كەزدەسۋ اشىق ديالوگ فورماتىندا ءوتتى. بۇل كاسىپكەرلەرگە وزدەرىن تولعاندىرعان سۇراقتاردى تىكەلەي قويۋعا جانە ءاربىر باعىت بويىنشا جان-جاقتى تۇسىنىكتەمە الۋعا مۇمكىندىك بەردى. قاتىسۋشىلار شاعىن بيزنەس سۋبەكتىلەرىنىڭ جەڭىلدەتىلگەن سالىق رەجيمىندە جۇمىس ىستەۋى مەن قوسىلعان قۇن سالىعىن (ققس) تولەۋشىلەر اراسىنداعى ءوزارا ارەكەتتەستىگىنە ەرەكشە نازار اۋداردى. سونىمەن قاتار, جەڭىلدەتىلگەن سالىق رەجيمىندە جۇمىس ىستەۋ قۇقىعىن ساقتاپ قالعان كاسىپكەرلەر ساناتتارى تۋرالى جەكە اقپارات بەرىلدى.
ۇلىتاۋ وبلىسى كاسىپكەرلەر پالاتاسىنىڭ ديرەكتورى گۇلميرا قاجەنوۆا «اتامەكەن» ۇلتتىق كاسىپكەرلەر پالاتاسىنىڭ جۇمىسىنىڭ ارقاسىندا 2026 جىلدان باستاپ جەڭىلدەتىلگەن سالىق رەجيمىندە جۇمىس ىستەۋگە رۇقسات ەتىلگەن 316 قىزمەت ءتۇرى ساقتالىپ قالعانىن اتاپ ءوتتى. مينيسترلىك وكىلدەرىنىڭ ايتۋىنشا, بۇل ساناتقا حالىققا تىكەلەي قىزمەت كورسەتۋمەن اينالىساتىن كاسىپكەرلىك سۋبەكتىلەرى ەنگەن. بۇدان بولەك, «اتامەكەن» ۇكپ بۇل ءتىزىمدى قايتا قاراۋ بويىنشا جۇمىس جۇرگىزۋدە. مەملەكەتتىك ورگاندارعا ونى قىسقارتۋ قاجەتتىلىگىن دالەلدەۋ مۇمكىن بولدى. قازىرگى تاڭدا قۇجات اشىق نقا پورتالىندا قوعامدىق تالقىلاۋ ساتىسىندا تۇر, جانە بيزنەس وكىلدەرىنىڭ ءوز ۇسىنىستارىن ەنگىزۋگە مۇمكىندىگى بار.
— ءبىزدىڭ قازىرگى مىندەتىمىز – بارلىق نەگىزدى ۇسىنىستاردى جيناقتاپ, ولاردى ۇلتتىق ەكونوميكا ءمينيسترىنىڭ اتىنا شۇعىل تۇردە جولداۋ. باستى ماقساتىمىز – بولشەك ساۋدامەن اينالىساتىن ادال كاسىپكەرلەردى بۇل شەكتەۋ تىزىمىنەن شىعارۋ,- دەپ اتاپ ءوتتى گۇلميرا يزاتۋللاقىزى.
جالپى, ەقجج (وكەد) تىزىمىندە 1 111 قىزمەت ءتۇرى بار, ونىڭ ىشىندە 795 باعىت شەكتەۋ تىزىمىنە ەنگەن. B2C سەگمەنتىنە باعىتتالعان شاعىن بيزنەس ارنايى سالىق رەجيمى بويىنشا جۇمىسىن جالعاستىرادى, ال ءىرى قىزمەت تۇرلەرى جالپىعا بىردەي بەلگىلەنگەن تارتىپكە كوشەدى.
ء«اربىر كاسىپكەر ءوز بيزنەسىنىڭ ەرەكشەلىگىن ەسكەرە وتىرىپ, قاي ساناتقا جاتاتىنىن ءوزى تاڭداي الادى» دەيدى مەملەكەتتىك ورگان وكىلدەرى.
ايتا كەتۋ كەرەك, ۇلىتاۋ وبلىسى كاسىپكەرلەر پالاتاسى سالىقتىق جۇكتەمەنى, اسىرەسە شاعىن بيزنەس سۋبەكتىلەرى ءۇشىن, ازايتۋ بويىنشا جۇمىستار جۇرگىزۋدە. جاڭا كودەكستە بۇل – جەڭىلدەتىلگەن دەكلاراتسيا نەگىزىندەگى ارنايى سالىق رەجيمى مولشەرلەمەسىنىڭ 4%-دان 2%-عا دەيىن تومەندەۋى. ءماسليحاتتاردىڭ بولشەك سالىق مولشەرلەمەسىن تومەندەتۋ تۋرالى شەشىمدەرى جەرگىلىكتى ءوندىرىستى دامىتۋعا, بيزنەستى زاڭداستىرۋعا جانە سالىق تۇسىمدەرىن ارتتىرۋعا وڭ اسەرىن تيگىزەدى.
ۇلىتاۋ وبلىسى
