بيىل جەر ەمشەگىن ەمگەن ديقاندار 4,68 ميلليون گەكتار ەگىستىك القابىنان ەل ىرىزدىعىن شاشپاي-توكپەي جيناپ الدى. گەكتار بەرەكەسى ورتاشا ەسەپپەن 16,3 تسەنتنەردەن اينالدى. ءبىر قۋانارلىعى, جينالعان استىقتىڭ 75%-ى جوعارى ساپالى. كۇزگى جيىن-تەرىن ۋاقىتىندا جانقيارلىقپەن جۇمىس ىستەگەن اۋىل شارۋاشىلىعى ەڭبەككەرلەرى الا جازداي كۇتىپ-باپتاعان القاپتاردان 650 مىڭ توننا مايلى داقىلداردى جينادى. بۇل تاراپتاعى ءونىم دە رەكوردتىق ناتيجە.
ءتۇندى كۇنگە, كۇندى تۇنگە ۇلاستىرىپ, ەسەلى ەڭبەك ەتكەن ديقاندار مۇنداي تولىمدى تابىسقا ەڭ الدىمەن اۋا رايىنىڭ قولايلىعى سەبەپ بولعاندىعىن ايتىپ وتىر. سان جىلدار بويى باي تاجىريبە جيناقتاعان دالا ەرلەرى زاماناۋي اگروتەحنيكالىق شارالاردى ءتيىمدى پايدالانىپ, جەردىڭ ءتىلىن تابا بىلگەندىگى دە بار. شارۋانىڭ تياناقتى اتقارىلۋىنا «كەڭ دالا-2» باعدارلاماسى ارقىلى بەرىلگەن قارجىلىق دەمەۋ دە سەپتىگىن تيگىزدى. 930 اۋىل شارۋاشىلىعى قۇرىلىمى 118,5 ملرد تەڭگە بولاتىن جەڭىلدەتىلگەن نەسيەگە يە بولدى. ەگىستىك القاپتارى 336 مىڭ توننا مينەرالدى تىڭايتقىشتارمەن بايىتىلدى. اۋىل شارۋاشىلىعى قۇرىلىمدارى 1,5 مىڭ دانا اۋىل شارۋاشىلىعى تەحنيكالارىمەن جاراقتاندىرىلدى.
وبلىستىق اۋىل شارۋاشىلىعى جانە جەر قاتىناستارى باسقارماسىنىڭ مالىمدەۋىنشە, قۇت قامباسىنا قۇيىلعان استىقتىڭ ساپالى بولۋى سۇرانىس كولەمىن ۇلعايتادى. ىشكى قاجەتتىلىكتى وتەۋمەن قاتار, ەكسپورتقا شىعارۋعا دا جاعداي بار. وبلىستىڭ استىق قويمالارىنا 7,2 ملن توننا ءونىم سيادى. بۇل جاي استىقتىڭ باعاسى وسكەنگە دەيىن ساقتاۋعا مۇمكىندىك بەرەدى.
تولاعاي تابىسقا قول جەتكىزۋدىڭ سىرى تۋرالى ءبىراۋىز ءسوز ايتا كەتەلىك. ول ەڭ الدىمەن اۋىل شارۋاشىلىعى قۇرىلىمدارىنىڭ ماتەريالدىق-تەحنيكالىق بازاسىنىڭ كوپ-كورىم جاقسارۋىنا بايلانىستى. ونسىز كوكتەمگى, كۇزگى دالا جۇمىستارىن تىڭعىلىقتى جۇرگىزۋ قيىنعا سوعادى. جىل باسىنان بەرى ءوڭىردىڭ اۋىل شارۋاشىلىعى قۇرىلىمدارى جالپى قۇنى 57,1 ملرد تەڭگە بولاتىن 1 562 اۋىل شارۋاشىلىعى تەحنيكاسىن ساتىپ الدى. ونىڭ ىشىندە 159 استىق كومباينى, 319 تراكتور, 53 ەگىس كەشەنى, وزگە دە تەحنيكالار بار. فەرمەرلەرگە ءار ءليترى 254 تەڭگە بولاتىن 84,4 مىڭ توننا ديزەل وتىنى جەڭىلدەتىلگەن باعامەن ءبولىندى. ۇكىمەتتىڭ استىق جانە مايلى داقىلداردى كەپتىرۋگە 11 مىڭ توننا ديزەل وتىنىن بولگەنى دە دەر كەزىندە كورسەتىلگەن كومەك بولدى.
