مادەني شارا قازاقستان رەسپۋبليكاسىنىڭ ەلشىلىگىمەن تاراس شەۆچەنكو اتىنداعى كيەۆتىك ورتالىق ساياباعى اۋماعىنداعى قازاق كيىز ۇيىندە ۋكراينا جوعارعى راداسى دەپۋتاتتارىنىڭ, جامبىل جاباەۆ اتىنداعى كيەۆتىك قوعامدىق كىتاپحاناسىنىڭ, «انالار ءۇيى» باسشىلىعىنىڭ جانە بىرقاتار ەرىكتى بالالار ۇيىمدارىنىڭ, سونداي-اق قازاق دياسپوراسى وكىلدەرىنىڭ, جاس وقىرماندار مەن اتا-انالارىنىڭ قاتىسۋىمەن ۇيىمداستىرىلدى.
ايتۋلى وقيعا بارىسىندا انيماتورلاردىڭ كورسەتىلىمدەرى, بايقاۋلار مەن شەبەرلىك سىنىپتارى وتكىزىلدى.
قازاقستان رەسپۋبليكاسىنىڭ ەلشىسى تولەجان بارلىباەۆ جاڭا كىتاپتى كوپشىلىككە تانىستىرا وتىرىپ, قازاق اۋىزشا فولكلورىنىڭ كوركەمدىك قۇندىلىعىن, ونىڭ جانرلىق الۋان تۇرلىلىگى مەن تىلدىك بايلىعىنا توقتالدى.
ەجەلگى ەرتەگىلەرىمىزدەگى عاسىرلار بويى قالىپتاسقان حالىق دانالىعى مەن ال ونى ءبىلۋ جاس ۋكراينالىق وقىرماندارعا قازاقتىڭ سالت-داستۇرلەرى مەن ادەت-عۇرىپتارىن تەرەڭىرەك بىلۋگە مۇمكىندىك بەرەتىنى تىلگە تيەك بولدى.
وسى ورايدا تاراس شەۆچەنكونىڭ شىعارماشىلىق مۇراسىنا باعىشتالعان مادەني بايلانىستاردى نىعايتۋدىڭ ماڭىزدىلىعىن اتاپ ءوتىپ, ديپلومات ونىڭ تۋعانىنا 212 جىل تولۋىنا وراي ۇلى كوبزار شىعارماشىلىعىنىڭ قازاق كەزەڭى جونىندە سۋرەتتەلگەن مونوگرافيا باسىلىمعا دايىندالىپ جاتقانىن حابارلادى.
ۋكراينانىڭ حالىق دەپۋتاتى سەرگەي ناگورنياك قازاقستاندىقتاردى رەسپۋبليكا كۇنىمەن قۇتتىقتادى جانە قازاقستاننىڭ ۇلتتىق مەرەكەسىنە وراي ىزگى تىلەكتەرىن ءبىلدىردى. پارلامەنت مۇشەسى ەكى ەل حالىقتارىنىڭ ءداستۇرلى دوستىق قارىم-قاتىناستارى مەن ەكىجاقتى ىنتىماقتاستىقتى دامىتۋ بولاشاعىنا جوعارى باعا بەردى. ول ۋكراينادان بالالار توبى ءۇشىن قازاقستاندىق «بالداۋرەن» وقۋ-ساۋىقتىرۋ ورتالىعىنا جازعى قايىرىمدىلىق تۋرىن ۇيىمداستىرۋعا كومەكتەسكەنى ءۇشىن قازاقستان تاراپىنا العىسىن ءبىلدىردى.
جامبىل جاباەۆ اتىنداعى كىتاپحاناسىنىڭ, «انالار ءۇيى», قوعامدىق بالالار ۇيىمدارى مەن قازاق دياسپوراسىنىڭ وكىلدەرى ەرتەگىلەر كىتابىن ۋكرايناداعى كىتاپحانالارىنا تاپسىرعانى ءۇشىن شىنايى العىستارىن ءبىلدىردى.
كوركەم سۋرەتتەرى بار, ۇلتتىق بوياۋمەن تولتىرىلعان قازاقتىڭ ءداستۇرلى ەرتەگىلەرىنىڭ كولەمدى جيناعى (256 بەت) ۋكراين بالالارىنىڭ ۇلكەن قىزىعۋشىلىعىن تۋدىراتىنى باسا ايتىلدى. مادەني اكتسيانىڭ بارلىق جاس قاتىسۋشىلارى ەرتەگىلەر كىتابىن سىيلىققا الدى.
« ۇلى دالانىڭ سيقىرلى اڭىزدارى» جيناعىنا 38 ەرتەگى – «الپامىس», «الدار-كوسە», «ابات باتىر», «كۇنىكەي سۇلۋ», «ەر توستىك», «اۋەز حاننىڭ قىرىق ۇلى», «جىگىت پەن قاسقىر» جانە تاعى باسقالارى كىردى. 2,5 مىڭ دانالىق تارالىممەن كىتاپ ۋكراينا كىتاپحانالارى مەن مەكتەپتەرگە, بالالار ۇيلەرى مەن باسقا دا الەۋمەتتىك مەكەمەلەرگە تاراتىلماق.
