جاستار جالىنداعان چەمپيونات

جۇلدەسىز قالعان جامپوزدار

قۇراما ساپىندا حالىقارالىق تۋرنيرگە قاتىسىپ, باعىن سىناپ جۇرگەن بوكسشىلاردىڭ باسەكەسى بيىل دا تارتىستى ءوتتى. كوپشىلىك الەم چەمپيونى 37 جاستاعى تەمىرتاس جۇسىپوۆكە زور سەنىم ارتقان ەدى. بۇعان دەيىن 48 كگ سالماقتا رينگكە شىعىپ جۇرگەن ول, بيىل 50 كگ سالماقتا باق سىنادى. العاشقى كەزدەسۋىندە ءبىرجان نۇرىمبەتوۆتى جەڭگەنىمەن, 1/4 فينالدا نۇرسۇلتان نۇريدەنوۆتەن ايلاسىن اسىرا المادى. تەمىرتاس ءجيى قاتەلىككە بوي الدىرىپ, جەڭىستى ۋىسىنان شىعارىپ الدى. وسىلايشا, ەلىمىزدىڭ 8 دۇركىن چەمپيونى سەمەي تورىنەن قۇر قول قايتتى.

– جۇلدەسىز قالعانىما ەش وكىنبەيمىن. بارىمدى سالدىم, بىراق قارسىلاسىم مەنەن الدەقايدا جاس, شاپشاڭ قيمىلداپ, بەلسەندى بولدى. جۇمىس ىستەۋىم كەرەك. بوكستى جالعاستىرامىن با, الدە باسقا سالاعا كەتەمىن بە, ونى الداعى كۇندەر كورسەتەدى, – دەدى ت.ءجۇسىپوۆ.

جۇلدەسىز قالعانداردىڭ اراسىندا 2017 جىلعى الەم چەمپيوناتىنىڭ كۇمىس جۇل­دەگەرى ءابىلحان امانقۇل دا بار. 2021 جىلى توكيو وليمپياداسىنىڭ شيرەك فينالىندا سۇرىنگەننەن كەيىن كاسىپقوي بوكستا باق سىناعان ءابىلحان ءتورت جىلدىق ۇزىلىستەن كەيىن قايتا ەل بىرىنشىلىگىندە بوي كورسەتتى. ءبىرىنشى جەكپە-جەگىندە جەڭىسكە جەتكەن ول دودانى شيرەك فينالدان اياقتادى.

60 كگ سالماقتا ەل چەمپيونى تالعات سىرىم­بەتوۆ اتاعىن قورعاي المادى. 1/8 فينالدا وعان جاستار اراسىنداعى الەم چەم­پيوناتىنىڭ قولا جۇلدەگەرى جانسەرى كو­شەر­باەۆ قارسىلاس اتاندى. جاس بوكسشى ساۋاتتى قيمىلىنىڭ ارقاسىندا ءبىرىنشى راۋندتى ءوز ەنشىسىنە جازدى. ەكىنشى راۋندتا قوس بوكسشى باسپەن سوقتىعىسىپ, ايقاس ۋاقىتىنان بۇرىن توقتاتىلدى. ناتيجەسىندە, تورەشىلەردىڭ شەشىمىمەن ج.كوشەرباەۆ 4:1 ەسەبىمەن جەڭىسكە جەتتى. جانسەرى العاشقى اينالىمدا ەل چەمپيونى ەربولات سابىردى توقتاتقان ەدى.

بىلتىر قاراعاندىدا وتكەن بىرىنشىلىكتە 86 كگ سالماقتا قارسىلاسىنىڭ بارلىعىن قوعاداي جاپىرعان تەمىرلان مۇقاتاەۆ 90 كگ سالماققا اۋىسىپ, ەكىنشى كەزدەسۋىندە جارىستان شىعىپ قالدى. شيرەك فينالدا كوپشىلىكتىڭ اسىعا كۇتكەن كەزدەسۋى سانجار-ءالي بەگاليەۆ پەن ەلىمىزدىڭ بىرنەشە دۇركىن جۇلدەگەرى, الەم چەمپيوناتىنا قاتىسۋشى نۇرقانات رايىستىڭ ايقاسى نەبارى ءبىر مينۋتقا عانا سوزىلدى. جاستار اراسىندا الەم چەمپيونى سانجار-ءالي جويقىن سوققىسىمەن نۇرقاناتتى نوكاۋتقا جىبەردى.

ايەلدەر اراسىندا ريو وليمپياداسىنىڭ قولا جۇلدەگەرى داريعا شاكىموۆا 65 كگ سال­ماقتا العاشقى كەزدەسۋىندە-اق جاسوس­پىرىمدەر اراسىندا ازيا چەمپيونى نازەركە سەرىككە قارسىلىق كورسەتە المادى. سونداي-اق الەم بىرىنشىلىگىنىڭ جەڭىمپازى ءلاززات كۇنگەيباەۆا دا بۇل چەمپيوناتتان بوس قايتتى.

