ءىس-شارانى قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى (قسزي) استانا حالىقارالىق فورۋمى (AIF) اياسىندا ۇيىمداستىردى. فورۋمعا 20 ەلدەن 40-قا جۋىق شەتەلدىك ساراپشى — الەمنىڭ جەتەكشى «موزگوۆوي تسەنترلەرىنىڭ» باسشىلارى, زەرتتەۋشىلەر جانە ساراپشىلار قاتىستى.
Astana Think Tank Forum العاش رەت 2024 جىلى وتكەن بولاتىن. ءبىر جىلدىڭ ىشىندە بۇل الاڭ حالىقارالىق كۇن تارتىبىندەگى وزەكتى ماسەلەلەردى تالقىلايتىن بەدەلدى ساراپتامالىق فورۋم رەتىندە تانىلدى. فورۋم رەفورمالارعا ارنالعان سەسسيامەن اشىلدى. قر پرەزيدەنتىنىڭ كەڭەسشىسى ماقزۇم ميرزاعاليەۆ قاتىسۋشىلاردى قۇتتىقتاپ, پرەزيدەنت قاسىم-جومارت توقاەۆتىڭ كوزقاراسىنا سۇيەنە وتىرىپ, قازاقستان بەيبىتشىلىك, سەنىم جانە جاۋاپتى ديپلوماتيا قۇندىلىقتارىن تۇراقتى تۇردە ىلگەرىلەتىپ كەلە جاتقانىن اتاپ ءوتتى.
سىرتقى ىستەر ءمينيسترىنىڭ ءبىرىنشى ورىنباسارى ەرجان اشىقباەۆ قازىرگى جاعدايدا «كونسترۋكتيۆتى كونسەنسۋس» قالىپتاستىرۋ مەن كوپجاقتى ىنتىماقتاستىقتى نىعايتۋدىڭ ەرەكشە ماڭىزعا يە ەكەنىن ايتتى. ونىڭ سوزىنشە, تۇراقتى ءارى ءادىل الەمدىك ءتارتىپتى ساقتاۋ جاۋاپكەرشىلىگى ەندى كەڭ اۋقىمدى مەملەكەتتەرگە جۇكتەلىپ وتىر.
فورۋم اياسىندا توعىز سەسسيا ۇيىمداستىرىلدى. وندا جەتەكشى دەرجاۆالاردىڭ باسەكەلەستىگى جاعدايىندا كوپجاقتى ىنتىماقتاستىقتىڭ كەلەشەگى, قاۋىپسىزدىك ارحيتەكتۋراسىنىڭ ترانسفورماتسياسى, يادرولىق قارۋسىزدانۋ جانە تاراتپاۋ ماسەلەلەرى تالقىلاندى. سونداي-اق اۋعانستان فاكتورىنىڭ ورتالىق ازيا ايماعىنا ىقپالى, جاھاندىق نارىقتاردىڭ فراگمەنتاتسياسى جاعدايىنداعى ينۆەستيتسيالار, ەۋرازياداعى ساۋدا-كولىك دالىزدەرىنىڭ دامۋى, جاساندى ينتەللەكت پەن وعان قاتىستى ەتيكالىق ديلەممالار, كليماتتىق وزگەرىستەر مەن سۋ رەسۋرستارىنىڭ تاپشىلىعىنىڭ دەموگرافيالىق ۇردىستەر مەن كوشى-قونعا اسەرى دە كۇن تارتىبىندە بولدى.
ورتالىق ءىس-شارالاردىڭ ءبىرى — «ورتالىق ازيا وزگەرىپ جاتقان جاھاندىق قاۋىپسىزدىك ارحيتەكتۋراسىندا» اتتى III ورتالىق ازيا قاۋىپسىزدىك جانە ىنتىماقتاستىق فورۋمى بولدى. وعان قاتىسقان ايماقتىڭ جەتەكشى ساراپتامالىق ورتالىقتارىنىڭ باسشىلارى حالىقارالىق قاۋىپسىزدىك جۇيەسىندەگى وزگەرىستەردىڭ ايماقتىق تۇراقتىلىق پەن دامۋ ءۇشىن تۋىنداتاتىن سىن-قاتەرلەرىن تالدادى. سونىمەن قاتار ايماق ەلدەرىنىڭ ءوزارا ىنتىماقتاستىعى مەن ورتالىق ازيانىڭ جاھاندىق ديالوگتاعى كوپىر رەتىندەگى ءرولى قاراستىرىلدى.
فورۋم اياسىندا قر پرەزيدەنتى جانىنداعى قسزي باستاماسىمەن Central Asia Insights اتتى جاڭا تسيفرلىق عىلىمي ءبىلىم پلاتفورماسى تانىستىرىلدى. ول ورتالىق ازياداعى زەرتتەۋ جانە اناليتيكالىق الەۋەتتى بىرىكتىرۋگە, الماسۋعا جانە ىلگەرىلەتۋگە باعىتتالعان. فورۋمدا وسى پلاتفورماعا ورنالاستىرىلعان بىرقاتار باياندامالار ۇسىنىلدى. ولار اۋعانستانمەن ىنتىماقتاستىقتىڭ مۇمكىندىكتەرى مەن سىن-قاتەرلەرى, ۋربانيستيكا, دەموگرافيالىق ترەندتەر جانە جاسىل ەنەرگەتيكا ماسەلەلەرىن قامتىدى. سونىمەن قاتار قسزي باسشىلىعى ۆەنگريا, وڭتۇستىك كورەيا, وزبەكستان, پاكىستان جانە يراننىڭ تالداۋ ورتالىقتارىمەن ەكىجاقتى كەزدەسۋلەر وتكىزدى. پاكىستاننىڭ حالىقارالىق ستراتەگيالىق زەرتتەۋلەر ورتالىعىمەن ىنتىماقتاستىق تۋرالى مەموراندۋمعا جانە وزبەكستان پرەزيدەنتى جانىنداعى ستراتەگيالىق رەفورمالار اگەنتتىگىمەن ءىس-شارالار جوسپارىنا قول قويىلدى.
فورۋم جۇمىسىنىڭ قورىتىندىسىندا قر پرەزيدەنتى جانىنداعى قسزي ديرەكتورى جاندوس شايماردانوۆ Astana Think Tank Forum 2025 الاڭىنىڭ سەنىمگە, اشىق پىكىرتالاس پەن پراكتيكالىق شەشىمدەرگە نەگىزدەلگەن حالىقارالىق ساراپتامالىق فورمات رەتىندەگى تيىمدىلىگىن اتاپ ءوتتى. بۇل فورۋم جاھاندىق پولياريزاتسيا تەرەڭدەپ بارا جاتقان قازىرگى كەزەڭدە حالىقارالىق جۇيەگە دەگەن سەنىمدى قالپىنا كەلتىرۋگە جانە ايماقتىق سەرىكتەستىكتى نىعايتۋعا باعىتتالعان ماڭىزدى ديالوگ الاڭى رەتىندە باعالاندى.
