فوتو: اقوردا
قاسىم-جومارت توقاەۆ ءوز سوزىندە باسەكەگە قابىلەتتى ەل بولۋ ءۇشىن, ەڭ الدىمەن, ءبىلىم-عىلىمدى دامىتۋ قاجەت ەكەنىن ايرىقشا اتاپ ءوتتى.
«قازاقستان – كونستيتۋتسيا بويىنشا الەۋمەتتىك مەملەكەت. سوندىقتان ءبىز وسى جاۋاپتى, قۇرمەتتى ميسسيانى مىندەتتى تۇردە ورىندايمىز. الەۋمەتتىك ستراتەگيامىز ءتيىمدى, ادىلەتتى بولۋى كەرەك. «ۇلتتىق قور – بالالارعا» باعدارلاماسىن جۇزەگە اسىرىپ جاتىرمىز. بۇل وسكەلەڭ ۇرپاق ءۇشىن جاسالعان ۇلكەن قادام. ءبىز وزىق ويلى ۇلت بولۋىمىز كەرەك. باسەكەگە قابىلەتتى ەل بولۋ ءۇشىن, ەڭ الدىمەن, ءبىلىم-عىلىمدى دامىتۋ قاجەت. سوندىقتان بەس جىلدا ءبىلىم بەرۋ سالاسىنا بولىنەتىن قارجىنى ءۇش ەسە ارتتىردىق. ۇستازداردىڭ جالاقىسىن ەكى ەسە ۇلعايتتىق. قازىرگى تاڭدا قوعامىمىزدا مۇعالىم ماماندىعىنىڭ مارتەبەسى اناعۇرلىم كوتەرىلدى. 1200 جاڭا مەكتەپ اشتىق. سونىڭ ىشىندە «كەلەشەك مەكتەپتەرى» ۇلتتىق جوباسى اياسىندا كوپتەگەن ءبىلىم ورداسى بوي كوتەردى. ۇلتتىق عىلىمدى قولداۋعا دا ءمان بەرىپ وتىرمىز. بۇل سالاعا سالىنعان قاراجات بەس جىلدا 5 ەسە ءوستى. شەتەلدىڭ 33 بەدەلدى ۋنيۆەرسيتەتتەرىنىڭ فيليالى اشىلدى. سونداي-اق ۇلت ساۋلىعىن جاقسارتۋ ءۇشىن جۇيەلى شارالار قابىلداندى. 2020 جىلدان بەرى مەديتسينا سالاسىنا بولىنەتىن قارجى 3 ەسە ارتتى. 927 مەديتسينا نىسانى اشىلدى. ەلىمىزدەگى ورتاشا ءومىر ءسۇرۋ ۇزاقتىعى 75 جاستان استى», دەدى ق.توقاەۆ.
