پاۆلودارداعى اباي اتىنداعى جالعىز قازاق مەكتەبىن ۇزدىك بىتىرگەن سەكەڭ شىعارماشىلىققا جاستاي جاقىن بولدى. ۋنيۆەرسيتەتتى تامامداعان سوڭ مەملەكەتتىك كىتاپ پالاتاسىندا ون بەس جىل بيبليوگراف, اعا رەداكتور قىزمەتىن اتقاردى. كوركەم تۋىندىلارى ادەبي ورتادا جاقسى باعالانىپ, «قازاق ادەبيەتى» گازەتىنەن باستاپ رەسپۋبليكالىق باسىلىمداردا ادەبي-سىن ماقالالارىمەن تانىلدى.
ناتيجەسىندە, اقىل توقتاتقان شاعىندا عىلىمعا كەلدى. م.و.اۋەزوۆ اتىنداعى ادەبيەت جانە ونەر ينستيتۋتىنا ءبىرتۋار عالىمدار سەرىك قيراباەۆ, زاكي احمەتوۆ, راحمانقۇل بەردىباەۆ, سەيىت قاسقاباسوۆ, ءمۇسىلىم بازارباەۆ, شامشيابانۋ ساتباەۆا, شەريازدان ەلەۋكەنوۆ تاربيەسىن الىپ جەتىلدى.
العاشقى جەتەكشىسى پروفەسسور بەيسەنباي كەنجەباەۆ ەدى. ول كىسى باقيعا وزعان سوڭ, پروفەسسور سەرىك نەگيموۆ قوسىمشا جەتەكشىلىك ەتتى. 1994 جىلى ء«ماشھۇر ءجۇسىپ كوپەي ۇلى جانە ونىڭ ادەبي مۇراسى» اتتى كانديداتتىق ديسسەرتاتسياسىن ساتىمەن قورعاپ شىقتى. تۋعان جەرى كەرەكۋگە قونىس اۋدارعان سوڭ, زەرتتەۋىن ءساتتى جالعاستىردى. 2006 جىلى اكادەميك س.قيراباەۆتىڭ كەڭەسشىلىگىمەن «XX عاسىر باسىنداعى قازاق جانە تۇركى حالىقتارى ادەبيەتىنىڭ تيپولوگيالىق سيپاتى» اتتى دوكتورلىق ديسسەرتاتسياسىن قورعاپ, تىڭ تاقىرىپتى يگەردى. ادەبيەتتانۋ ابىزى سەرىك سمايىل ۇلى: «سەيفيتدەن ادالدىعىمەن, مومىندىعىمەن سۇيكىمدى» دەپ وتىراتىنى دا ەسىمىزدە. عالىمنىڭ «م.ج.كوپەي ۇلىنىڭ شىعارماشىلىق ءومىربايانى», «قازاق-تۇركى ادەبي بايلانىستارى», «الاش جانە تۇركى رۋحانياتى» اتتى ەڭبەكتەرى ادەبيەتتانۋعا ۇلەس بولىپ قوسىلدى.
پروفەسسور سەيفيتدەن نازىمبەك ۇلىنىڭ عىلىمي-پەداگوگيكالىق الەۋەتى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى مەن ءا.مارعۇلان اتىنداعى پاۆلودار مەملەكەتتىك پەداگوگيكا ۋنيەرسيتەتىندە تەڭ كورىندى. ۇزاق جىل قازاق ادەبيەتى كافەدراسىن باسقارىپ, ء«ماشھۇرتانۋ», «ابايتانۋ», «ايماقتىق تۇلعاتانۋ» كۋرستارىن جاڭاشا وقىتۋدى جۇزەگە اسىردى. ادەبيەتتانۋدىڭ وزەكتى ماسەلەسىن كوتەرىپ, ونداعان عىلىم كانديداتى مەن ماگيسترىن دايىندادى. پەداگوگيكالىق تاجىريبەسى ەسكەرىلىپ, مەملەكەتتىك «جوو-نىڭ ۇزدىك وقىتۋشىسى» گرانتىن جەڭىپ الدى.
قانشاما جىل ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى دوكتورلىق ديسسەرتاتسيا كەڭەسىنىڭ مۇشەسى بولىپ, ورتالىق جانە سولتۇستىك قازاقستان ءوڭىرى عىلىمي ماماندارىن ازىرلەۋدىڭ باسى-قاسىندا ءجۇردى.
ۇستازدىق پەن عالىمدىق جولى جەمىسىن بەرىپ, ء«ماشھۇر مۇراسى», «رۋحاني الماسۋ ارنالارى», «ادەبي بايلانىس نەگىزدەرى», ء«ماشھۇرتانۋ كۋرسى», «سوپىلىق تانىم تاعىلىمى», «ادەبيەتتىك ولكەتانۋ», «تۇركى حالىقتارى ادەبيەتى» (ب.قۇرالقانوۆامەن بىرگە), «تۇلعالار تاعىلىمى» كىتاپتارى جارىق كورىپ, كەرەكۋ ادەبيەتتانۋ مەكتەبىن بايىتتى.