جيىرماداعىلار دەس بەرەر ەمەس

جاستار اراسىندا الەم چەمپيوناتىنىڭ بىرنەشە جۇلدەگەرى ۇلتتىق قۇرامانىڭ تىزىمىنە ەندى. اتاپ ايتساق, نۇرزات وڭعاروۆ (20 جاس, 50 كگ), بەكسۇلتان بورانبەك (19 جاس, 55 كگ), يليا كالينين (20 جاس, 65 كگ), نۇربەك مۇرسال (20 جاس, 70 كگ), سانجار-ءالي بەگاليەۆ (20 جاس, 80 كگ), داۋلەت تولەمىسوۆ (19 جاس, 85 كگ), اسلان ەدىلباي ۇلى (19 جاس, +90 كگ) بىرىنشىلىكتىڭ التىن, كۇمىس, قولا جۇلدەگەرى اتاندى.

جىلدىڭ باسىندا العاش رەت 22 جاسقا دەيىنگىلەر اراسىندا ەل چەمپيوناتى ۇيىم­داستىرىلعان ەدى. سول كەزدە فينالعا شىققان بوكسشىلاردىڭ اراسىنان تەك ابدىعالىم ابدىكەرىم (65 كگ) عانا جارتىلاي فينالعا ءوتتى. وكىنىشكە قاراي, مىقتى دەگەن دياس بەرىكباي (50 كگ), نۇريسلام قالدىباەۆ (60 كگ), تىلەۋبەردى سۇلەيمەن (50 كگ), كەنجە مۇرات­ ۇلى (55 كگ), اعاجان قادىر (70 كگ), يسلام بيتاەۆ (80 كگ), ازاتبەك جولداسحان (92 كگ) شيرەك فينالدان اسا المادى.

ەرەسەكتەر اراسىندا تۇڭعىش رەت چەمپيون اتانعانداردىڭ اراسىنان 85 كگ سالماقتاعى داۋلەت تولەمىسوۆ ەڭ جاس جەڭىمپاز اتانسا, ايەلدەر ساپىندا ەلينا بازاروۆا (21 جاس, 54 كگ), ۇلجان سارسەنبەك (20 جاس, 57 كگ), باقىت سەيدىش (20 جاس, 70 كگ), ۆالەريا اكسەنوۆالار دا (24 جاس, +80 كگ) ءوز سالماقتارىندا تۇڭعىش رەت بيىك تۇعىردان كورىندى. ەڭ جاسى ۇلكەن چەمپيون رەتىندە بەس بالانىڭ اناسى ايگەرىم ساتتىباەۆا (34 جاس, 48 كگ) تىركەلدى. ول بۇعان دەيىن 2010 جىلى توپ جارعان ەدى. ەڭ جاس چەمپيون اتاعىن ۇلجان سارسەنبەك (20 جاس) پەن باقىت سەيدىش (70 كگ) يەمدەندى. ەڭ ۇزدىك بوكسشىلار – سابىرجان اققالىقوۆ (75 كگ) پەن جازيرا وراقباەۆا (51 كگ). بەيرەسمي كوماندالىق ەسەپتە تۇركىستان وبلىسى – 4 التىن, 1 كۇمىس, 3 قولا مەدالمەن كوش باس­تاسا, الماتى قالاسى (2+3+6) ەكىنشى ورىننان كورىندى. ۇزدىك ۇشتىكتى شىمكەنت قالاسى تۇيىندەدى (2+2+6).

فينالدىق جەكپە-جەكتەر

فينالدىق باسەكەلەر بارىنشا تارتىستى, قىزىقتى ءوتتى. 55 كگ سالماقتا سىنعا تۇسكەن الەم چەمپيونى ساكەن بيبوسىنوۆ پەن الەم كۋبوگى كەزەڭىنىڭ جەڭىمپازى نۇرسۇلتان التىنبەك اراسىنداعى جەكپە-جەك كورەرمەندەردىڭ ايى­زىن قاندىردى. س.بيبوسىنوۆ جۇدىرىقتاسۋ كەزىندە قارسىلاسىنان بىرنەشە سوققى وتكىزىپ, ناتيجەسىندە ءبىرىنشى راۋندتى 2:3 ەسەبىمەن اياقتادى. دەگەنمەن تاجىريبەنىڭ اتى – تاجىريبە. تەز ءوز-وزىنە كەلگەن ساكەن قالعان ەكى راۋندتا جەڭىسكە لايىقتى جۇدىرىقتاسىپ شىقتى. 60 كگ سالماقتاعى سەرىك تەمىرجانوۆ پەن بيبارىس جەكسەننىڭ جەكپە-جەگى 4:1 ەسەبىمەن اياقتالدى دەمەسەڭىز, ەڭ تارتىستى وتكەن ايقاستىڭ ءبىرى بولدى. 75, 80 كگ سالماق دارەجەلەرىندە تەحنيكالىق نوكاۋت تىركەلدى. سابىرجان اققالىقوۆ ەكىنشى راۋندتا تيمۋر نۇرسەيىتوۆتى تەحنيكالىق نوكاۋتپەن جەڭسە, ەراسىل جاقپەكوۆ ءبىرىنشى راۋندتا-اق دياس مولجىگىتوۆتى سول قولمەن سۇلاتىپ ءتۇسىردى.

