزەگە اسىرىلۋى جوسپارلانعان ءۇش ءىرى وندىرىستىك كەشەننىڭ العاشقىسى. بارلىق نىسان ىسكە قوسىلعاننان كەيىن ەلىمىز قارا جانە ءتۇستى مەتاللۋرگيادا, ماشينا جاساۋ, كولىك جانە باسقا دا ونەركاسىپ سالالارىندا كەڭىنەن قولدانىلاتىن ستراتەگيالىق ماڭىزدى ماتەريال – فەرروقورىتپا ءوندىرىسى بويىنشا الەمدە 2-ورىنعا شىعۋعا مۇمكىندىك الادى.
زاۋىت حالىقارالىق ەكولوگيالىق, تەحنولوگيالىق قاۋىپسىزدىك ستاندارتتارىنا تولىق سايكەس كەلەتىن ەكى زاماناۋي ەلەكتر پەشىمەن جابدىقتالعان. جوعارى تەحنولوگيالىق كاسىپورىن 99,9% تيىمدىلىكپەن اۋانى تازارتۋدى قامتاماسىز ەتەتىن زاماناۋي گيبريدتى سۇزگىلەرمەن جابدىقتالعان جانە ەڭ جوعارى ەكولوگيالىق تالاپتارعا جاۋاپ بەرەدى. جوبانى جۇزەگە اسىرۋ اياسىندا 350-دەن استام جاڭا جۇمىس ورنى قۇرىلادى.
«بۇل – ەرتىس-بايان ءوڭىرى اۋماعىندا قازاقستاندى فەرروقورىتپا ءوندىرىسى بويىنشا الەمدىك كوشباسشىلار قاتارىنا قوسۋعا قابىلەتتى تولىققاندى مەتاللۋرگيالىق كلاستەردى قۇرۋعا باعىتتالعان ستراتەگيالىق قادام. ەكىباستۇز ەلىمىزدىڭ نەگىزگى وندىرىستىك ورتالىقتارىنىڭ بىرىنە اينالىپ كەلەدى, ال بۇگىنگى وقيعا ءوڭىردىڭ يندۋستريالىق دامۋىنىڭ جاڭا كەزەڭىنىڭ باستالۋىن بىلدىرەدى», دەدى وبلىس اكىمى اسايىن بايحانوۆ.
ءوڭىر باسشىسى مەن «KazFerroLimited» جشس باس ديرەكتورى قايرات نۇكەنوۆ سيمۆولدىق تۇردە العاشقى ەلەكتر پەشىن ىسكە قوسۋ راسىمىنە قاتىستى. ودان سوڭ ءوڭىر باسشىسى جاڭا كاسىپورىننىڭ نەگىزگى وندىرىستىك ايماقتارىن ارالاپ, تەحنولوگيالىق ۇدەرىستى تولىق باقىلاۋدا ۇستايتىن وپەراتورلىق بولىمگە باردى. سونىمەن قاتار مەتالدىڭ العاشقى قۇيىلۋ ۇدەرىسىنە كۋا بولدى.
پاۆلودار وبلىسى,
ەكىباستۇز قالاسى
