تەاتر ماسكەۋلىك كورەرمەنگە ەكى قويىلىم ۇسىندى – «ساتس. ءبىر رەپەتيتسيانىڭ شەجىرەسى» جانە «رۋسلان مەن ليۋدميلا».
رەجيسسەر گالينا پيانوۆا اتاپ وتكەندەي, گاسترول – ناتاليا يلينيچنا ساتستىڭ 80 جىلدىق شىعارماشىلىق مۇراسىنا قۇرمەت كورسەتۋ اياسىندا ۇيىمداستىرىلدى.
– بۇل – ناتاليا يلينيچناعا دەگەن سۇيىسپەنشىلىك پەن ءىلتيپاتتىڭ كورىنىسى. ول بالالار تەاترىنىڭ نەگىزىن قالاپ, بىرنەشە بۋىندى تاربيەلەگەن ۇلى تۇلعا, – دەدى ول.
سپەكتاكلدە ناتاليا ساتستىڭ ءرولىن اكتريسا تاتيانا كوستيۋچەنكو سومدادى.
– ول – ۇلى رەجيسسەر, وراسان تالانت يەسى. «تاربيەلەۋ – ادامنىڭ تاعدىرىن شەشۋ» دەگەن ونىڭ ءسوزى مەنىڭ سۇيىكتى دايەكسوزىم. ساتس ءوز ءومىرىن تەاتر مەن جاس ۇرپاق تاربيەسىنە ارنادى, – دەدى اكتريسا.
قازاقستاننىڭ حالىق ءارتيسى ولگا كورجەۆا دا بۇل سپەكتاكلدىڭ ەرەكشە مانگە يە ەكەنىن اتاپ ءوتتى.
– ءبىز ناتاليا ساتس تەاترىنىڭ اشىلۋىنا ارنالعان رەپەتيتسيانى ساحناعا شىعارامىز. بۇل – تەاتر تاريحىنىڭ ءبىر بولشەگى جانە ماسكەۋ كورەرمەنىمەن بولىسەتىن رۋحاني بايلانىس, – دەدى ول.
تەاتردىڭ جەتەكشى اكتەرى ماقسات ساحي ۇلىنىڭ ايتۋىنشا, بۇل گاسترول شىعارماشىلىق ىزدەنىس پەن مادەني ۇندەستىكتىڭ ناتيجەسى.
– كوپشىلىك بالالار تەاترى تۋرالى بىلەدى, بىراق ونىڭ نەگىزىن قالاعان تۇلعا جايلى از حاباردار. ءبىز بۇل ءرول ارقىلى ونىڭ ومىرىنە ۇڭىلدىك. ول وپەرا قويىلىمدارىن ساحنالاعان تۇڭعىش ايەل رەجيسسەر بولعان, – دەدى ول.
تەاتر ديرەكتورى, قازاقستاننىڭ ەڭبەك سىڭىرگەن قايراتكەرى ولەگ گوستەۆتىڭ ايتۋىنشا, گاسترولگە دايىندىق 12-14 ايعا سوزىلعان.
– ءبىز ماسكەۋگە تەاتردىڭ ەڭ تانىمال قويىلىمدارىن الىپ كەلدىك. ۇلكەن شىعارماشىلىق ۇجىم, تەحنيكالىق جانە ساحنالىق توپ تولىق قۇراممەن كەلدى, – دەدى ول.
باس رەجيسسەر يرينا سيمونوۆا استانادا وتەتىن تەاتردىڭ 80 جىلدىعىنا ارنالعان مەرەيتويلىق قويىلىمداردا دا ناتاليا ساتس تۋرالى سپەكتاكل كورسەتىلەتىنىن ايتتى.
قازاقستاننىڭ رەسەيدەگى ەلشىلىگىنىڭ حابارلاۋىنشا, ماسكەۋلىك كورەرمەن قازاقستاندىق ارتىستەردىڭ ونەرىن جىلى قابىلدادى.
ەلشى داۋرەن اباەۆ بۇل گاسترولدى قازاقستان مەن رەسەي اراسىنداعى دوستىق كۇنتىزبەسىندەگى ماڭىزدى مادەني وقيعا دەپ اتادى.
– ماسكەۋلىك كورەرمەندەر قازاقستاندىق تەاتر ۇجىمىنىڭ شىعارماشىلىق شەبەرلىگىنەن كەرەمەت اسەر الادى دەپ سەنەمىن, – دەدى ەلشى.
