كورمەگە 20 كيمەشەك قويىلدى. جادىگەرلەر قاتارىندا جيىرماسىنشى عاسىردىڭ باسىندا كۇمىسپەن ورنەكتەلىپ تىگىلگەن باس كيىم بار. قازاقتىڭ ۇلتتىق باس كيىمى كيمەشەكتى كيۋ مەن سىرتىنان شىلاۋىش تارتۋ ءار وڭىردە ءارتۇرلى بولعان.
«كورمەنى ۇيىمداستىرۋداعى ماقسات – كيمەشەكتىڭ قازاق تۇرمىسىنداعى ورنىن ۇعىندىرۋ», دەيدى قولونەر شەبەرلەرى. سەبەبى, كەيىنگى بۋىن ونى مەرەكە كۇندەرى عانا ىزدەيتىن بولعان.
«بۇل كورمەنى ۇيىمداستىرۋداعى ماقساتىمىز ءبىرىنشى كەزەكتە قازاققا ءوزىنىڭ ۇلتتىق كيىمىن تانىتۋ. مىنە بۇل سەنىڭ ءوزىڭنىڭ كيىمىڭ, مىنانى اجەلەرىڭ كيگەن, اتا-بابالارىڭ كيگەن كيىم وسى, قازاقتىڭ كيىمىنىڭ ۇلتتىق ورنەگى وسىنداي بولعان. سوندىقتان وسى «كيەلى كيمەشەك» ارقىلى بارلىق قازاقتىڭ ۇلتتىق كيىمىن, ءداستۇرىن كورسەتۋ, قازاققا ءوزىن-ءوزى تانىتۋ دەگەن ماقساتتا جاسالعان جوبا», دەيدى كورمەنى ۇيىمداستىرۋشى تۇرار شاكەن.
كورمەگە جەزقازعان مۋزەيىندە جانە قولونەر شەبەرلەرىنىڭ جەكە قورىندا ساقتالعان كيمەشەكتەر قويىلعان. ماسەلەن, بەلگىلى ەتنوديزاينەر تىلەك سۇلتان قازاقستاننىڭ ءار وڭىرىنە ءتان 19 كيمەشەكتىڭ ۇلگىسىن ۇسىندى. ونىڭ باسىم بولىگى تۇپنۇسقا. ەڭ كونەسى جيىرماسىنشى عاسىر باسىندا تىگىلگەن.
ەڭ كونەلەرى 100 جىلدان اسىپ كەتكەن كيمەشەكتەر. ياعني 20-30 جىلدارعا دەيىن تىگىلگەن. كورمەگە كەلگەن جۇرت كيمەشەكتىڭ تۇرلەرىمەن تانىسىپ قانا قويماي, وعان قاتىستى سالت-داستۇرگە دە قانىعادى. وزگە دە قازاقتىڭ ءداستۇرلى كيىمدەرىنىڭ ءسان كورسەتىلىمىن تاماشالايدى. ۇلتتىق كيىمگە قىزىعۋشىلىعى بار جاستارعا ارنالعان شەبەرلىك ساباقتارى وتەدى. وندا كيمەشەككە كۇندىك وراۋ جانە شىلاۋىش تارتۋ ادىستەرى ۇيرەتىلەدى.
