«كۇن تارتىبىندە 2026–2028 جىلدارعا ارنالعان رەسپۋبليكالىق بيۋدجەت جوباسى, ورتالىق پەن وڭىرلەر اراسىنداعى ترانسفەرتتەر تۋرالى زاڭ جوباسى قارالدى. بۇل جىلدىڭ ماڭىزدى وتىرىستارىنىڭ ءبىرى, سوندىقتان مەن, وڭىرلىك تالداۋ ورتالىعىنىڭ اعا زەرتتەۋشىسى رەتىندە, وڭىرلىك اسپەكتىسىنە ەرەكشە نازار اۋداردىم», دەپ جازادى Telegram-ارنا اۆتورى.
قازىرگى تاڭدا قازاقستاندا جيىرما ءوڭىردىڭ ۇشەۋى عانا – الماتى, استانا جانە اتىراۋ وبلىسى – رەسپۋبليكالىق بيۋدجەت دونورلارى بولىپ كەلەدى. قالعان وڭىرلەر ءوز كىرىستەرى جەتپەگەندىكتەن, ورتالىقتان بولىنەتىن ترانسفەرتتەر ەسەبىنەن ءومىر سۇرۋدە. بيۋدجەت جوباسىنا سايكەس, جەرگىلىكتى بيۋدجەتتەردىڭ رەسپۋبليكالىق ترانسفەرتتەرگە تاۋەلدىلىگى 50%-دان 33%-عا دەيىن تومەندەيدى. 2028 جىلعا قاراي پاۆلودار وبلىسى تولىق ءوزىن-ءوزى قامتاماسىز ەتەتىن وڭىرگە اينالىپ, ماڭعىستاۋ وبلىسى قايتادان دونور بولماق.
2026–2028 جىلدارى وڭىرلەردى دامىتۋعا 581 ملرد تەڭگە ءبولۋ جوسپارلانعان, ونىڭ ىشىندە 300 ملرد تەڭگەسى – كەلەسى جىلعا ارنالعان. سونىمەن قاتار, وڭىرلەرگە 5,1 ترلن تەڭگە كولەمىندە ترانسفەرت بولىنەدى. بۇل قاراجاتتىڭ ارتتا قالعان وبلىستاردىڭ ينفراقۇرىلىمىن – جول, سۋ, مەكتەپ جانە مەديتسينا سالالارىن دامىتۋعا باعىتتالۋى اسا ماڭىزدى.
وڭىرلەردەن استانا مەن الماتىعا ىشكى كوشى-قوننىڭ اۋقىمى ەداۋىر ۇلعايعان. قازاقتاردىڭ جاقسى ءومىر ىزدەپ ەلوردا مەن مەگاپوليسكە قونىس اۋدارۋى قۇپيا ەمەس. سول سەبەپتى مەملەكەت وڭىرلەردە دە قولايلى ءومىر ءسۇرۋ جاعدايلارىن جاساۋعا ءتيىس.
وڭىرلەردىڭ باستى ماسەلەسى تەك قارجى تاپشىلىعىندا ەمەس, باسقارۋ ساپاسىندا دا. ەگەر جەرگىلىكتى اكىمدىكتەر بولىنگەن قاراجاتتى ءتيىمدى يگەرە الماسا, بۇل ميللياردتار قاعاز جۇزىندە عانا قالۋى مۇمكىن. سوندىقتان وڭىرلەردىڭ ءوز دامۋ ۇدەرىسىن باسقارۋ قابىلەتىن ارتتىرۋ ماڭىزدى. اتروفياعا ۇشىراعان ءماسليحاتتار مەن قوعامدىق كەڭەستەر جاعدايىندا بۇل مىندەتتى جۇزەگە اسىرۋ قيىن.
«سوعان قاراماستان, قازىرگى بيۋدجەتتىك تسيكل دۇرىس باعىتتى ايقىنداپ وتىر — وڭىرلەرگە كوبىرەك دەربەستىك بەرۋ, ينفراقۇرىلىم مەن ناقتى سەكتوردى دامىتۋعا باسىمدىق جاساۋ. ەڭ باستىسى – ساياسي مالىمدەمەلەردىڭ ارتىنان ناقتى ناتيجەلەر ىلەسۋى كەرەك», دەپ تۇيىندەدى راسۋل قوسپانوۆ.
