سۋرەتتى تۇسىرگەن – اۆتور
قابىرعالى قالامگەر قاليحان ىسقاقتىڭ اۋىلىنداعى اۋىزسۋ ماسەلەسى بۇگىنگە دەيىن ءبىر ەمەس, بىرنەشە مارتە كوتەرىلدى. اۋىلدىڭ ورتاسىنداعى جالعىز قۇدىق پەن وزەننەن سۋ تاسىپ ءىشىپ وتىرعان ەل ارىز-ارمانىن ايتىپ, جوعارىعا نەشە مارتە شاعىمدانعان. بيىل ساعىزشا سوزىلعان جوباعا بەل شەشە كىرىسكەن مەردىگەر انىقتالعان سوڭ وبلىس باسشىسى نۇرىمبەت ساقتاعانوۆ توپقايىڭعا ارنايى بارعان, جاۋاپتى ورگاندارعا قاداپ تۇرىپ تاپسىرما بەرگەن. 1 قاراشاعا دەيىن اۋىلعا اۋىزسۋ بەرىلمەگەن جاعدايدا جاۋاپكەرشىلىكتىڭ بارىن ەسكەرتكەن. ناتيجەسىندە, رەسپۋبليكا كۇنى اۋىزسۋ بەرىلىپ, ۋادە ورىندالدى.
ەسكە سالساق, ءتورت جىل بۇرىن باستالعان بۇل جوباعا جاۋاپتى مەردىگەر «QazConstructions» جشس مىندەتىنە سالعىرت قاراعاندىقتان, جۇمىس ۋاقتىلى اياقتالماي, حالىقتىڭ نارازىلىعىن تۋدىرعان. جوبانىڭ جالپى قۇنى اۋەلدە 602,865 ملن تەڭگەنى قۇراسا, كەيىن مەملەكەتتەن 77 ملن تەڭگە قاراستىرىلعان.
– وسى ۋاقىتقا دەيىن اۋىلدىڭ تومەنگى جاعى قۇدىقتان سۋ ىشسە, جوعارعى جاعى وزەننەن تاسىپ ءىشىپ وتىردى. اۋىزسۋ تارتىلادى دەگەلى ءتورت جىل بولدى. اۋەلدە قۋانىپ ەدىك, كەيىن جۇمىس جۇرمەي قالدى. ايتەۋىر وبلىس باسشىسىنىڭ قاداعالاۋىمەن, تاپسىرماسىمەن جۇمىس اياقتالدى. قۋانىپ جاتىرمىز, – دەيدى توپقايىڭ اۋىلىنىڭ اقساقالى نايمانعازى يبراەۆ.
ايتا كەتەيىك, مەملەكەت باسشىسى قاسىم-جومارت توقاەۆ 2025 جىلى وڭىرلەردى 100 پايىز تازا اۋىزسۋمەن قامتۋدى تاپسىرعان. ول قانشالىقتى ورىندالادى, جىل سوڭىنا قاراي بەلگىلى بولار.
مەرەكە قارساڭىندا كاتونقاراعاي اۋىلىندا دەنەشىنىقتىرۋ-ساۋىقتىرۋ ورتالىعى اشىلدى. مۇندا جاسوسپىرىمدەر مەن بالالار كۇرەسپەن, بوكسپەن اينالىسا الادى. ۆولەيبول مەن فۋتبولعا دا زال بار. ودان بولەك جاتتىعۋ زالى, باسسەين قاراستىرىلعان. كەشەن باسشىلىعىنىڭ ايتۋىنشا, دەنەشىنىقتىرۋمەن اينالىسامىز دەگەن اۋدان تۇرعىندارىنا دا ەسىك اشىق. كەستەگە سايكەس, جۇيەلى تۇردە سپورتپەن اينالىسۋعا مول مۇمكىندىك.
كەيىنگى جىلدارى اۋىل-اۋىلدا الەۋمەتتىك نىسانداردىڭ اشىلىپ, تۇرعىنداردىڭ تۇراقتاۋىنا ايتۋلى جاعداي جاسالىپ جاتىر.
شىعىس قازاقستان وبلىسى,
كاتونقاراعاي اۋدانى