«قازاق-تۇركى ادەبي بايلانىستارى» ەڭبەگىندە حح عاسىردىڭ العاشقى شيرەگىندەگى تۇركى حالىقتارىنىڭ قارىم-قاتىناسى, ءجاديت باعىتىنداعى وي-پىكىر ساباقتاستىعى, تۋىندىلاردىڭ كونتسەپتسيا بىرلىگى, يسلام ءىلىمى اياسىنداعى الماسۋلار, سيۋجەتتىك, يدەيالىق سارىنداستىق تاريحي-گەنەتيكالىق, توپولوگيالىق تۇرعىدان زەرتتەلسە, ء«ماشھۇرتانۋ كۋرسى» كىتابىندا اسا تىلسىم ماشەكەڭ الەمى, قۇبىلىسى, مۇراسى, تاعىلىمى بايىپتالادى. عالىمنىڭ «سوپىلىق تانىم تاعىلىمى» اتتى وقۋ قۇرالىندا اباي, شاكارىم, ءماشھۇر-ءجۇسىپ سىندى ادەبيەت الىپتارىنىڭ شىعارماشىلىعىنداعى سوپىلىق سارىن سارالانادى.
ءبىزدىڭ تۇسىنىگىمىزدە سەيفيتدەن نازىمبەك ۇلىنىڭ «ادەبيەتتىك ولكەتانۋ» ەڭبەگى – وتان مەن ءوڭىر ۇيلەسىمىن تەڭ ۇستاعان, وتارسىزداندىرۋدىڭ جولىن كورسەتكەن ەلەۋلى جۇمىس. ەرتىس-بايان وڭىرىنەن شىققان ەلگە تانىمال ساڭلاقتار, بي-شەشەندەر, ءانشى سازگەرلەر, اقىن-جازۋشىلار, عالىمدار ءومىرى مەن شىعارماشىلىعى تاريحي تانىم اياسىندا دايەكتەلگەن. اۆتور ايگىلى شوڭ, تورايعىر بي, جاياۋ مۇسا, ءيمانجۇسىپ, ەستاي, مايرا, نۇرلىبەكتەن باستاپ ج.شانين, ق.ساتباەۆ, ءا.مارعۇلان, د.ءابىلوۆ, ز.شاشكين, ق.بەكحوجين, ە.بەكماحانوۆ, ب.شالاباەۆ, اشامكەنوۆ, م.الىمباەۆ, ش.شوكين, م.جامانبالينوۆ, ق.ىدىرىسوۆ, ە.ەربوتين, ق.يساباەۆ, ج.ءابدىلدين, ش.ساتباەۆا, ب.ۋاحاتوۆ, ر.توقتاروۆ, ا.جاقسىباەۆ, ق.ءجۇسىپوۆ, ن.ورالباەۆاعا دەيىنگى تۇلعالاردىڭ عۇمىربايانى مەن مۇراسىنداعى تىڭ دۇنيەلەردى, توسىن ساتتەردى بايىپتاعان.
عالىمنىڭ «الاش ارىستارىنىڭ جولىندا», « ۇلىلار مۇراسىن ۇلىقتاعان», «ۇلت تاريحىن تەرەڭنەن تانىتقان», «ولەڭ بولىپ ورىلگەن ءومىر», ء«ورشىل جىرلار يەسى», «مۇحتار مەكتەبىنىڭ ماقتانىشى», «اقىن اعانىڭ اق كوڭىلى», «ۇستاز ۇلگىسىن ۇلپەكتەپ», «داۋىرمەن ۇندەس دارىن», «تەكتىنىڭ تەگىنەن», «ۇستازىن ۇلىق تۇتقان تۇلعا», «ماعاۋين جانە «مەن», «اتادان ۇل تۋسا يگى...», «تاۋەلسىزدىك تولعاۋلارى», «تۇنىقتان تۋعان تۇلپار جىرلار», «سىلدىرلاپ سىرشىل كەلىسىم», «جەرلەس جازۋشىنىڭ جازبالارى», ء«بىز ونى «بوكەڭ» دەيتىنىمىز», «ولكەتانۋ ءىلىمىن ورىستەتكەن», «شاكارىم مۇراسىنىڭ شىراعدانى», «سىرلى الەمنىڭ سىرىن اشقان» ت.ب. وي-تولعامدارى وقىرماندى بىردەن وزىنە باۋرايدى. سەزىمىن دە, سەنىمىن دە ارتتىرادى.
مەرەيلى بەلەسكە كوتەرىلگەن بەلگىلى عالىم, ۇستاز, ادىسكەر, ءبىلىم بەرۋ ءىسىنىڭ قۇرمەتتى قىزمەتكەرى سەيفەتدين نازىمبەك ۇلى قازىر دە كەرەكۋ ادەبي-مادەني ورداسىنىڭ, جوعارى مەكتەبىنىڭ جۋان ورتاسىندا. وقىعان قاۋىمعا ابىرويلى, شاكىرتتەرىنە قادىرلى. اۋىل-ايماعى, وتباسى-اۋلەتى ءاز تۇتادى.
تىنباي ەڭبەك ەتەتىن اقجۇرەك زيالىنىڭ ازاماتتىق, ۇستازدىق, عالىمدىق قاسيەتى جاس بۋىنعا جۇعىستى بولسىن دەپ تىلەدىك.
ساعىمباي جۇماعۇل,
فيلولوگيا عىلىمدارىنىڭ دوكتورى, پروفەسسور
