ماماننىڭ ايتۋىنشا, 9 اي ىشىندە 84 مىڭنان استام ادام جرۆي-مەن اۋىرعان. ونىڭ كوپشىلىگى بالالار. ءۇش جۇزدەن استام ادام تۇماۋعا شالدىعىپ, كوپشىلىگى ا, ۆ تيپتەرىن جۇقتىرعان. ەكى جۇزدەن استام ناۋقاس تۇماۋعا جاتپايتىن ۆيرۋستىق دەرتكە ۇشىراعان. ولاردىڭ ىشىندە پاراگريپپ, رينوۆيرۋس, ادەنوۆيرۋس, كوروناۆيرۋس بار.
سانەپيدەميولوگيالىق قىزمەت وكىلىنىڭ مالىمدەۋىنشە, ينفەكتسيانىڭ الدىن الۋ ماقساتىندا جەرگىلىكتى بيۋدجەت ەسەبىنەن تۇماۋعا قارسى تەز جۇقتىراتىندار توبىنا جاتاتىن تۇلعالارعا ەكپە جۇرگىزۋگە 150 000 دوزا «گريپپول+» ۆاكتسيناسى ساتىپ الىندى. مەگاپوليس تۇرعىندارىنىڭ ۆاكتسينامەن قامتىلۋ دەڭگەيى 12% قۇرايدى. شىمكەنتتە تۇماۋعا قارسى ۆاكتسينا ەگۋ جۇمىستارى قىركۇيەك ايىنىڭ سوڭىندا باستالدى. ءبىرىنشى كەزەكتە مەديتسينا ۇيىمىنىڭ قىزمەتكەرلەرى, مۇعالىمدەر, ديسپانسەرلىك ەسەپتە تۇرعان, جەتىم, اتا-اناسىنىڭ قامقورلىعىنسىز قالعان بالالار, سونداي-اق اسكەري قىزمەتشىلەر مەن سوزىلمالى تىنىس الۋ جولدارى اۋرۋىمەن, جۇرەك قان-تامىر دەرتىمەن اۋىراتىندار ەگىلدى. نەگىزىنەن ءارتۇرلى تۇماۋمەن اۋىراتىن كەزەڭ قازان مەن ءساۋىر ايلارىن قامتيدى. وسىعان بايلانىستى قالادا دايىندىق جۇمىستارى قولعا الىندى. ەمحانالاردا ناۋقاستارعا كەڭەس بەرەتىن قوسىمشا تەلەفون نومىرلەرى ىسكە قوسىلدى. 71 اۆتوكولىك, ءۇش جۇزدەن استام توسەك-ورىن قاراستىرىلدى. جۇقپالى اۋرۋلار اۋرۋحاناسىنىڭ تۇماۋمەن تۇسكەندەر جاتاتىن بولىمشەسى 100 توسەك-ورىنعا ۇلعايدى. ينفەكتسيالىق ىندەت جۇرەتىن كەزەڭدە ونىمەن كۇرەسۋگە جەتكىلىكتى دەڭگەيدە ءدارى-دارمەك قورى جيناقتالدى. ەلىمىزدىڭ باس مەملەكەتتىك سانيتاريالىق دارىگەرىنىڭ قاۋلىسىنا ساي, 1 قازاننان باستاپ مەديتسينالىق ۇيىمداردا بەتپەردە تاعۋ ءتارتىبى ەنگىزىلدى. وسى قاۋلىعا سايكەس شىمكەنتتەگى مەكتەپتەردە تۇماۋدىڭ وقۋشىلار اراسىندا تارالۋىن بولدىرماۋ ماقساتىندا تاڭەرتەڭگىلىك سۇزگى كەزەكشىلىگى قولعا الىندى. وسى پروفيلاكتيكالىق ءىس-شارا اياسىندا تۇماۋ بەلگىسى بار وقۋشىلاردى ەرتە انىقتاۋ جۇمىستارى جۇرگىزىلدى.
«ەگەر ءبىر سىنىپتا وقيتىن وقۋشىلاردىڭ جارتىسىنا جۋىعى تۇماۋمەن اۋىرسا, وندا وقۋشىلار ونلاين ساباققا كوشەدى. جالپى, جرۆي مەن تۇماۋ بەلگىلەرى ۇقساس بولىپ كەلەدى. ەكەۋىندە دە دەنە قىزۋى كوتەرىلىپ, تاماق قىزارىپ, السىزدىك پايدا بولادى. بىراق ەكەۋىنىڭ دە اسقىنۋى دەنساۋلىققا اۋىر ءتيۋى مۇمكىن. تۇماۋدىڭ سالدارىنان اۋرۋ پنەۆمونيا, مەنينگيت, وتيت, گايموريت سەكىلدى اۋرۋلارعا ۇلاسىپ كەتۋى ىقتيمال. كەيدە تۇماۋدىڭ اۋىر تۇرىنە شالدىقسا, ادام ءولىپ تە كەتەدى. سوندىقتان جۇقپالى ىندەتتىڭ الدىن الۋدىڭ ەڭ ءتيىمدى جولى – ەكپە سالدىرۋ. ول پاتسيەنتتەرگە بارلىق ەمحانادا قولجەتىمدى», دەدى ا.تۇرىمبەتوۆا.
بريفينگ بارىسىندا ءسوز العان قالالىق جۇقپالى اۋرۋلار اۋرۋحاناسى باس دارىگەرىنىڭ مىندەتىن اتقارۋشى مۇرات اعاباەۆ بيىل جىل باسىنان بەرى قۇتىرۋ اۋرۋى جونىندە ەشقانداي دەرەك تىركەلمەگەنىن مالىمدەدى. بۇل دەر كەزىندە اتقارىلعان پروفيلاكتيكالىق جۇمىستاردىڭ ناتيجەسى دەدى مامان. دەگەنمەن قالادا يت-مىسىق تىستەگەن نەمەسە تىرناعان وقيعالار بولعان. بىراق ولاردىڭ ەشقايسىسى قۇتىرۋ سالدارىنا كىرگەن جوق. يت-مىسىقتان ءزابىر كورگەندەردىڭ تەڭ جارتىسى بالالار. ماماننىڭ ايتۋىنشا, قۇتىرۋ دەرتىنە قارسى الدىن الۋ شارالارى تۇراقتى تۇردە جۇرگىزىلىپ كەلەدى.
