سۋرەت: kff.kz
سكوپە قالاسىنداعى «توشە پرەوسكي» ستاديونىندا وتكەن تارتىستىڭ ءبىرىنشى تايمىندا ءبىزدىڭ كوماندا شابۋىلدى كۇشەيتىپ, قارسىلاستارىن شەڭگەلدەپ سىعىمداي ءتۇستى. تارس بۇركەنىپ قورعانىستىڭ قامىن كۇيتتەيتىن ۇلتتىق قۇراما بۇل ويىندا «كوزىرىن اشقانداي» كورىندى. شابۋىلدى ۇدەتىپ, سولتۇستىكماكەدونيالىق ويىنشىلاردى كادىمگىدەي ساستىردى. 54-مينۋتتا «جەڭىس» كلۋبىنىڭ ويىنشىسى دىنمۇحامەد قارامان ۇلتتىق قۇراما ساپىنداعى ءوزىنىڭ العاشقى گولىن سوقتى. كوماندا وسى باسىمدىقتى 73-مينۋتقا دەيىن ۇستاپ تۇردى. الايدا سولتۇستىك ماكەدونيا قۇراماسىنىڭ كاپيتانى ەنيس باردي ەنشىسىنە گول جازىپ, 74-مينۋتتا تارازى باسىن تەڭەستىردى.
ماتچتان كەيىنگى ءباسپاسوز ءماسليحاتىندا ۇلتتىق قۇرامانىڭ باس باپكەرى مىندەتىن اتقارۋشى تالعات بايسۋفينوۆ جىگىتتەردىڭ مىنەز تانىتقانىنا العىسىن جەتكىزدى. «سولتۇستىك ماكەدونيا ۇلتتىق قۇراماسىنىڭ الەم چەمپيوناتىنا جولداما الۋ ءۇشىن بارىن سالىپ, باسىمدىقتى ۋىستان شىعارماۋعا كۇش سالاتىنىن الدىن الا بىلدىك. جىگىتتەر جارادى, ولاردىڭ شابۋىلىن دەر كەزىندە تويتارىپ قانا قويماي, وزدەرى دە العا ۇمتىلدى. ماقساتىمىز ءۇش ۇپاي ولجالاۋ ەدى, بىراق بۇيىرمادى. ۇلتتىق قۇراما قاتارىنا جاڭا قوسىلعان ويىنشىلار سەنىمگە سەلكەۋ تۇسىرمەدى. ولاردىڭ دا قابىلەت-قارىمىن سىناپ كوردىك. جىگىتتەر وسى باعىتتان تايماۋى كەرەك», دەدى تالعات ءمارۋا ۇلى.
ۇلتتىق قۇراما كەلەسى جىلى وتەتىن الەم چەمپيوناتىنا ىرىكتەۋ كەزەڭىنەن ازىرگە 7 ۇپاي جيناپ, J توبىندا 4-ساتىدا تۇر. سوڭعى ماتچتى 15 قاراشادا ءوز الاڭىمىزدا وتكىزەدى, بەلگيا قۇراماسىنا قارسى وينايدى.
