فوتو: storage.yandexcloud.net
21–22 قازان تۇندەرى وريونيد مەتەور اعىنى ءوز شارىقتاۋ شەگىنە جەتەدى. استرونومدار ساعاتىنا 15–20 مەتەورعا دەيىن كورۋگە بولاتىنىن ايتادى. جالپى, بۇل عاجايىپ قۇبىلىستى 7 قاراشاعا دەيىن تاماشالاۋعا مۇمكىندىك بار.
مەتەور اعىنى – جەر ءوز وربيتاسىندا كومەتالار مەن استەرويدتار قالدىرعان شاڭ-توزاڭ بۇلتتارىنان وتكەن كەزدە تۋىندايتىن تابيعي قۇبىلىس. اتموسفەراعا جوعارى جىلدامدىقپەن ەنگەن ۇساق بولشەكتەر اۋاعا ۇيكەلىپ, قىزىپ كەتەدى دە, وتشا جانىپ «اعىپ تۇسكەن جۇلدىز» اسەرىن تۋدىرادى.
قازىر قازاقستاننىڭ كوپتەگەن وڭىرىندە اشىق اسپان كۇتىلەدى. سوندىقتان مەتەور اعىنىن باقىلاۋ ءۇشىن ارنايى قۇرالدىڭ قاجەتى جوق, تەك قالالىق جارىقتان الىس, تىنىش جەر تاۋىپ, تۇنگى اسپانعا كوز سالۋ جەتكىلىكتى. ەڭ قولايلى ۋاقىت ءتۇن ورتاسىنان كەيىنگى جانە تاڭ الدىنداعى ساعاتتار.
ال كەلەسى ءىرى مەتەورلىق قۇبىلىس – وڭتۇستىك تاۋريدتەر 5 قاراشا تاڭىندا شارىقتاۋ شەگىنە جەتەدى. الايدا بۇل جولى باقىلاۋعا تولىق ايدىڭ جارىعى ازداپ كەدەرگى كەلتىرۋى مۇمكىن.
