ءىس-شارانىڭ نەگىزگى ماقساتى – قازاق عىلىمى مەن ءبىلىمىنىڭ ىرگەتاسىن قالاعان تۇلعالاردىڭ رۋحاني مۇراسىن جاڭعىرتۋ, سونداي-اق ۇلتتىق پەداگوگيكا ءداستۇرى مەن زاماناۋي ءبىلىم بەرۋ اراسىنداعى ساباقتاستىقتى نىعايتۋ. ءدارىسحانانىڭ لەنتاسىن اكادەميك مۇرات جۇرىنوۆ پەن الەمگە تانىمال ماتەماتيك, اكادەميك مۇحتارباي وتەلباەۆ قيدى.
فيزيكا-ماتەماتيكا فاكۋلتەتىنىڭ جانىنان اشىلعان جاڭا ءدارىسحانا زاماناۋي وقۋ جابدىقتارىمەن, ينتەراكتيۆتى تاقتامەن جانە عىلىمي-ادىستەمەلىك ماتەريالدارمەن تولىق قامتاماسىز ەتىلگەن. اۋديتوريادا مىرجاقىپ دۋلات ۇلىنىڭ ءومىرى مەن شىعارماشىلىعىن تانىتاتىن كورنەكى اقپاراتتار, سيرەك باسىلىمداردىڭ كوشىرمەلەرى جانە اعارتۋشىنىڭ ايگىلى «ەسەپ قۇرالى» اتتى ەڭبەكتەرىنىڭ تسيفرلىق نۇسقالارى ورنالاستىرىلعان.
سالتاناتتى باسقوسۋدى ۋنيۆەرسيتەتتىڭ باسقارما توراعاسى-رەكتور بولات تىلەپ اشىپ, مىرجاقىپ دۋلات ۇلىنىڭ پەداگوگيكالىق جانە عىلىمي مۇراسىنىڭ بۇگىنگى ۇرپاق ءۇشىن ماڭىزدىلىعىن اتاپ ءوتتى.
– الاش ارىستارىنىڭ ءبىرى مىرجاقىپ دۋلات ۇلىنا ءدارىسحانا اشۋىمىزدىڭ سەبەبى ايقىن. اباي اتىنداعى قازاق ۇلتتىق پەداگوگيكالىق ۋنيۆەرسيتەتى – تۇڭعىش جوعارى وقۋ ورىنى. ال وسى تاريحى ارىدەن باستالاتىن قاسيەتتى قارا شاڭىراقتىڭ اشىلۋىندا الاش ارىستارىنىڭ ەڭبەگى وتە زور. ۇلت ماقتانىشتارى احمەت بايتۇرسىن ۇلى, حالەل دوسمۇحامەدوۆ, وراز جاندوسوۆ, سانجار اسفەندياروۆ, ساكەن سەيفۋللين, ءىلياس قابىلوۆ, بايمەن المانوۆ, تەمىربەك جۇرگەنوۆ ءدارىس وقىدى. ءالىپبيدىڭ تۇڭعىش اۆتورى احمەت بايتۇرسىن ۇلى سەكىلدى ولاردىڭ كوپشىلىگى تالاي ءىستىڭ تۇڭعىشتارى سانالادى. قازىردە قازۇپۋ – كوشباسشى پەداگوگيكالىق وقۋ ورنى رەتىندە قازاقستان مەن ورتالىق ازيادا الدىڭعى قاتاردا تۇر, – دەدى اباي اتىنداعى قازۇپۋ باسقارما توراعاسى-رەكتورى بولات تىلەپ.
تۇساۋكەسەر راسىمىندە ءسوز العان اكادەميك, عالىمدار م.جۇرىنوۆ, م.وتەلباەۆ, م.قويگەلديەۆ, ا.جارمەنوۆ, م.سادىبەكوۆ, وسى ۋنيۆەرسيتەت تۇلەگى, الماتى قالاسى مادەنيەت باسقارماسىنىڭ باسشىسى دانيار اليەۆ مىرجاقىپ دۋلات ۇلىنىڭ قوعامدىق-ساياسي جانە اعارتۋشىلىق قىزمەتىن بايانداپ بەردى.
جيىننىڭ قۇرمەتتى قوناعى – مىرجاقىپ دۋلات ۇلىنىڭ جيەنى, اۋديتوريانىڭ جاساقتالۋىنا دەمەۋشىلىك جاساعان «مەكتەپ» باسپاسىنىڭ باس ديرەكتورى ەرلان ساتىبالديەۆ ۋنيۆەرسيتەت ۇجىمىنا اعارتۋشى ەسىمىن ۇلىقتاۋعا باعىتتالعان باستاما ءۇشىن العىسىن ءبىلدىرىپ, ءبىرتۋار تۇلعا ۇرپاقتارى اتىنان جوو باسشىلى-عىنا جانە سالتاناتتى جيىنعا قاتىس-قان مارتەبەلى قوناقتارعا «مىرجاقىپ دۋلات ۇلى» مەدالىن تابىس ەتتى.
