اتاپ ايتساق, گۋزال ابدۋلوۆا 8 جىلدان بەرى قوناەۆ قالاسىنىڭ كوپسالالى اۋرۋحاناسىندا اكۋشەر-گينەكولوگ بولىپ قىزمەت ەتۋدە. ول كۇن سايىن جاڭا ءومىردىڭ باستاۋىنا كۋا بولىپ, انا مەن سابيلەردىڭ اماندىعىنا جاۋاپ بەرەدى.
«رەسپۋبليكا كۇنىن ەرەكشە سەزىممەن قارسى الامىن. 1990 جىلدىڭ 25 قازانىندا دەكلاراتسيا قابىلداندى. سول جىلى دۇنيەگە كەلدىم. بۇل – ەل تاۋەلسىزدىگىنىڭ ىرگەسى قالانعان ماڭىزدى كۇن. 35 جىلدان بەرى ەلىمىز ءتۇرلى قيىندىقتاردان ءوتىپ, جەتىستىكتەرگە جەتتى. ءار ءسابي اشىق اسپان استىندا دۇنيەگە كەلىپ جاتىر. مۇنىڭ ءوزى بارشا جۇرتقا – باقىت. ەندەشە, ەلىمىز ماڭگىلىك بولسىن», – دەيدى دارىگەر.
ال سەرىك ورداباەۆ بولسا 10 جىل بويى قوعامدىق ءتارتىپتىڭ, جول قاۋىپسىزدىگىنىڭ ساقتالۋىنا ۇلەس قوسىپ كەلەدى. ول وتانىنا ادال قىزمەت ەتۋدى ازاماتتىق بورىشى دەپ ەسەپتەيدى. قوناەۆ قالاسى پاترۋلدىك پوليتسيا قىزمەتى ينسپەكتورىنىڭ دا جاسى 35-تە.
«مەن ءۇشىن «ەگەمەندىك» ۇعىمى وتباسىمنىڭ اماندىعىمەن ۇندەسەدى. وتانسىز ادام – ورمانسىز بۇلبۇل ءتارىزدى. جۇبايىم ەكەۋمىز ەلىمىزبەن بىرگە ءوسىپ-ءونىپ كەلەمىز. تاۋەلسىزدىك ۇرپاقتارىن تاربيەلەپ وتىرمىز. مەرەكەمەن بارشاڭىزدى قۇتتىقتايمىن» – دەدى اعا لەيتەنانت.
وسكەلەڭ ۇرپاقتىڭ بويىنا پاتريوتتىق پەن ۇلتجاندىلىقتى, وتانسۇيگىشتىكتى ءسىڭىرىپ جۇرگەن ۇلاعاتتى ۇستازداردىڭ ءبىرى عاليا موجانوۆا دا ەلىمىزدىڭ ەگەمەندىگى – بولاشاققا جاسالعان سەنىمدى قادام ەكەندىگىن تىلگە تيەك ەتتى.
وسىلايشا تاۋەلسىزدىك قۇرداستارىنىڭ ءومىر جولى ەلمەن بىرگە قالىپتاسىپ, مەملەكەتپەن بىرگە كەمەلدەنىپ كەلەدى. ولاردىڭ ەڭبەكتەگى تاباندىلىقتارى تاۋەلسىز قازاقستاننىڭ گۇلدەنۋى مەن دامۋىنا سۇبەلى سەپتىگىن تيگىزۋدە.
الماتى وبلىسى.
