فوتو: spec-rental.com.ua
بۇل ءىس اتىراۋ قالالىق اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىندا قارالدى. ءۇش جىگىتكە اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگىمەن «ۇساق بۇزاقىلىق) حاتتاما تولتىرىلعان.
«ازامات ج., ع. جانە د. 2025 جىلعى 14 قازاندا 15 ساعات 10 مينۋت شاماسىندا اتىراۋ قالاسىنداعى كافەنىڭ الدىندا قوعامدىق ءتارتىپتى بۇزىپ, الداۋ-قالجىڭ (پرانك) بەينەجازباسىن ءتۇسىرۋ ماقساتىندا قىزدى ايقاي-شۋمەن كۇشتەپ كولىك قۇرالىنا وتىرعىزعان. جەكە تۇلعالاردىڭ تىنىشتىعىن بۇزىپ, اينالاسىنداعىلارعا سىيلاماۋشىلىق ءبىلدىرىپ, ۇساق بۇزاقىلىق ارەكەتىن جاساعان. ولاردىڭ كىناسى اكىمشىلىك قۇقىق بۇزۋشىلىق تۋرالى حاتتامالارمەن, فوتوسۋرەتپەن, بەينەجازبامەن جانە باسقادا ماتەريالدارمەن تولىق دالەلدەندى», دەپ حابارلادى اتالعان سوتتان.
سوت قاۋلىلارىمەن ج., ع. جانە د. اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلدى. قۇقىق بۇزۋشىلاردىڭ ارقايسىسىنا 78 مىڭ 640 تەڭگە كولەمىندە اكىمشىلىك ايىپپۇل سالىندى», دەپ مالىمدەدى سوتتان.
سوت قاۋلىلارى زاڭدى كۇشىنە ەنگەن جوق.
