ششۋچە قالاسىنداعى مارفۋعا بەكتەمىروۆا اتىنداعى كوشەدە ءبىلىمنىڭ قارا شاڭىراعى ساناتىنداعى قازاق مەكتەپ-ينتەرناتى ورنالاسقان. اقىن وسى مەكتەپتە ءبىلىم العان. تۋعان جەرگە دەگەن پەرزەنتتىك پەيىلى, تاڭنىڭ ءمولدىر شىعىنداي ماحابباتى مولدىرەپ تۇرعان جىرلارىمەن تانىمال مارفۋعا بەكتەمىروۆا وقىعان كابينەتكە اقىننىڭ اياۋلى ەسىمى بەرىلدى. وندا اۆتوردىڭ شىعارماسىمەن تانىسىپ, رۋحىمەن سىرلاسۋعا ارنالعان كەزدەسۋ بولدى. اقىن اتىنداعى قايتا جابدىقتالعان كابينەتتىڭ اشىلۋ سالتاناتىندا بۋراباي اۋدانى اكىمىنىڭ ورىنباسارى مەرەي رامازان قۇتتىقتاۋ ءسوز سويلەسە, ەتنوگراف, تاريح عىلىمىنىڭ دوكتورى جامبىل ارتىقباەۆ, قازاقستان رەسپۋبليكاسى ورتالىق ارداگەرلەر كەڭەسىنىڭ مۇشەسى بولات تەمىرباەۆ, ەل اعاسى سەرىك ءسابيتوۆ مارفۋعا مۇراسى تۋرالى تەرەڭنەن تولعاپ سىر شەرتتى. اقىننىڭ جارى, حالىقارالىق «الاش» سىيلىعىنىڭ لاۋرەاتى ەسەنگەلدى ءسۇيىنوۆ مارفۋعا مۇراسىن ناسيحاتتاۋ بارىسىنداعى اتقارىلىپ جاتقان شارۋالارعا توقتالدى. كوكىرەگىندە جاتتالىپ قالعان جان تەبىرەنتەرلىك ادەمى ەستەلىكتەرىمەن ءبولىستى.
اقىن ءومىرى ىزگىلىكتەر الەمى. ونەگەلى ءومىر جولىنان ورىلگەن ەستى ەستەلىكتەر كەيىنگىلەر ءۇشىن عيبرات. كابينەتتە ءبىلىم الىپ جاتقان وقۋشىلار اقىن ولەڭدەرىن, وزدەرىنىڭ تىرناقالدى جىرلارىن وقىپ, كوپشىلىك كوڭىلىن ءبىر سەرپىلتىپ تاستادى. بار عۇمىرىن بوز دالانىڭ بوزتورعايى ىسپەتتى تۋعان توپىراعىن جىرلاۋعا ارناعان مارفۋعانىڭ ءوزى «تۇسىنسە ۇرپاعىما ماڭگى ولمەيتىن, ولەڭنەن ءبىر ەسكەرتكىش قالدىرامىن» دەپتى. ايتسا ايتقانداي, ومىرشەڭ ولەڭدەرىمەن عيبراتتى عۇمىرىن وسكەلەڭ ۇرپاققا ونەگە ەتكەنى دە شىندىق. زامانىندا شىعارماشىلىعى تۋرالى مەملەكەتتىك سىيلىقتىڭ لاۋرەاتى اقسەلەۋ سەيدىمبەك پايىمدى پىكىر بىلدىرگەن ەكەن. «مارفۋعا بەكتەمىروۆا شىنايى سەزىمنىڭ اقىنى. ونىڭ ولەڭدەرىنىڭ التىن ارقاۋى – ادام, قوعام, تابيعات. تۇپتەپ كەلگەندە, ونەر اتاۋلىنىڭ تۇعىرى دا وسى ۇشتاعان. ءبىر-بىرىمەن ۇلى تۇتاستىقتا بولاتىن وسى ۇشتاعان قۇبىلىستان مارفۋعا ءبارىن-ءبارىن دە تابا العان, تاني العان. ونىڭ ولەڭدەرىن وقىعاندا جۇرەگىڭ تازارادى, ۇلكەن ارماننىڭ الديىنە بولەنەسىڭ. تۋعان جەرىڭنىڭ قادىر-قاسيەتىن تەرەڭىرەك سەزىنە تۇسەسىڭ».
اقىن شىعارماشىلىعىنىڭ شىنايى باعاسى وسى. كەش سوڭىندا ءبىلىم وشاعىنىڭ ونەرپازدارى مارفۋعا بەكتەمىروۆانىڭ سوزىنە جازىلعان اندەردى, ءتول اندەرىن ورىنداپ, جينالعان قاۋىمنىڭ كوڭىلىن ءبىر كوتەردى.
اقمولا وبلىسى
