«قايرات» كلۋبىنىڭ باس باپكەرى رافاەل ۋرازباحتين ماتچتان كەيىنگى ءباسپاسوز ءماسليحاتىندا جەڭىسكە جەتىپ, ماڭىزدى ءۇش ۇپاي ەنشىلەۋگە دە مۇمكىندىك بولعانىن ايتتى.
– قارسىلاس كلۋبتىڭ الەۋەتى جوعارى, تەگەۋرىندى ۇجىم. بۇعان دەيىن گرەكيالىق «وليمپياكوس» كلۋبىنا قارسى ويىندا دا ولار ون ويىنشىمەن تارتىسقا ءتۇستى. ءبىزدىڭ جىگىتتەرگە قارسى ماتچتا ءتىپتى 90 مينۋتتاي ءبىر فۋتبولشىنىڭ كەمدىگىن بىلدىرمەي, قورعانىستا دا, شابۋىلدا دا ابجىلدىك تانىتتى. دوپقا يەلىك ەتىپ, قىسىمدى كۇشەيتىپ, باسىمدىقتى ۋىستا ۇستاعان ءبىزدىڭ جىگىتتەردىڭ دە گول سوعاتىن مۇمكىندىگى بولدى. قاقپاشى تەمىرلان اناربەكوۆ بىرنەشە جويقىن سوققىنى قايتارىپ شەبەرلىك تانىتتى. جالپى, ۇجىمدىق ويىن ۇلگىسىن كورسەتە الدىق. كەمشىلىك تە جوق ەمەس, ءالى دە شىڭدالا ءتۇسۋ قاجەت. ستاديونعا كەلىپ قولداعان جانكۇيەرلەرگە ەرەكشە العىس ايتامىن, تەك ولاردى جەڭىسىمىزبەن قۋانتا المادىق. الدا ءالى دە ماڭىزدى ويىندار بار, ەڭسەمىزدى تۇسىرمەيمىز, – دەدى باس باپكەر.
ويىننىڭ نەبارى 4-مينۋتىندا «پافوستىڭ» قورعاۋشىسى جواۋ كوررەيا ەرەجەنى ورەسكەل بۇزىپ, الاڭنان قۋىلدى. قورعاۋشىنىڭ كەمدىگىنە قاراماستان قارسىلاس كلۋبتىڭ ويىنشىلارى ەڭسەسىن تۇسىرگەن جوق. كەرىسىنشە, 2-تايم ورتا تۇسىنان اۋعاندا «قايراتتىڭ» قورعانىسىن بۇزىپ-جارىپ, دۇركىن-دۇركىن شابۋىلدادى.
الماتىلىق كلۋب ەندى چەمپيوندار ليگاسىنىڭ جالپى كەزەڭىندەگى ءتورتىنشى تۋرىن سىرت الاڭدا وتكىزىپ, 6 قاراشادا يتاليانىڭ «سان سيرو» ستاديونىندا ميلاندىق «ينتەرگە» قارسى وينايدى. ودان بۇرىن دا ءبىر ماڭىزدى ماتچ بار. بيىلعى ەل چەمپيوناتىنىڭ سوڭعى تۋرىندا, 26 قازان كۇنى ەلوردالىق «استانا» كلۋبىمەن تارتىسقا تۇسەدى. تاعدىرشەشتى ماتچتا قاي جەڭگەنى ەل چەمپيونى اتانادى.
