ورتالىق يننوۆاتسيالىق تەحنولوگيالار مەن ينجەنەرلىك ءبىلىمنىڭ نەگىزىنە اينالماق. وسى ماقساتتا ورتالىقتا «ۇشقىشسىز ۇشۋ اپپاراتتارىن پايدالانۋ جانە باعدارلامالاۋ» وقۋ باعدارلاماسى ەنگىزىلىپ, ستۋدەنتتەر درونداردى جوبالاۋ, قۇراستىرۋ, باسقارۋ جانە تەحنيكالىق قىزمەت كورسەتۋمەن بايلانىستى كاسىبي قۇزىرەتتىلىكتەردى مەڭگەرەتىن بولادى.
جوباعا كوللەدجدىڭ الەۋمەتتىك سەرىكتەسى حالىقارالىق ءبىلىم بەرۋ جانە يننوۆاتسيالار ورتالىعى مەن قىتايدىڭ Zhongke Borui Education Technology Research Institute ۇيىمى قولداۋ كورسەتتى.
وقۋ-اعارتۋ مينيسترلىگىنىڭ تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆتىڭ ايتۋىنشا, بۇل جوبا تەحنيكالىق جانە كاسىپتىك ءبىلىم بەرۋ جۇيەسىن زاماناۋي تالاپتارعا ساي دامىتۋعا باعىتتالعان جانە ەلدىڭ يننوۆاتسيالىق الەۋەتىن ارتتىرۋعا ۇلەس قوساتىن ءبىلىم مەن يننوۆاتسيا سالاسىنداعى حالىقارالىق ءتيىمدى ىنتىماقتاستىقتىڭ ايقىن ۇلگىسى. ۇشقىشسىز ۇشۋ اپپاراتتارى سالاسىنداعى ءبىلىم بەرۋ باعدارلامالارىن جەتىلدىرۋ ارقىلى ەلىمىز باسەكەگە قابىلەتتى كادرلار دايارلاۋعا مۇمكىندىك الادى.
قۇزىرەتتىلىك ورتالىعى يننوۆاتسيالىق ءبىلىم بەرۋ تەحنولوگيالارىن ەنگىزۋ, ستۋدەنتتەردىڭ روبوتوتەحنيكا, اەروتۇسىرىلىم, 3D-كارتوگرافيا جانە ينفراقۇرىلىمدى مونيتورينگ سالاسىنداعى پراكتيكالىق داعدىلارىن شىڭدايدى. پەداگوگتەر درونداردى وقىتۋ ۇدەرىسىنە دايارلاناتىن بولادى.
كوللەدجدە الداعى ۋاقىتتا حالىقارالىق ترەنينگتەر, شەبەرلىك ساباقتارى مەن ۇشقىشسىز ۇشۋ اپپاراتتارى بويىنشا جارىستار ۇيىمداستىرىلىپ, شەتەلدىك ءبىلىم بەرۋ جانە تەحنولوگيالىق ۇيىمدارمەن سەرىكتەستىك بايلانىستار كەڭەيتىلەدى دەپ جوسپارلانىپ وتىر.
الماتى
