اتىراۋ وبلىسىنىڭ مامانداندىرىلعان اۋدانارالىق قىلمىستىق ىستەر جونىندەگى سوتىندا كۇدىكتىگە قاتىستى قىلمىستىق ءىس قارالدى. كامەلەتكە تولماعان قىزدى زورلاعان ۋ. ەسىمدى كۇدىكتىگە قىلمىستىق كودەكستىڭ 120-بابىنىڭ 4-بولىگىمەن, 99-بابىنىڭ 3-بولىگىمەن ايىپ تاعىلعان.
«2025 جىلدىڭ ماۋسىم ايىندا قۇلسارى قالاسىندا 7 جاستاعى قىز قۇرساي وزەنىنىڭ جاعالاۋىندا سەرۋەندەپ ءجۇرىپ, ۇيىنە قايتار جولدا اداسىپ كەتكەن. ۋ. الكوگولدىك ماساڭ كۇيدە وعان ۇيىنە باراتىن جولدى كورسەتەتىنىن ايتىپ, وزىمەن بىرگە ءجۇرۋدى ۇسىنعان. قىزدى وزەن جاعاسىنا اپارىپ, كۇش قولدانۋ ارقىلى زورلاعان. جاساعان قىلمىسىن جاسىرۋ ماقساتىندا قىزدى ۇرىپ-سوعىپ, كەيىن وزەنگە باتىرىپ جىبەرگەن», دەپ اتالعان سوتتان.
سوتتالۋشىنىڭ كىناسى كۋالاردىڭ ايعاقتارىمەن, وقيعا بولعان جەردى قاراۋ حاتتاماسىمەن, بەينەجازبالارمەن جانە ساراپتاما قورىتىندىلارىمەن تولىق دالەلدەندى.
سوت ۇكىمىمەن ۋ. تاعىلعان ايىپتار بويىنشا كىنالى دەپ تانىلدى. وعان ءومىر بويىنا باس بوستاندىعىنان ايىرۋ جازاسى تاعايىندالدى.
ۇكىم زاڭدى كۇشىنە ەنگەن جوق.
