سۋرەت: aqiqat.kazgazeta.kz
«كىتاپحانا ءىسى, اقپاراتتى وڭدەۋ جانە ارحيۆ ءىسى» بويىنشا مەملەكەتتىك ءبىلىم تاپسىرىسى ەكى ەسە وسكەن. باكالاۆريات بويىنشا گرانت سانى 20-دان 100-گە دەيىن كوبەيدى. مەملەكەت باسشىسىنىڭ تاپسىرماسىنا سايكەس ارحيۆ جانە كىتاپحانا سالاسىنا مامان دايارلاۋعا ەلىمىزدىڭ بەس وڭىرىنە قوسىمشا 89 گرانت ءبولىندى.
جامبىل وبلىسىنداعى قورداي جانە جامبىل اۋداندىق ارحيۆتەرىنە, اقتوبە وبلىسىنداعى تەمىر اۋداندىق ارحيۆىنە, سونداي-اق استاناداعى پرەزيدەنت ارحيۆىنە جاڭا عيماراتتار پايدالانۋعا بەرىلدى.
2023 جىلى پرەزيدەنت باستاماسىمەن جاس جازۋشىلار مەن اقىندارعا ارنالعان پرەزيدەنتتىڭ ارنايى ادەبي سىيلىعى تاعايىندالدى. سىيلىق «پروزا», «پوەزيا», «بالالار ادەبيەتى» جانە «دراماتۋرگيا» اتالىمدارى بويىنشا ءار جەڭىمپازعا جۇلدە قورى – 4,1 ميلليون تەڭگە. مەملەكەت باسشىسىنىڭ 2023 جىلى تۇركىستاندا وتكەن ۇلتتىق قۇرىلتايدا بەرگەن تاپسىرماسىنا سايكەس «قازاقستاننىڭ حالىق جازۋشىسى» قۇرمەتتى اتاعىن قايتا ەنگىزۋ – قالامگەرلەر ەڭبەگىنىڭ رەسمي باعالانۋى.
بيىل 23 ساۋىردە مەملەكەت باسشىسىنىڭ باستاماسىمەن ۇلتتىق كىتاپ كۇنى العاش رەت اتالىپ ءوتتى. مەرەكە بارىسىندا «ۇلتتىق كىتاپ» بايقاۋىنىڭ جەڭىمپازدارى ماراپاتتالدى.
«ارحيۆ – 2025» جوباسى اياسىندا 14 ەلدەن مىڭنان استام بىرەگەي تاريحي قۇجات جينالدى. سايكەسىنشە, ۇلتتىق ارحيۆ حالىقارالىق ىنتىماقتاستىقتى دامىتتى. ساۋد ارابياسى, رەسەي, ليتۆا, تۇركيا ەلدەرىنىڭ ارحيۆتەرىمەن مەموراندۋمدارعا قول قويىلىپ, قۇجاتتىق مۇرانى تسيفرلاندىرۋ جانە ساقتاۋ جوبالارى جۇزەگە اسىرىلدى.
قازاقستان جازۋشىلار وداعى ارحيۆ, قۇجاتتاما جانە كىتاپ ءىسى كوميتەتىنىڭ قولداۋىمەن ءۇش ءىرى جوبانى جۇزەگە اسىرىپ جاتىر. اتاپ ايتقاندا, «جاڭا قازاقستاننىڭ ادەبي-تانىمدىق پانوراماسى», «جازۋشىلاردىڭ ادەبي شەبەرلىك مەكتەبى» ءبىلىم پلاتفورماسى جانە تمد ەلدەرىنىڭ ارحيۆتەرىندە وتاندىق اۆتورلاردىڭ شىعارماشىلىعىن زەرتتەۋ بويىنشا عىلىمي باعدارلاما.
بۇگىندە رەسپۋبليكا بويىنشا پرەزيدەنت ءارحيۆى مەن ءتورت ارنايى مەملەكەتتىك ءارحيۆتى قوسا العاندا, بارلىعى 236 ارحيۆ مەكەمەسى جۇمىس ىستەيدى. ۇلتتىق ارحيۆ قورىندا 74,5 مىڭ قوردى قامتيتىن 27,8 ميلليوننان استام ساقتاۋ بىرلىگى بار.
