فوتو: egemen.kz/ ەرلان ومار
قارجى مينيسترلىگىنىڭ مالىمەتىنشە, دەنساۋلىق ساقتاۋ سالاسىنا 2,7 ترلن تەڭگە قاراستىرىلعان.
بيىلمەن سالىستىرعاندا بۇل قاراجات 107 ملرد تەڭگەگە ارتىق. بۇل مەديتسينالىق قىزمەتتەردىڭ قولجەتىمدىلىگىن ارتتىرۋعا مۇمكىندىك بەرەدى. ءبىلىم جانە عىلىم سالاسىنا 901,7 ملرد تەڭگە ءبولۋ جوسپارلانىپ وتىر. ءبىلىم بەرۋ پروتسەسىنىڭ ساپاسىن جاقسارتۋ, دارىندى جاستاردى قولداۋ جانە عىلىمي ورتالىقتاردى دامىتۋ بويىنشا باسىمدىقتار ساقتالادى.
2026 جىلى مادەنيەت, تۋريزم جانە سپورتتى دامىتۋعا 263,5 ملرد تەڭگە قاراستىرىلعان. مەملەكەت باسشىسىنىڭ تۇراقتى ەكونوميكالىق ءوسۋدى قامتاماسىز ەتۋ جونىندەگى تاپسىرماسىن ورىنداۋ ماقساتىندا مەملەكەتتىك قولداۋ شارالارىنا كەشەندى تالداۋ جۇرگىزىلگەن. 2026 جىلى ەكونوميكانى ىنتالاندىرۋعا شامامەن 1,2 ترلن تەڭگە ءبولۋ كوزدەلگەن, ال ناقتى سەكتوردى دامىتۋعا جۇمسالاتىن قاراجاتتىڭ جالپى كولەمى 540 ملرد تەڭگەگە ارتىپ, 3,7 ترلن تەڭگەنى قۇرايدى. بۇل شارالار جاڭا سالالىق ءوسۋ درايۆەرلەرىن ىسكە قوسۋعا جانە ەلدىڭ ينۆەستيتسيالىق الەۋەتىن نىعايتۋعا مۇمكىندىك بەرەدى.
نەگىزگى باسىمدىقتاردىڭ ءبىرى وڭىرلەردى دامىتۋ بولىپ قالا بەرەدى. وڭىرلەردى دامىتۋعا 2026-2028 جىلدارعا 581 ملرد تەڭگە قاراستىرىلعان, ونىڭ ىشىندە 2026 جىلى – 300 ملرد تەڭگە. بۇل جوبالار اسا ماڭىزدى جانە جالپىحالىقتىق ماڭىزعا يە. اكىمدىكتەردىڭ دەربەستىگىن ارتتىرۋ ماقساتىندا 2026 جىلى وڭىرلەرگە ترانسفەرتتەر ارقىلى 5,1 ترلن تەڭگە باعىتتالادى. كۇشتىك قۇرىلىم بلوگىنا 2026 جىلى 3 ترلن تەڭگە بولىنەدى, بۇل وسى جىلمەن سالىستىرعاندا 335 ملرد تەڭگەگە ارتىق.
وسىلايشا, 2026 جىلى قورعانىس شىعىندارى ءجىو-ءنىڭ 1%-ىن قۇرايدى. قاراجات تەك جاۋىنگەرلىك دايىندىقتى قولداۋعا عانا ەمەس, سونىمەن قاتار جۇيەلىك يننوۆاتسيالاردى ىسكە اسىرۋعا دا جۇمسالادى.
