قۇتقارۋشى بولۋ – ۇلكەن جاۋاپكەرشىلىكتى تالاپ ەتەتىن ماماندىق. ازاماتتىق قورعاۋ سالاسى قىزمەتكەرلەرى ءۇشىن قۇتقارۋ, ساقتاۋ, كومەكتەسۋ, قورعاۋ - ەڭ باستى مىندەت بولىپ تابىلادى. وسىنداي قيىن جانە قاۋىپتى سالادا ەڭبەك ەتىپ, وزىنە جۇكتەلگەن مىندەتتى ابىرويمەن اتقارىپ جۇرگەن سىرىم بەيسەنباي ۇلى بۇگىن «ەرەن ەڭبەگى ءۇشىن» مەدالىنە يە بولدى.
«بۇل مەنىڭ كوپ جىلدىق ەڭبەك جولىمداعى ەڭ مەرەيلى ماراپاتىم بولدى», دەيدى قۇتقارۋشىنىڭ ءوزى.
سىرىم بەيسەنباي ۇلى اتىراۋ وبلىسى, ماحامبەت اۋدانى, تاڭداي اۋىلىندا 1975 جىلى ومىرگە كەلگەن. بالا كۇنىنەن ناعاشى اپاسى سەكىلدى مۇنايشى بولۋدى ارمانداپتى. اسىرەسە بۇرعىلاۋ ىسىنە قاتتى قىزىققان. وسى ارمانىنىڭ جەتەگىنە ەرىپ اتىراۋ مۇناي جانە گاز ينستيتۋتىندا بۇرعىلاۋشى ماماندىعى بويىنشا ءبىلىم الادى. 2008 جىلدان باستاپ قىزمەتىن اتىراۋ وبلىستىق توتەنشە جاعدايلار دەپارتامەنتىندە ونەركاسىپ قاۋىپسىزدىك سالاسى, قاۋىپتى وندىرىستىك وبەكتىلەردەگى اپاتتاردىڭ الدىن الۋ جانە جويۋ بولىمىندە جالعاستىرادى.
«2025 جىلى ناۋرىز ايىندا «ەمبىمۇنايگازعا» قاراستى باتىس پرورۆا كەن الاڭىندا ۇڭعىمادان گاز اتقىلاپ, اپاتتىق جاعداي ورىن الدى. وسى اپاتتى جويۋ جۇمىسىنا قاتىسقانىم ءۇشىن بۇگىن پرەزيدەنتتىڭ قولىنان ماراپات الدىم. بۇل ءبىر ەرەكشە ءسات بولدى. ازاماتتىق قورعاۋ سالاسى قىزمەتكەرلەرى مۇنداي قۇرمەتكە العاش رەت يە بولىپ وتىر. ەڭبەگىمىزدى ەلەگەن مەملەكەت باسشىسىنا, توتەنشە جاعدايلار ءمينيسترى شىڭعىس سايران ۇلىنا العىسىم شەكسىز» دەيدى سىرىم بەيسەنباي ۇلى.
بيىل ەلۋدى ەڭسەرگەن ەرەن ەڭبەك يەسى قىزمەتتە جاس قۇتقارۋشىلارعا ۇلگى بولارلىقتاي ۇستاز بولسا, وتباسىندا 2 ۇل مەن 1 قىز تاربيەلەپ وتىرعان ۇلگىلى اكە.