استىقتىڭ بويىنداعى ىلعالدى كەپتىرۋگە دە بار كۇش-جىگەر جۇمسالدى. 264 استىق كەپتىرەتىن قۇرىلعى كىدىرىسسىز جۇمىس ىستەپ تۇردى. كەلەر جىلدىڭ قامىن ويلاعان ديقاندار 539,8 مىڭ توننا ساپالى تۇقىمدى قامبالارىنا قۇيىپ الدى. ساپالى تۇقىم كەلەسى جىلعى ىرىزدىقتىڭ كەپىلى. 2025 جىلدىڭ قورىتىندىسىندا ءوڭىر ەڭبەككەرلەرى 1,2 ترلن تەڭگەنىڭ اۋىل شارۋاشىلىعى ونىمدەرىن ءوندىردى.
بەرەكە ىنتىماعى ۇيىعان, ويعا العان ءىسىن تاپ-تۇيناقتاي ەتىپ اتقاراتىن جەرگە بىتەدى. بىتىك ەگىن ءوسىرۋ جولىندا ديقاندار ماڭداي تەرىن مونشاقتاتىپ ءجۇرىپ ەڭبەك ەتتى. 4,2 ملن گا القاپتىڭ ءارامشوبىن جويۋ ماقساتىندا حيميالىق وڭدەۋ جۇرگىزىلدى. بۇل كورسەتكىش كوزدەلگەن جوسپاردان 6%-عا ارتىق. شەگىرتكەگە قارسى 328 مىڭ گا القاپ قورعالدى. كورسەتكىش 2024 جىلمەن سالىستىرعاندا 1,8 ەسە كوپ. ەگىستىك القاپتاردى زيانكەستەر مەن اۋرۋلاردان ساقتاۋ ماقساتىندا 2 ملن گا ەگىستىك القابى وڭدەلدى. بۇل كورسەتكىش وتكەن جىلمەن سالىستىرعاندا ەكى ەسە كوپ. مينەرالدى تىڭايتقىشتارمەن القاپتاردى بايىتۋ كولەمى دە ءۇش ەسە ارتتى. مىنە, وسىنداي ىلكىمدى ىستەردىڭ ارقاسىندا اقىق ءدان ايالاعان ءوڭىر ديقاندارى تاماشا تابىسقا كەنەلىپ, ەل ىرىزدىعىن مولايتۋعا ۇلەس قوستى.
وڭىردەگى ەگىنشىلىك مادەنيەتىن جەتىلدىرۋ ارقاسىندا مول ءونىم العان شارۋاشىلىقتاردى ەرەكشە اتاپ وتكەن ءجون. ساندىقتاۋ اۋدانىنداعى «سۆوبودنوە» جاۋاپكەرشىلىگى شەكتەۋلى سەرىكتەستىگى 13 993,5 گا القاپقا ءداندى داقىلدار تۇقىمىن ءسىڭىرىپ, گەكتار بەرەكەسىن 37,4 تسەنتەردەن اينالدىردى. وسى اۋدانداعى «بەلگورودسكوە» سەرىكتەستىگى 11 991 گا القاپقا ەگىن ەككەن بولاتىن. ءار گەكتاردان 32,5 تسەنتنەردەن استىق جينادى. بۇلاندى اۋدانىنداعى جىل سايىن جوعارى كورسەتكىشكە قول جەتكىزىپ جۇرگەن «جۋراۆلەۆكا-1» جاۋاپكەرشىلىگى شەكتەۋلى سەرىكتەستىگى ءار گەكتاردان 32,2 تسەنتنەردەن ءونىم جينادى. وڭىردە مۇنداي ءونىمدى جۇمىس ىستەگەن سەرىكتەستىكتەر جەتەرلىك. جوعارى ءونىم ەرەن ەڭبەكتىڭ ناتيجەسى, ديقاندار قاۋىمىنىڭ قاجىرلى قيمىلىنىڭ وتەۋى.
اقمولا وبلىسى