فينالدىق جەكپە-جەكتەردىڭ ناتيجەلەرى. ەرلەر: 50 كگ. دانيال ءسابيت (باتىس قازاقستان وبلىسى) – بەكزات الدامجاروۆ (اقتوبە وبلىسى) – 5:0; 55 كگ. ساكەن بيبوسىنوۆ (تۇركىستان وبلىسى) – نۇرسۇلتان التىنبەك (قىزىلوردا وبلىسى) – 5:0; 60 كگ. سەرىك تەمىرجانوۆ (پاۆلودار وبلىسى) – بيبارىس جەكسەن (جامبىل وبلىسى) – 4:1; 65 كگ. ءساناتالى تولتاەۆ (ماڭعىستاۋ وبلىسى) – ەرتۋعان زەينۋللينوۆ (الماتى وبلىسى) – 4:1; 70 كگ. ابىلايحان ءجۇسىپوۆ (قاراعاندى وبلىسى) – فارۋح توقتاسىنوۆ (الماتى) – 5:0; 75 كگ. سابىرجان اققالىقوۆ (قاراعاندى وبلىسى) – تيمۋر نۇرسەيىتوۆ (استانا); 80 كگ. ەراسىل جاقپەكوۆ (اباي وبلىسى) – دياس مولجىگىتوۆ (جامبىل وبلىسى); 85 كگ. داۋلەت تولەمىسوۆ (اقتوبە وبلىسى) – سۇلتانبەك ايبار ۇلى (الماتى) – 5:0; 90 كگ. ساعىندىق توعامباي (تۇركىستان وبلىسى) – نۇرماعامەد يۋسۋپوۆ (قاراعاندى وبلىسى) – 3:2; +90 كگ. نۇرلان ساپارباي (تۇركىستان وبلىسى) – اسلان ەلدىباي ۇلى (قىزىلوردا وبلىسى) – قارسىلاسى جاراقاتىنا بايلانىس­تى جەكپە-جەككە شىقپاعاندىقتان, جەڭىس ساپاربايعا بەرىلدى.

ايەلدەر: 48 كگ. ايگەرىم ساتتىباەۆا (جامبىل وبلىسى) – انەل قۇدايبەرگەن (جەتىسۋ وبلىسى) – 5:0; 51 كگ. جازيرا وراقباەۆا (الماتى) – انيتا ادىشەۆا (قاراعاندى وبلىسى) – 5:0; 54 كگ. ەلينا بازاروۆا (شىمكەنت) – جاينا شەكەربەكوۆا (شىمكەنت) – 4:1; 57 كگ. ۇلجان سارسەنبەك (تۇركىستان وبلىسى) – كارينا يبراگيموۆا (اقمولا وبلىسى) – 5:0; 60 كگ. ريمما ۆولوسەنكو (استانا) – انار تۇرسىنبەك (جەتىسۋ وبلىسى) – 4:1; 65 كگ. لاۋرا ەسەنگەلدى (شىمكەنت) – ارۋجان جاڭاباەۆا (تۇركىستان وبلىسى) – 4:1; 70 كگ. باقىت سەيدىش (الماتى) – ءمادينا نۇرشاەۆا (شىمكەنت) – 3:2; 75 كگ. ۆالەنتينا حالزوۆا (استانا) – ماريا سيدورەنكو (جەتىسۋ وبلىسى) – 5:0; 80 كگ. نادەجدا ريابەتس (قوستاناي وبلىسى) – اناستاسيا رىلينا (قوستاناي وبلىسى) – ريابەتس ءبىرىنشى راۋندتا تەحنيكالىق نوكاۋتپەن جەڭدى; +80 كگ. ۆالەريا اكسەنوۆا (اقمولا وبلىسى) – اسەل توقتاسىن (الماتى) – 4:1.

استانا – سەمەي – استانا