فورۋمنىڭ يدەياسى مەملەكەت باسشىسىنىڭ «جاساندى ينتەللەكت داۋىرىندەگى قازاقستان: وزەكتى مىندەتتەر جانە ولاردى تسيفرلىق ترانسفورماتسيا ارقىلى شەشۋ» اتتى جولداۋىندا اتاپ وتىلگەن ايەلدەر كوشباسشىلىعىن قولداۋ, كاسىپكەرلىكتى دامىتۋ جانە رۋحاني-وتباسىلىق قۇندىلىقتاردى ساقتاۋ مىندەتتەرىمەن ۇندەس.
Respublica پارتياسىنىڭ قولداۋىمەن وتكەن فورۋم ءتورت تاقىرىپتىق سەسسيانى قامتىدى: بيزنەس, وتباسى, IT جانە الەۋمەتتىك-ساياسي دامۋ. ءار سەسسيا ايەل كوشباسشىلىعىنىڭ ءتۇرلى قىرلارىن, كاسىپكەرلىك پەن تسيفرلىق يننوۆاتسيالاردان باستاپ, وتباسىن نىعايتۋ مەن ۇلتتىق قۇندىلىقتاردى ساقتاۋعا دەيىن اشىپ كورسەتتى.
فورۋم سپيكەرلەرى قاتارىندا ءماجىلىس دەپۋتاتتارى ايداربەك قوجانازاروۆ, ولجاس قۇسپەكوۆ, نۇرگۇل تاۋ, ەكاتەرينا سمولياكوۆا, دينارا ناۋموۆا, كاسىپكەرلەر مەن ساراپشىلار ايگۇل احمەتوۆا, ساۋلە ساعادي, ماقپال وراققىزى, لاۋرا ۆايگوروۆا, مەديا ساراپشى ساندي سۇلتان, رەسپۋبليكالىق ايەلدەر قاۋىمداستىعى توراعاسىنىڭ ورىنباسارى ايدانا توعىزباەۆا جانە پارتيانىڭ ەلوردالىق فيليالىنىڭ ديرەكتورى شىڭعىس تۇسىپباەۆ بولدى.
ء«بىزدىڭ ماجىلىستەگى فراكتسيا - قۇرامىنىڭ 50 پايىزى ايەلدەردەن تۇراتىن جالعىز فراكتسيا. سوندىقتان ايەلدەردى قولداۋ ءبىز ءۇشىن ءاردايىم باسىم باعىت. Re.Women قوزعالىسى بىرنەشە اي بۇرىن عانا قۇرىلسا دا, ونىڭ قۇرامىندا 2000-نان استام ايەل - كاسىپكەرلەر, انالار, بەلسەندىلەر بار. بۇل - ناعىز قوزعاۋشى كۇش. مەن سەنىمدىمىن, ايەلدەر - بۇل قازاقستاننىڭ جاڭا "مۇنايى”», - دەدى Respublica پارتياسىنىڭ توراعاسى, ءماجىلىس دەپۋتاتى ايداربەك قوجانازاروۆ.
ء«بىز ۇلى جەتىستىكتەر مەن اۋىر قىلمىستار تۋرالى قاراما-قايشى اقپارات قاتار جۇرەتىن زاماندا ءومىر ءسۇرىپ جاتىرمىز. مۇنىڭ ءبارى ادامنىڭ وزىنەن باستالادى. ال ادام ەڭ الدىمەن وتباسىنان باستاۋ الادى. سول العاشقى قۇندىلىقتاردى قالىپتاستىراتىن - ايەل», - دەپ اتاپ ءوتتى ءماجىلىس دەپۋتاتى, Re.Women قوزعالىسىنىڭ باستاماشىسى ولجاس قۇسپەكوۆ.
فورۋمنىڭ نەگىزگى بولىگى Re.Women قاۋىمداستىعىن دامىتۋ ستراتەگياسىن تانىستىرۋ بولدى. باعدارلاما ايەلدەردىڭ كاسىبي ءوسۋىن قولداۋعا, وڭىرلىك باستامالاردى دامىتۋعا جانە ايەلدەردى ەلدىڭ قوعامدىق-ساياسي ومىرىنە بەلسەندى تارتۋعا باعىتتالعان.
«قازاق ايەلىنىڭ كۇشى - رۋحاني قۇندىلىقتاردى دامۋ مەن ورلەۋگە دەگەن ۇمتىلىسپەن ۇشتاستىرا بىلۋىندە. ايەل بيزنەس پەن ساياساتتا تابىستى بولا وتىرىپ, وتباسىنىڭ جىلۋىن ساقتاپ, ءداستۇردىڭ جالعاستىرۋشىسى بولا الادى», - دەدى فورۋم ۇيىمداستىرۋشىلارىنىڭ ءبىرى ساۋلە ساعادي.
فورۋم Re.Women Astana قوزعالىسىنىڭ ايەل كوشباسشىلىعى — قوعامدىق دامۋدىڭ ماڭىزدى قوزعاۋشى كۇشى ەكەنىن ناقتى كورسەتتى. ءىس-شارا قورىتىندىسى بويىنشا قاتىسۋشىلار وڭىرلەردە جاڭا الاڭدار مەن بىرلەسكەن جوبالاردى ىسكە قوسۋعا, ايەلدەردىڭ ادامي كاپيتالىن, تسيفرلىق قۇزىرەتتەرىن جانە كاسىپكەرلىگىن دامىتۋعا كەلىستى.
